ମହାରାଷ୍ଟ୍ର ବିଜେପିରେ ସଂକଟ । ଦଳରୁ ଇସ୍ତଫା ଦେଲେ ପୂର୍ବତନ କେନ୍ଦ୍ରମନ୍ତ୍ରୀ ଜୟସିଂରାଓ ଗାଇକୱାଡ । ଦଳ ଉପେକ୍ଷା କରୁଥିବା ଅଭିଯୋଗ
କନକ ବ୍ୟୁରୋ : ମହାରାଷ୍ଟ୍ର ବିଜେପିରେ ମହାମାରୀ । କ୍ଷମତାରୁ ଯିବା ପରେ ଏବେ ଜଣଙ୍କ ପରେ ଜଣେ ନେତା ଦଳ ଛାଡୁଛନ୍ତି । ଏହି କ୍ରମରେ ମଙ୍ଗଳବାର ଦଳରୁ ଇସ୍ତଫା ଦେଇଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ଜୟସିଂରାଓ ଗାଇକୱାଡ । ସେ ତାଙ୍କର ଇସ୍ତଫାପତ୍ର ମହାରାଷ୍ଟ୍ର ବିଜେପିର ସଭାପତି ଚନ୍ଦ୍ରକାନ୍ତ ପାଟିଲଙ୍କ ନିକଟକୁ ପଠାଇ ଦେଇଛନ୍ତି । ଚନ୍ଦ୍ରକାନ୍ତ ପାଟିଲଙ୍କୁ ଲେଖିଥିବା ଚିଠି ମୁତାବକ ସେ ରାଜ୍ୟ ବିଜେପି ୟୁନିଟ୍ ଓ ଦଳର ପ୍ରାଥମିକ ସଭ୍ୟପଦରୁ ଇସ୍ତଫା ଦେଇଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଏନେଇ ଗଣମାଧ୍ୟମ ପ୍ରଶ୍ନର ଉତର ଦେଇ ଗାଇକୱାଡ କହିଛନ୍ତି ‘ମୁଁ ଦଳପାଇଁ କାମ କରିବାକୁ ପ୍ରସ୍ତୁତ ଥିଲି ହେଲେ ଦଳ ମୋତେ ସୁଯୋଗ ଦେଲା ନାହିଁ । ତେଣୁ ଶେଷରେ ମୁଁ ଏଭଳି ନିସ୍ପତ୍ତି ନେଲି ’ ଗାଇକୱାଡ ଏହା ପୂର୍ବରୁ ମହାରାଷ୍ଟ୍ରର ମନ୍ତ୍ରୀ ଭାବେ ବି କାର୍ଯ୍ୟ କରିଛନ୍ତି । ସେ ବର୍ତମାନ ସଂସଦ କିମ୍ବା ବିଧାନସଭାର ସଦସ୍ୟ ହେବାକୁ ଚାହୁଁ ନଥିବା କଥା କହିଛନ୍ତି । ମୁଁ ଦଳକୁ ସାଂଗଠନିକ ସ୍ତରରେ ମଜଭୂତ କରିବାକୁ ଚାହୁଁଛି । ତେଣୁ ଏହି ଦାୟିତ୍ୱ ନେବାକୁ ନେବାକୁ ମୁଁ ଦଶବର୍ଷ ଧରି ଦଳ ପାଖରେ ଅନୁରୋଧ କରିଆସୁଛି । ହେଲେ ଦଳ ମୋତେ ଏଥିପାଇଁ ସୁଯୋଗ ଦେଲା ନାହିଁ । ଏଣୁ ମୁଁ ବାଧ୍ୟ ହୋଇ ଦଳରୁ ଇସ୍ତଫା ଦେଇଛି ବୋଲି ସେ କହିଛନ୍ତି । ଏହାସହ ସେ ରାଜ୍ୟ ବିଜେପି ଉପରେ ଏକ ବଡ ଆରୋପ ଲଗାଇଛନ୍ତି । ସେ କହିଛନ୍ତି କି ମହାରାଷ୍ଟ୍ରରେ ଯେଉଁ ବିଜେପି ନେତା ମାନେ ସର୍ବଦା ସଂଗଠନକୁ ମଜଭୂତ କରିବାକୁ ଚାହିଁଛନ୍ତି ସେମାନଙ୍କୁ ଦଳ ପକ୍ଷରୁ ଉପେକ୍ଷା କରାଯାଇଛି । ଅନ୍ୟପଟେ ଗାଇକୱାଡଙ୍କ ଇସ୍ତଫା ଉପରେ କୌଣସି ମନ୍ତବ୍ୟ ଦେବାକୁ ରାଜ୍ୟ ସଭାପତି ଚନ୍ଦ୍ରକାନ୍ତ ପାଟିଲ ମନା କରିଛନ୍ତି ।