ଜି-୨୦ ସମ୍ମିଳନୀକୁ ଆସିଥିବା ପ୍ରତି ବିଦେଶୀ ଅତିଥିଙ୍କୁ ପ୍ରଦାନ କରାଯିବ ୧ ହଜାର ଟଙ୍କା । ଜାଣନ୍ତୁ କାରଣ

କନକ ବ୍ୟୁରୋ : ଦିଲ୍ଲୀରେ ଅନୁଷ୍ଠିତ ହେବାକୁ ଯାଉଥିବା ଜି-୨୦ ସମ୍ମିଳନୀରେ ଯୋଗଦେବାକୁ ବିଦେଶୀ ଅତିଥିମାନେ ଦିଲ୍ଲୀରେ ପହଂଚିବା ଆରମ୍ଭ କରିଛନ୍ତି । ଆଜି ସନ୍ଧ୍ୟା ସୁଦ୍ଧା ସମସ୍ତ ଅତିଥି ଦିଲ୍ଲୀରେ ପହଂଚିଯିବେ ବୋଲି କୁହାଯାଉଛି । ଯେଉଁମାନେ ଆସିଯାଇଛନ୍ତି ସେମାନଙ୍କୁ ଭାରତ ସରକାରଙ୍କ ତରଫରୁ ଭବ୍ୟ ସ୍ୱାଗତ କରାଯାଉଛି । ଦିଲ୍ଲୀର ପ୍ରତି ଗଳିକନ୍ଦିରେ ଜି-୨୦ର ଝଲକ ଦେଖିବାକୁ ମିଳିଛି । ସରକାରଙ୍କର ଲକ୍ଷ୍ୟ ରହିଛି କି ଏହି ସମ୍ମିଳନୀ ମାଧ୍ୟମରେ ସାରା ବିଶ୍ୱକୁ ବାର୍ତ୍ତା ଦିଆଯିବ କି ଭାରତ ବଦଳିଯାଇଛି । ବିକାଶ ଦିଗରେ ଦେଶ ଦ୍ରୁତଗତିରେ ଆଗକୁ ଯାଉଛି । ଭାରତର ବିକାଶରେ ଡିଜିଟାଲ ଇଣ୍ଡିଆର ବଡ ଯୋଗଦାନ ମଧ୍ୟ ରହିଛି ବୋଲି ଭାରତ ପ୍ରମାଣ କରିବାକୁ ଚେଷ୍ଟା କରିଛି ।

ଏହି କ୍ରମରେ ଜି-୨୦କୁ ଆସୁଥିବା ବିଦେଶୀ ଅତିଥିମାନଙ୍କୁ ଡିଜିଟାଲ ଇଣ୍ଡିଆ ବାବଦରେ ପୂର୍ଣ୍ଣ ସୂଚନା ଦେବାକୁ ଭାରତ ତରଫରୁ ଏକ ନିଆରା ପଦକ୍ଷେପ ଗ୍ରହଣ କରାଯାଇଛି । ଏହି କ୍ରମରେ ବିଦେଶୀ ଅତିଥିମାନଙ୍କୁ ଭାରତ ତରଫରୁ ୧ ହଜାର ଟଙ୍କା ଲେଖାଏଁ ଟ୍ରାନ୍ସଫର କରାଯିବ । ଏନେଇ ସରକାରଙ୍କ ତରଫରୁ ସବୁ ସମ୍ଭାବିତ ଅତିଥିମାନଙ୍କର ଏକ ୱାଲେଟ ପ୍ରସ୍ତୁତ କରାଯାଇଛି ।

ଅତିଥୀମାନଙ୍କ ୱାଲେଟକୁ ଯେଉଁ ୧ହଜାର ଟଙ୍କା ଲେଖାଏଁ ଟ୍ରାନ୍ସଫର କରାଯିବ ସେହି ଟଙ୍କାରେ ସେମାନେ ବୈଠକ ସ୍ଥଳରେ ଲାଗିଥିବା ଷ୍ଟଲ ବା ଦୋକାନମାନଙ୍କରୁ ଜିନିଷ କିଣିବେ । ଜି-୨୦ ସଭାସ୍ଥଳରେ ବହୁ ପ୍ରକାରର ଷ୍ଟଲ ଲାଗିଛି । ଏହି ଷ୍ଟଲରେ ସେହିସବୁ ଜିନିଷ ବିକ୍ରି କରାଯାଉଛି ତାହା ଭାରତୀୟ ପରମ୍ପରା ଓ ସଂସ୍କୃତି ସହ ଜଡିତ । ଅତିଥୀମାନେ ସେମାନଙ୍କ ୱାଲେଟକୁ ଟ୍ରାନ୍ସଫର କରାଯାଇଥିବା ଟଙ୍କାକୁ ୟୁପିଆଇ ମାଧ୍ୟମରେ ପେମେଣ୍ଟ କରି ଏଠାରୁ ଜିନିଷ କିଣିପାରିବେ । କୁହାଯାଇଛି କି ଅତିଥୀମାନେ ନିଜେ ୟୁପିଆଇ ବ୍ୟବହାର କରିବା ଦ୍ୱାରା ସେମାନେ ଜାଣିପାରିବେ କି ଡିଜିଟାଲ ନେଣଦେଣ ଭାରତରେ କିଭଳି ସହଜରେ କାରବାର କରିବାରେ ସହାୟକ ହେଉଛି ।