ସାଧାରଣ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀଙ୍କ ଚତୁର ରାଜନୈତିକ ଗୋଟିଚାଳନା । ପୁରୀ ଜିଲ୍ଲା ବିଜେଡି କଳିର ପୂର୍ଣ୍ଣଛେଦ
କନକ ବ୍ୟୁରୋ : ସାଧାରଣ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀଙ୍କ ଚତୁର ରାଜନୈତିକ ଗୋଟି ଚାଳନା । ଦଳ ଭିତରେ ବିଭିନ୍ନ ପକ୍ଷକୁ ସନ୍ତୁଷ୍ଟ କରିବାକୁ ରାଜ୍ୟସଭା ଟିକେଟକୁ ଏକ ପ୍ରମୁଖ ମାଧ୍ୟମ କରିଛନ୍ତି । କଟକ ଓ ପୁରୀ ଜିଲ୍ଲାର ରାଜନୈତିକ ସ୍ଥିତିକୁ ନଜରରେ ରଖି ବଡ଼ ନିଷ୍ପତି ନେଇଛନ୍ତି ନବୀନ । ଯୁବ ବିଜେଡିର ରାଜ୍ୟସଭାପତି ଶୁଭାଶିଷ ଖୁଣ୍ଟିଆଙ୍କୁ ରାଜ୍ୟସଭା ପ୍ରାର୍ଥୀ କରାଯାଇଛି । ଏହା କେବଳ ଜିଲ୍ଲା ରାଜନୀତି ନୁହଁ, ରାଜ୍ୟ ରାଜନୀତିରେ ଚର୍ଚ୍ଚା ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
ପରିକ୍ରମା ପ୍ରକଳ୍ପ, ପୌର ନିର୍ବାଚନର ଦାୟିତ୍ୱ ସୂଚାରୁ ରୂପେ ସମ୍ପାଦନ କରି ବିଧାୟକ ଟିକେଟ୍ ଦୌଡ଼ରେ ସବୁଠୁ ଆଗରେ ଥିଲେ ଶୁଭାଶିଷ । ଏହା ସହ ବିଜେଡିର ବରିଷ୍ଠ ନେତା ତଥା ପୁରୀ ସଦର ପଂଚାୟତ ସମିତି ଅଧ୍ୟକ୍ଷ ଦିବାକର ପାତ୍ର ବି ଟିକେଟ୍ ଦୌଡ଼ରେ ଥିଲେ । କେବଳ ଏହି ଦୁଇ ଜଣ ନୁହନ୍ତି, ପୂର୍ବତନ ବିଧାୟକ ମହେଶ୍ୱର ମହାନ୍ତିଙ୍କ ମୃତ୍ୟୁ ପରେ ତାଙ୍କ ବଡ଼ ପୁଅ ସୁନିଲ ମହାନ୍ତି ବି ଟିକେଟର ଅନ୍ୟତମ ଦାବିଦାର ଥିଲେ । ଏବେ ମୁଖ୍ୟମନ୍ତ୍ରୀ ଶୁଭାଶିଷଙ୍କୁ ରାଜ୍ୟସଭା ପଠାଇବା ସହ ଦିବାକର ପାତ୍ରଙ୍କୁ ଜିଲ୍ଲା ସଭାପତି ଦାୟିତ୍ୱ ଦେଇ ଚତୁର ଗୋଟି ଚାଳନା କରିଛନ୍ତି ।
ସେହିପରି ବାରବାଟୀ-କଟକ ଆସନରୁ ବିଧାନସଭା ନିର୍ବାଚନ ଲଢିବା ପାଇଁ ଏକାଧିକ ଆଶାୟୀ ରହିଛନ୍ତି । ତିନି ଥରର ବିଧାୟକ ଦେବାଶିଷ ସାମନ୍ତରାୟ ସବୁଠୁ ଆଗରେ ଥିବା ବେଳେ ମେୟର ସୁବାସ ସିଂହ, ବିଶ୍ୱଜିତ୍ ମହାନ୍ତି, ଡକ୍ଟର ରଞ୍ଜନ ବିଶ୍ୱାଳ, ଅରିନ୍ଦମ ରାୟ ବି ଟିକେଟ୍ ଆଶାୟୀ ଥିଲେ । ସବୁବେଳେ ସମସ୍ତଙ୍କୁ ଚକମା ଦେବାରେ ଅଭ୍ୟସ୍ତ ନବୀନ ପଟ୍ଟନାୟକ ଏବେ ଦେବାଶିଷଙ୍କୁ ରାଜ୍ୟସଭା ଟିକେଟ୍ ଦେଇ ଆଶାୟୀଙ୍କ ସଂଖ୍ୟା କମାଇ ଦେଇଛନ୍ତି । ଏହା ସହ ବାରବାଟୀ କଟକରୁ ୨୦୦୯ରୁ ଟିକେଟ୍ ପାଇ ଆସୁଥିବା ଦେବାଶିଷଙ୍କ ବଦଳରେ ନୂଆ ମୁହଁ ଠିଆ ହେବେ, ଏକଥା ସ୍ୱଷ୍ଟ ହୋଇଛି ।