ପଞ୍ଜାବ ସରକାରଙ୍କ ବଡ ଘୋଷଣା, ରାଜ୍ୟରେ ପ୍ରବେଶ ପାଇଁ ଟିକାର ଉଭୟ ଡୋଜ କିମ୍ବା ଆରଟିପିସିଆର ଟେଷ୍ଟ ରିପୋର୍ଟ ଅନିବାର୍ଯ୍ୟ

କନକ ବ୍ୟୁରୋ : କରୋନା କଟକଣାକୁ ନେଇ ପୁଣି କଠୋର ହୋଇଛନ୍ତି ପଞ୍ଜାବ ସରକାର । ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର ସିଂ ଘୋଷଣା କରିଛନ୍ତି କି ବାହାର ରାଜ୍ୟରୁ ପଞ୍ଜାବକୁ ଆସୁଥିବା ଲୋକମାନଙ୍କ ପାଇଁ ଟିକାର ଉଭୟ ଡୋଜ କିମ୍ବା ଆରଟିପିସିଆର ଟେଷ୍ଟ ରିପୋର୍ଟ ଅନିବାର୍ଯ୍ୟ । ଶନିବାର ଦିନ ଏହି ନିର୍ଦ୍ଦେଶନାମା ଘୋଷଣା କରିବା ସହ ହିମାଚଳପ୍ରଦେଶ ଓ ଜମ୍ମୁରୁ ଆସୁଥିବା ଲୋକମାନଙ୍କ ଉପରେ ସ୍ୱତନ୍ତ୍ର ନଜର ରଖିବାକୁ ନିର୍ଦ୍ଦେଶ ଦିଆଯାଇଛି ।

ଶିକ୍ଷାନୁଷ୍ଠାନରେ ବଢୁଥିବା ସଂକ୍ରମଣକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି କି କରୋନାର ଉଭୟ ଡୋଜ ଟିକା ନେଇଥିବା କିମ୍ବା ଏବେ କରୋନାରୁ ସୁସ୍ଥ ହୋଇଥିବା ଟିଚିଙ୍ଗ ଓ ନନ୍ ଟିଚିଙ୍ଗ ଷ୍ଟାଫ୍ ମାନେ କେବଳ ଶିକ୍ଷାନୁଷ୍ଠାନକୁ ଆସିପାରିବେ । ନଚେତ ପିଲାମାନଙ୍କ ପାଇଁ ଅନଲାଇନ ଶିକ୍ଷାର ବିକଳ୍ପ ବ୍ୟବସ୍ଥା ଉପଲବ୍ଧ ହେବ ।

ଅନ୍ୟପଟେ ଟିଚିଙ୍ଗ ଓ ନନ୍ ଟିଚିଙ୍ଗ ଷ୍ଟାଫ ମାନଙ୍କ ପାଇଁ ଟିକାକରଣ ଉପରେ ଗୁରୁତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ । ଏନେଇ ସେମାନଙ୍କ ପାଇଁ ଏକ ସ୍ୱତନ୍ତ୍ର କ୍ୟାମ୍ପ କରାଯାଇ ସେମାନଙ୍କୁ ପ୍ରଥମ କିମ୍ବା ଦ୍ୱିତୀୟ ଡୋଜ ଟିକା ଦେବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ।

Punjab CM Captain Amarinder Singh orders mandatory full Covid vaccination or negative RTPCR report for all those entering the state from Monday, with strict monitoring particularly of those coming from Himachal Pradesh & Jammu, which are showing increased positivity: State Govt pic.twitter.com/ykXdGmLSwD

— ANI (@ANI) August 14, 2021

କ୍ୟାପଟେନ୍ ଅମରିନ୍ଦରସିଂଙ୍କ ଅଧ୍ୟକ୍ଷତାରେ ବସିଥିବା ସମୀକ୍ଷା ବୈଠକ ପରେ ଏଭଳି ନିର୍ଦ୍ଦେଶ ଜାରି କରାଯାଇଛି । ଏହାସହ ଦୈନିକ ଶିକ୍ଷାନୁଷ୍ଠାନରୁ ସର୍ବନିମ୍ନ ୧୦ ହଜାର ନମୁନା ପରୀକ୍ଷା କରିବାକୁ ନିର୍ଦ୍ଦେଶ ଦେଇଛନ୍ତି ।