ମମିତା ନିଖୋଜ ମାମଲାର ଏତଲା ଲେଖିଥିଲେ ଖୋଦ୍ ଗୋବିନ୍ଦ ସାହୁ : ପରିବାର ପହଂଚିବା ଆଗରୁ ପହଂଚି ଯାଇଥିଲେ କେ.ଗାଁ ଥାନା

କନକ ବ୍ୟୁରୋ : ମମିତା ମେହେର ନିଖୋଜ ମାମଲାର ଏତଲା ନିଜେ ଲେଖିଥିଲେ ଗୋବିନ୍ଦ ସାହୁ । ଏପରିକି ଏତଲା ଲେଖିବା ପରେ, ମମିତାଙ୍କ ପରିବାର କେ. ଗାଁ ଥାନାରେ ପହଂଚିବା ଆଗରୁ ସେଠାରେ ପହଂଚି ଯାଇଥିଲେ । ଆଉ ତାଙ୍କରି ଇସାରାରେ ଥାନା ବାବୁ ଏଫଆଇଆର ରଖି ନଥିବା ଅଭିଯୋଗ ହୋଇଛି । ବଲାଙ୍ଗିରର ମାମଲା ହୋଇଥିବାରୁ ତୁରକେଲାରେ ଏତଲା ଦେବାକୁ କହିଥିଲେ ଏବଂ ମମିତାଙ୍କ ପରିବାର ଝିଅ ନିଖୋଜ ନେଇ ସିନ୍ଧକେଲା ଥାନାରେ ଏତଲା ଦେଇଥିଲେ । ମୃତ୍ୟୁ ମାମଲାକୁ ନେଇ ରାଜନୀତି ଜୋର ଧରିଥିବା ବେଳେ ନ୍ୟାୟ ଦାବି କରିଛନ୍ତି ମମିତାଙ୍କ ବାପା । ଘଟଣାରେ ସଂପୃକ୍ତ ଥିବା ଅଭିଯୁକ୍ତମାନଙ୍କୁ ସେ ଫାଶୀ ଦଣ୍ଡ ଦାବି କରିଛନ୍ତି ।