ଆସନ୍ତା ୭ରୁ ଆରମ୍ଭ ହେବ ଯୁକ୍ତ୨ ପରୀକ୍ଷା । ହଲ ଭିତରକୁ ମୋବାଇଲ ମନା, କଳାବଲ ପେନରେ ଉତ୍ତର ଲେଖିବା ପାଇଁ ଛାତ୍ରଛାତ୍ରୀଙ୍କୁ ଦିଆଯାଇଛି ନିର୍ଦ୍ଦେଶ

କନକ ବ୍ୟୁରୋ : ମାର୍ଚ୍ଚ ୭ରୁ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପରିଚାଳିତ +୨ ପରୀକ୍ଷା ଆରମ୍ଭ ହେବ। ଏଥିପାଇଁ ପରୀକ୍ଷା କେନ୍ଦ୍ରଗୁଡ଼ିକରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବା ସହ ଯେପରି ସୁରକ୍ଷିତ ଭାବେ ପ୍ରଶ୍ନପତ୍ର ହବରେ ପହଞ୍ଚିବ ଏବଂ ହବ୍ରୁ ପରୀକ୍ଷା କେନ୍ଦ୍ରକୁ ଯିବ ସେନେଇ +୨ କାଉନସିଲ୍ କର୍ତ୍ତୃପକ୍ଷ ବହୁ ପଦକ୍ଷେପ ନେଇଛନ୍ତି। ସେହିପରି ମାଟ୍ରିକ ପ୍ରଶ୍ନପତ୍ର ଭାଇରାଲ୍ ହେଲା ଭଳି +୨ ପ୍ରଶ୍ନପତ୍ର ଯେପରି ଭାଇରାଲ୍ ନହେବ ସେଥିପାଇଁ ପରୀକ୍ଷା ହଲ୍କୁ ମୋବାଇଲ୍ ଏବଂ ଇଲୋକ୍ଟ୍ରୋନିକ୍ସ ସାମଗ୍ରୀ ନେବା ଉପରେ କଟକଣା ଲାଗିଛି।

ପରୀକ୍ଷା କେନ୍ଦ୍ରକୁ ପ୍ରଶ୍ନପତ୍ର ପହଞ୍ଚାଇବା ପାଇଁ ୨୦୨ଟି ହବ୍ ହୋଇଥିବାବେଳେ ଏଠାରେ ୨୪ଘଣ୍ଟା ସୁରକ୍ଷା ବ୍ୟବସ୍ଥା ଏବଂ ପୁଲିସ ମୁତୟନ କରାଯାଇଛି। ପରୀକ୍ଷା ଆରମ୍ଭ ହେବାର ଘଣ୍ଟାଏ ପୂର୍ବରୁ ପରୀକ୍ଷା କେନ୍ଦ୍ରରେ ପ୍ରଶ୍ନପତ୍ର ପହଞ୍ଚିବ। ସମସ୍ତ ପରୀକ୍ଷା କେନ୍ଦ୍ରରେ ସିସିଟିଭି ଲାଗିବ। ଚଳିତବର୍ଷ ୧୦୯୧ଟି ପରୀକ୍ଷା କେନ୍ଦ୍ର ହୋଇଥିବାବେଳେ ୯୩୬ଟିରେ ସିସିଟିଭି ଲାଗିସାରିଛି। ଯେଉଁଠି ସିସିଟିଭି ଲାଗିନପାରିବ ତାହାକୁ ସମ୍ବେଦନଶୀଳ କେନ୍ଦ୍ର ବୋଲି ଘୋଷଣା କରାଯିବ। ସେହି କେନ୍ଦ୍ରଗୁଡ଼ିକୁ ଅଧିକ ସ୍କ୍ବାଡ୍ ପଠାଇବାକୁ ନିଷ୍ପତ୍ତି ହୋଇଛି।

ସେହିପରି ପରୀକ୍ଷାକେନ୍ଦ୍ର ଭିତରକୁ ଛାତ୍ରଛାତ୍ରୀମାନେ ଯେପରି ମୋବାଇଲ୍, ସ୍ମାର୍ଟ ଘଣ୍ଟା, କ୍ୟାମେରା ପେନ୍ ଏବଂ କୌଣସି ଇଲେକ୍ଟ୍ରୋନିକ୍ସ ସାମଗ୍ରୀ ନେଇକି ନଯିବେ ସେଥିପାଇଁ କଡ଼ାକଡ଼ି ଯାଞ୍ଚ କରାଯିବ। ଏହାସହ ନିରୀକ୍ଷକମାନେ ବି ପରୀକ୍ଷା ହଲ୍କୁ ମୋବାଇଲ୍ ନେଇପାରିବେନି। ପରୀକ୍ଷା କେନ୍ଦ୍ର ସୁପରିନଟେଣ୍ଡେଣ୍ଟ କେବଳ ମୋବାଇଲ୍ ବ୍ୟବହାର କରିପାରିବେ। ସମସ୍ତ ନିରୀକ୍ଷକ କେନ୍ଦ୍ର ସୁପରିନଟେଣ୍ଡେଣ୍ଟଙ୍କ ନିକଟରେ ମୋବାଇଲ୍ ସୁଇଚ୍ ଅଫ୍ କରି ଦାଖଲ କରିବେ। ସୁପରିନଟେଣ୍ଡେଣ୍ଟ୍ ଏହା ନିଶ୍ଚିତ କରିବା ପରେ ନିରୀକ୍ଷକଙ୍କୁ ପରୀକ୍ଷା ହଲ୍କୁ ଛାଡ଼ିବାକୁ କୁହାଯାଇଛି। ଏହାସହ ପରୀକ୍ଷା କେନ୍ଦ୍ରରେ ଥିବା ଅନ୍ୟ କର୍ମଚାରୀମାନେ ବି କେନ୍ଦ୍ର ସୁପରିନଟେଣ୍ଡେଣ୍ଟଙ୍କ ନିକଟରେ ମୋବାଇଲ୍ ଦାଖଲ କରିବାକୁ କୁହାଯାଇଛି।

କପି ଉପରେ ରୋକ୍ ଲଗାଇବା ପାଇଁ ତ୍ରିସ୍ତରୀୟ ସ୍କ୍ବାଡ୍ ବ୍ୟବସ୍ଥା କରାଯାଇଛି। କେନ୍ଦ୍ରୀୟ, ଜୋନାଲ୍ ଏବଂ ଜିଲ୍ଲାସ୍ତରୀୟ ସ୍କ୍ବାଡ୍ ଗଠନ ହୋଇଛି। ଏହି ସ୍କ୍ବାଡ୍ ସମସ୍ତ ପରୀକ୍ଷା କେନ୍ଦ୍ର ଉପରେ ଅଚାନକ ଚଢ଼ଉ କରିବେ। ପରୀକ୍ଷା ହବ୍ରୁ ପ୍ରଶ୍ନପତ୍ର ନେଇ ପରୀକ୍ଷା କେନ୍ଦ୍ରକୁ ଯାଉଥିବା ଅଧ୍ୟାପକମାନଙ୍କୁ ବି ସ୍କ୍ବାଡ୍ ଭାବେ ନିୟୋଜିତ କରାଯିବ। ଯଦି କୌଣସି ପରୀକ୍ଷା କେନ୍ଦ୍ରରେ କିଛି ଅନିୟମିତତା ହେଉଥିବା ବା କପି ହେଉଥିବା ସାଧାରଣ ଲୋକ ଜାଣିବେ ତେବେ ତୁରନ୍ତ କାଉନସିଲ କଣ୍ଟ୍ରୋଲରୁମ୍ ନମ୍ବର ୦୬୭୪-୨୩୦୩୮୦୩ ଏବଂ ୦୬୭୪-୨୩୦୦୦୯୯ରେ ଯୋଗାଯୋଗ କରିବାକୁ କୁହାଯାଇଛି। ଏହାସହ ଯଦି କାହାର କିଛି ସମସ୍ୟା ଥିବ ତେବେ ଏହି ନମ୍ବରରେ ଯୋଗାଯୋଗ କରିପାରିବେ।

ସେହିପରି ଛାତ୍ରଛାତ୍ରୀ ପରୀକ୍ଷାରେ କେବଳ କଳା ବଲ୍ ପେନ୍ ବ୍ୟବହାର କରିବାକୁ କୁହାଯାଇଛି। କାଉନସିଲ୍ ଅଧ୍ୟକ୍ଷ କହିଛନ୍ତି ଯେ, ଉତ୍ତର ଖାତା ସ୍କାନ୍ ହେବାକୁ ଥିବାରୁ କଳା ବଲ୍ ପେନରେ ଲେଖିବା ବାଧ୍ୟତାମୂଳକ କରାଯାଇଛି। କେନ୍ଦ୍ର ସୁପରିନଟେଣ୍ଡେଣ୍ଟମାନେ ଏନେଇ ପରୀକ୍ଷା କେନ୍ଦ୍ରରେ ପୋଷ୍ଟର, ନୋଟିସ୍ ଏବଂ ସାଇନେଜ୍ ଲଗାଇବାକୁ କୁହାଯାଇଛି। ସେହପିରି ସମସ୍ତ ଜିଲ୍ଲାର ଜିଲ୍ଲାପାଳ ଏବଂ ଏସ୍ପିମାନେ ହବ୍ ଓ ପରୀକ୍ଷା କେନ୍ଦ୍ରର ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବା ଏବଂ ପରୀକ୍ଷା ସୁପରିଚାଳନାରେ ସହଯୋଗ କରିବାକୁ କାଉନସିଲ୍ କର୍ତ୍ତୃପକ୍ଷ ଅନୁରୋଧ କରିଛନ୍ତି।