ସାଙ୍ଗର ଶେଷ ସତ୍କାର ପାଇଁ ଏକାଠି ହେଇଛନ୍ତି ସାଙ୍ଗ । ଫୁଲରେ ସଜାଇ ଦେଉଛନ୍ତି ମଶାଣୀ । ସହିଦ ପୁଅକୁ ଶେଷ ବିଦାୟ ଦେବ କେନ୍ଦୁଢିପ ଗାଁ ।

କନକ ବ୍ୟୁରୋ: ଦିନେ ଯେଉଁ ସାଙ୍ଗକୁ ଫୁଲ ତୋଡା ଦେଇ ଗାଁକୁ ସ୍ୱାଗତ କରୁଥିଲେ, ଏବେ ସେଇ ସାଙ୍ଗ ପାଇଁ ମଶାଣୀ ଭୁଇଁରେ ସଜାଉଛନ୍ତି ଫୁଲ । ସାଙ୍ଗର ଶେଷ ସତ୍କାର ପାଇଁ ସାଙ୍ଗମାନେ ଏକାଠି ହେଇଛନ୍ତି । ଆଉ କେନ୍ଦୁଢିପ ଗାଁର ମଶାଣୀକୁ ଆଜି ଫୁଲରେ ସଜାଉଛନ୍ତି ।

ସିକ୍କିମରେ ଓଡିଆ ଯବାନ ସରୋଜ ଦାସ ସହିଦ ହେବା ପରେ ଆଜି ତାଙ୍କ ପାର୍ଥିବ ଶରୀର ଆସି ଜନ୍ମମାଟିରେ ପହଞ୍ଚିଛି । ଭୁବନେଶ୍ୱରରେ ସରୋଜଙ୍କ ପାର୍ଥିବ ଶରୀର ପବଞ୍ଚିବା ପରେ ତାଙ୍କୁ ଗାର୍ଡ ଅଫ୍ ଅନର ଦିଆଯାଇଥିଲା । ଏହାପରେ ମୁଖ୍ୟମନ୍ତ୍ରୀ ଓ ରାଜ୍ୟପାଳ ପହଞ୍ଚି ସହଦିଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ । ପରେ ପରେ ସେନାର ସ୍ୱତନ୍ତ୍ର ଗାଡିରେ ସହିଦ ଯବାନଙ୍କ ମରଶରୀରକୁ ସ୍ୱତନ୍ତ୍ର କରିଡରରେ ଢେଙ୍କାନାଳ ସ୍ଥିତ ତାଙ୍କ ଗାଁକୁ ନିଆଯାଇଛି । ଯେଉଁଠି ଗାଁ ମଶାଣୀରେ ତାଙ୍କର ଅନ୍ତିମ ସଂସ୍କାର କରାଯିବ ।

ସୂଚନାଯୋଗ୍ୟ ଯେ, ସିକ୍କିମରେ ଆସିଥିବା ପ୍ରଳୟଙ୍କାରୀ ବନ୍ୟାରେ ଭାସିଯାଇଥିଲେ ୨୨ ଜଣ ଯବାନ । ଏମାନଙ୍କ ମଧ୍ୟରେ ଥିଲେ ଓଡ଼ିଆ ଯବାନ ସରୋଜ ଦାସ । ତାଙ୍କ ସହ କୌଣସି ଯୋଗାଯୋଗ ହୋଇପାରିନଥିଲା । ଗୁୁରୁବାର ଦିନ ବଡ଼ଭାଇଙ୍କ ମୋବାଇଲ୍କୁ ଉଦ୍ଧାର ୫ ଯବାନଙ୍କ ମୃତଦେହର ଫଟୋ ଆସିଥିଲା । ସେଥିରୁ ଭାଇ ମନୋଜ ସରୋଜଙ୍କୁ ଚିହ୍ନଟ କରିଥିଲେ । ଏହା ପରେ ଘରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ଗତ ଫେବ୍ରୁଆରୀ ମାସରେ ବିବାହ କରିଥିଲେ ସରୋଜ ।