କଟକ ବଡ ମେଡିକାଲରେ ମାଗଣାରେ ମିଳିବ ଇକମୋ ଚିକିତ୍ସା । ୯ଟି ମେସିନର ଲୋକାର୍ପଣ କଲେ ମୁଖ୍ୟମନ୍ତ୍ରୀ, ନବୀନ କହିଲେ ଇକମୋ ଚିକିତ୍ସା ପାଇଁ ସବୁ ଖର୍ଚ୍ଚ କରିବେ ସରକାର ।
କନକ ବ୍ୟୁରୋ : ଏଣିକି କଟକ ବଡ ମେଡିକାଲରେ ମିଳିବ ମାଗଣା ଇକମୋ ଚିକିତ୍ସା । ଏହି ମାଗଣା ଇକମୋ ଚିକିତ୍ସା ସେବାର ଲୋକାର୍ପଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ ଏହାକୁ ରାଜ୍ୟବାସୀଙ୍କ ଉଦ୍ଦେଶ୍ୟରେ ଉତ୍ସଗୀକୃତ କରିଛନ୍ତି ମୁଖ୍ୟମନ୍ତ୍ରୀ । ପୂର୍ବ ଭାରତରେ ସରକାରୀ ଭାବେ ଇକମୋ ଚିକିତ୍ସା ଯୋଗାଉଥିବା ଏହା ସବୁଠାରୁ ବଡ ୟୁନିଟ୍ ହେବ । ଏସସିବି ହସ୍ପିଟାଲରେ ସମୁଦାୟ ୯ଟି ମେସିନ୍ ରହିବ ।
Kanak News is now on WhatsApp
Join and get latest news updates delivered to you via WhatsApp
ଇକମୋ ଚିକିତ୍ସା ସେବାର ଉଦଘାଟନ ପରେ ନବୀନ କହିଛନ୍ତି, ଗୁରୁତର କୋଭିଡ ରୋଗୀଙ୍କୁ ଆଉ ବାହାରକୁ ଯିବାକୁ ପଡିବ ନାହିଁ । ଓଡ଼ିଶାରେ ହିଁ ଚିକିତ୍ସିତ ହେବେ ରୋଗୀ । ଏହି ଚିକିତ୍ସା ବେଶ ଅର୍ଥ ଆବଶ୍ୟକ କିନ୍ତୁ ରାଜ୍ୟ ସରକାର ମାଗଣାରେ ଏହି ସେବା ଯୋଗାଇଦେବେ । ଏହି ଚିକିତ୍ସାରେ ଯାହା ବି ଖର୍ଚ୍ଚ ହେବ ଲୋକଙ୍କ ଉପରେ ପଡିବ ନାହିଁ । ସବୁ ଖର୍ଚ୍ଚ ସରକାର ବହନ କରିବେ । ତୃତୀୟ ଲହରର ମୁକାବିଲା ପାଇଁ ଆମକୁ ସତର୍କ ରହିବାକୁ ହେବ । ଏଥିରେ ଶିଶୁ ମାନେ ଅଧିକ ମାତ୍ରାରେ ସଂକ୍ରମିତ ହେବେ ବୋଲି ବିଶେଷଜ୍ଞ କହୁଛନ୍ତି । ତେଣୁ ପିଲାଙ୍କ ସୁରକ୍ଷା ପାଇଁ କୋଭିଡ ଗାଇଡଲାଇନ ମାନିବା ସହ ମାସ୍କ ପିନ୍ଧିବା ପାଇଁ ପରାମର୍ଶ ଦେଇଛନ୍ତି । ନିଜେ ସୁରକ୍ଷିତ ରହିବା ସହ ପିଲାଙ୍କୁ ସୁରକ୍ଷିତ ରଖନ୍ତୁ ।
ଏହାପୂର୍ବରୁ କରୋନା ଯୋଗୁଁ ଯେଉଁମାନଙ୍କର ଲଙ୍ଗସ ଇନଫେକସନ ହେଉଥିଲା ଓ ଗୁରୁତର ହେଉଥିଲେ ସେମାନଙ୍କ ପାଇଁ ଇକମୋ ଚିକିତ୍ସାର ଆବଶ୍ୟକତା ପଡୁଥିଲା । ଦ୍ୱିତୀୟ ଲହର ସମୟରେ ଏହି ମେସିନର ବେଶୀ ଆବଶ୍ୟକତା ସାମନାକୁ ଆସିଥିଲା । ରାଜ୍ୟର ଏହି ଚିକିତ୍ସାର ସୁବିଧା ନଥିବାରୁ ଅନେକ ରୋଗୀ କୋଟି କୋଟି ଟଙ୍କା ଖର୍ଚ୍ଚ କରି ଚେନାଇ, କୋଲାକାତା ଭଳି ସହରକୁ ଯାଇ ଚିକିତ୍ସିତ ହୋଇଥିଲେ । ଅତ୍ୟନ୍ତ ଆବଶ୍ୟକତା ଦୃଷ୍ଟିରୁ ସେତେବେଳେ ଏସସିବିରେ ଇକମୋ ୟୁନିଟ୍ ସ୍ଥାପନ ପାଇଁ ନିଷ୍ପତି ନେଇଥିଲେ ସରକାର । ଆଉ ଘୋଷଣାର ୩ ମାସ ମଧ୍ୟରେ କଟକ ବଡ ମେଡିକାଲରେ ଇକମୋ ଚିକିତ୍ସା ସେବା କାର୍ଯ୍ୟକ୍ଷମ ହୋଇଛି ।
ସବୁଠୁ ବଡ କଥା ହେଲା, ଦେଶର ବିଭିନ୍ନ ସ୍ଥ୍ାନରେ ଇକମୋ ଚିକିତ୍ସାର ସୁବିଧା ରହିଛି । ନାମୀଦାମୀ ହସ୍ପିଟାଲରେ ଥିବା ଏହି ଇକମୋ ଚିକିତ୍ସାର ସୁବିଧଶ ପାଇବାକୁ ହେଲେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରିବାକୁ ପଡିଥାଏ । କିନ୍ତୁ ଦେଶର ପ୍ରଥମ ମେଡିକାଲ ଭାବେ କଟକ ବଡ ମେଡିକାଲରେ ମାଗଣାରେ ଇକମୋ ଚିକିତ୍ସା ଯୋଗାଇ ଦେଇଛନ୍ତି ସରକାର । ଯାହାଦ୍ୱାରା ଅର୍ଥାଭାବରୁ ଏହି ଚିକିତ୍ସାରୁ ବଞ୍ଚିତ ହେଉଥିବା ରୋଗୀଙ୍କୁ ଏହାର ଫାଇଦା ମିଳିବ । ଆଉ ନବୀନଙ୍କ ଏଭଳି ପଦକ୍ଷେପକୁ ଏବେ ଚାରିଆଡୁ ପ୍ରଂଶସା କରାଯାଉଛି । ଏହାପୂର୍ବରୁ ଇକମୋ ଚିକିତ୍ସା ଯୋଗାଇ ଦେବାକୁ ୨ଟି ଟିମକୁ ପ୍ରଶିକ୍ଷିଣ ଦିଆଯାଇଛି । ଯେଉଁମାନେ କୋଲକାତାରୁ ପ୍ରଶିକ୍ଷଣ ନେଇ ଫେରିଛନ୍ତି ।