କେଉଁ ଟିମ୍ ପାଖରେ ଅଛି କେତେ ଟଙ୍କା? ଆଇପିଏଲ ମିନି ନିଲାମୀରେ କିଏ ହେବେ ଦାମୀ ଖେଳାଳୀ, କେଉଁ ଖେଳାଳୀଙ୍କ ଉପରେ ରହିବ ସମସ୍ତଙ୍କର ନଜର?
କନକ ବ୍ୟୁରୋ : ଡିସେମ୍ବର ୧୯ରେ ଦୁବାଇରେ ହେବ ଆଇପିଏଲ ମିନି ନିଲାମୀ । ତେବେ ଏହି ମିନି ନିଲାମୀ ପୂର୍ବରୁ ଫ୍ରାଞ୍ଚାଇଜ ଗୁଡିକ ଅନେକ ଖେଳାଳୀଙ୍କୁ ରିଲିଜ କରିଥିବା ବେଳେ ଟ୍ରେଡ ମଧ୍ୟ ଶେଷ ହୋଇଛି । ଦୁବାଇରେ ହେବାକୁ ଥିବା ନିଲାମୀରେ ଅନେକ ଷ୍ଟାର ଖେଳାଳୀଙ୍କୁ ଦେଖିବାକୁ ମିଳିବ । ଖାସକରି ବିଶ୍ୱକପରେ ଦମଦାର ପ୍ରଦର୍ଶନ କରିଥିବା ଷ୍ଟାର୍କ, କମିନ୍ସ, ରଚିନ ରବୀନ୍ଦ୍ର, ଡାରେଲ ମିଚେଲଙ୍କ ଭଳି ଖେଳାଳୀ ନିଲାମୀରେ ନିଜ ନାଁ ସାମିଲ କରିପାରନ୍ତି । ଏଭଳି ସ୍ଥିତିରେ କେଉଁ ଖେଳାଳୀଙ୍କୁ କେତେ ଟଙ୍କାରେ କିଏ ନିଜ ଦଳରେ ସାମିଲ କରିବ ତାହା ଉପରେ ସମସ୍ତଙ୍କର ନଜର ରହିବ । ତେବେ ନିଲାମୀ ପୂର୍ବରୁ କେଉଁ ଫ୍ରାଞ୍ଚାଇଜ ପାଖରେ କେତେ ଟଙ୍କା ରହିଛି ତାହା ବେଶ ଗୁରୁତ୍ୱପୂର୍ଣ୍ଣ ।
Kanak News is now on WhatsApp
Join and get latest news updates delivered to you via WhatsApp
ହାର୍ଦ୍ଦିକ ପାଣ୍ଡ୍ୟାଙ୍କୁ ମୁମ୍ବାଇ ଟ୍ରେଡ କରି ନିଜ ଦଳରେ ସାମିଲ କରିବା ପରେ ଗୁଜୁରାଟ ଟାଇଟନ୍ସ ପାଖରେ ସର୍ବାଧିକ ୩୮.୧୫ କୋଟି ବଳକା ରହିଛି । ଗୁଜୁରାଟ ଟାଇଟନ୍ସରେ ହାର୍ଦ୍ଦିକଙ୍କୁ ୧୫ କୋଟି ମିଳୁଥିଲା । ଏହାଛଡା ଆସନ୍ତା ନିଲାମୀରେ ଗୁଜୁରାଟ ପାଖରେ ୯ ଜଣ ଖେଳାଳୀଙ୍କୁ ନିଜ ଦଳରେ ସାମିଲ କରିବାର ସୁଯୋଗ ରହିଛି । ଏହି ୯ ଜଣଙ୍କ ମଧ୍ୟରୁ ୨ ଜଣ ବିଦେଶୀ ଖେଳାଳୀଙ୍କ ପାଇଁ ସ୍ଲଟ୍ ଫାଙ୍କା ରହିଛି ।
ସେହିଭଳି ଗତବର୍ଷର ଆଇପିଏଲ ଚାମ୍ପିୟନ ଚେନ୍ନାଇ ସୁପର କିଙ୍ଗସ ପାଖରେ ୩୧.୪ କୋଟି ବଳକା ରହିଛି । ଚେନ୍ନାଇ ଚଳିତ ବର୍ଷ ବେନ ଷ୍ଟୋକ୍ସଙ୍କ ଭଳି ଷ୍ଟାର କ୍ରିକେଟରଙ୍କୁ ରିଲିଜ କରିଛି । ଏବେ ଚେନ୍ନାଇ ଟିମରେ ୬ ଜଣ ଖେଳାଳୀଙ୍କ ପାଇଁ ସ୍ଲଟ ବାକି ରହିଛି, ଯେଉଁଥିରେ ୩ ଜଣ ବିଦେଶୀ ଖେଳାଳୀଙ୍କୁ ନେଇପାରିବ ଧୋନୀଙ୍କ ଟିମ୍ । ଦିଲ୍ଲୀ କ୍ୟାପିଟାଲ୍ସ ପର୍ସରେ ୨୮.୯୫ କୋଟି ଟଙ୍କା ରହିଛି । ଦିଲ୍ଲୀ ଟିମରେ ୯ଟି ସ୍ଲଟ ଫାଙ୍କା ଥିବା ବେଳେ ୪ ଜଣ ବିଦେଶୀ ଖେଳାଳୀଙ୍କୁ ନେଇପାରିବ ଦଳ ।
ନିଲାମୀ ପୂର୍ବରୁ ଟ୍ରେଡରେ ଦୁଇ ଜଣ ଖେଳାଳୀଙ୍କୁ ଦଳରେ ସାମିଲ କରିଛି ଆରସିବି । ମୁମ୍ବାଇର କ୍ୟାମେରନ ଗ୍ରୀନଙ୍କୁ ୧୭.୫୦ କୋଟି ଟଙ୍କାରେ ଟ୍ରେଡ୍ କରିଛି ଆରସିବି । ସେହିଭଳି ହସରଙ୍ଗା, ହାଜେଲଉଡ, ହର୍ଷଲ ପଟେଲଙ୍କ ଭଳି ଖେଳାଳୀଙ୍କୁ ରିଲିଜ ମଧ୍ୟ କରିଛି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର । ନିଲାମୀ ପୂର୍ବରୁ ଆରସିବି ପର୍ସରେ ୨୩.୨୫ କୋଟି ଟଙ୍କା ଥିବା ବେଳେ ଦଳରେ ୬ ଜଣ ଖେଳାଳୀଙ୍କ ପାଇଁ ସ୍ଲଟ ଫାଙ୍କା ରହିଛି । ଯେଉଁଥିରୁ ୩ ଜଣ ବିଦେଶୀ ଖେଳାଳୀଙ୍କୁ ସାମିଲ କରିପାରିବ ଦଳ । ଖାସକରି ଅଧିକ ବୋଲରଙ୍କୁ ଦଳ ରିଲିଜ କରିଥିବା ବେଳେ ନିଲାମୀରେ ବୋଲରଙ୍କ ଉପରେ ଅଧିକ ଫୋକସ କରିବ ଆରସିବି ।
ହାର୍ଦ୍ଦିକ ପାଣ୍ଡ୍ୟାଙ୍କୁ ମୁମ୍ବାଇ ଟ୍ରେଡ କରି ଦଳରେ ସାମିଲ କରିବା ପରେ ଦଳର ପର୍ସରେ ଏବେ ମାତ୍ର ୧୭.୭୫ କୋଟି ଟଙ୍କା ରହିଛି । କିନ୍ତୁ ଦଳରେ ଏବେ ବି ୮ଟି ସ୍ଲଟ ଫାଙ୍କା ରହିଛି । ୮ ସ୍ଲଟ ମଧ୍ୟରୁ ୪ଟି ସ୍ଲଟ ବିଦେଶୀ ଖେଳାଳୀଙ୍କ ପାଇଁ ରହିଛି । କେକେଆରର ପର୍ସରେ ୩୨ କୋଟି ରହିଥିବା ବେଳେ ସର୍ବାଧିକ ୧୨ଟି ସ୍ଲଟ ଫାଙ୍କା ରହିଛି । ଯେଉଁଥିରୁ ୪ଟି ସ୍ଲଟ ବିଦେଶୀ ଖେଳାଳୀଙ୍କ ପାଇଁ ରହିଛି । ବିଶ୍ୱକପ ବିଜୟୀ ଅଧିନାୟକ ପାଟ କମିନ୍ସଙ୍କୁ ଚଳିତଥର ନିଲାମୀରେ ପୁଣି କିଣିପାରେ ଦଳ । ଲକ୍ଷ୍ନୌ ପାଖରେ ୧୩.୧୫ କୋଟି ଟଙ୍କା ରହିଥିବା ବେଳେ ୬ଟି ସ୍ଲଟ ଫାଙ୍କା ରହିଛି । ଦଳ କୌଣସି ବଡ ଚେହେରାଙ୍କୁ ରିଲିଜ କରି ନଥିବାରୁ ନିଲାମୀରେ ନିର୍ଣ୍ଣାୟକ ଭୂମିକା ତୁଲାଇପାରେ ।
ନିଲାମୀକୁ ଯିବା ପୂର୍ବରୁ ପଞ୍ଜାବ କିଙ୍ଗସ ପର୍ସରେ ୨୯ କୋଟି ଥିବା ବେଳେ ଦଳରେ ମାତ୍ର ୮ଟି ସ୍ଲଟ ବାକି ରହିଛି । ନିଲାମିରେ ସର୍ବାଧିକ ୨ ଜଣ ବିଦେଶୀ ଖେଳାଳୀଙ୍କୁ ଦଳରେ ସାମିଲ କରିପାରିବ ପଞ୍ଜାବ । ତେଣୁ ବିଶ୍ୱକପରେ ଶ୍ରେଷ୍ଠ ପ୍ରଦର୍ଶନ କରିଥିବା ବଡ ଚେହେରାଙ୍କ ଉପରେ ପଞ୍ଜାବ ଫୋକସ କରିପାରେ । ରାଜସ୍ଥାନ ପାଖରେ ମାତ୍ର ୧୪.୫ କୋଟି ଥିବା ବେଳେ ଟିମରେ ସ୍ଲଟ ୮ଟି ବାକି ରହିଛି । ନିଲାମୀରେ ସର୍ବାଧିକ ୩ ଜଣ ବିଦେଶୀ ଖେଳାଳୀଙ୍କୁ ଦଳରେ ସାମିଲ କରିବାର ସୁଯୋଗ ରାଜସ୍ଥାନ ପାଖରେ ରହିଛି । ଦଳରେ ଷ୍ଟାର ଅଲରାଉଣ୍ଡରଙ୍କର ଅଭାବ ରହିଛି, ତେଣୁ ବେନ୍ ଷ୍ଟୋକ୍ସଙ୍କୁ ଦଳରେ ସାମିଲ କରିପାରେ ରାଜସ୍ଥାନ । ସନରାଇଜର୍ସ ହାଇଦ୍ରାବାଦ ପାଖରେ ୩୪ କୋଟି ଟଙ୍କା ଥିବା ବେଳେ ନିଲାମୀରେ ବଡ ଧରଣର ଓଲଟପାଲଟ କରିପାରେ ଦଳ । ଦଳରେ ଏବେ ୬ଟି ସ୍ଲଟ ବାକି ଥିବା ବେଳେ ସର୍ବାଧିକ ୩ ଜଣ ବିଦେଶୀ ଖେଳାଳୀଙ୍କୁ କିଣିପାରିବ ଦଳ । ସନରାଇଜର୍ସ ହାଇଦ୍ରାବାଦ ଯେହେତୁ ସେଭଳି କୌଣସି ବଡ ଚେହେରାଙ୍କୁ ରିଲିଜ୍ କରିନାହିଁ । ତେଣୁ ନିଲାମୀରେ ବେଶ ଫାଇଦାରେ ରହିବ ହାଇଦ୍ରାବାଦ ।