ହାତୀ ମୁତ୍ୟୁ ଭିତରେ ନନ୍ଦନକାନନରୁ ଆସିଲା ସାଂଘାତିକ୍ ଚିତ୍ର । ଦାରୁଠେଙ୍ଗ ଡମ୍ପିଂୟାର୍ଡ ଦେଇ କାଞ୍ଜିଆ ହ୍ରଦକୁ ଆସୁଥିବା କଳା ମଚ ମଚ ପାଣି ହାତୀ ମୃତ୍ୟୁର କାରଣ ନୁହେଁ ତ?
କନକ ବ୍ୟୁରୋ : ହରପିସ୍ ମାରୁଛି ହାତୀ । ଗୋଟିଏ ମାସ ଭିତରେ ନନ୍ଦନକାନନରେ ଗଲାଣି ୪ଟି ହାତୀର ଜୀବନ । ବଡ଼ କଥା ହେଉଛି ଏହା ପୂର୍ବରୁ ୩ଟି ନୀଳଗିରି ହନୁ, ବାଘୁଣୀ ପ୍ରିୟଙ୍କା, ବାରାସିଂହ, ଓରାଙ୍ଗଓଟାଙ୍ଗ, ସିଂମ୍ପାଜି, ଗଧିଆଙ୍କ ବିଭିନ୍ନ କାରଣରୁ ମୃତ୍ୟୁ ହୋଇଛି । ପ୍ରଶ୍ନ ହେଉଛି, ନନ୍ଦନକାନନ ପ୍ରାଣୀ ଉଦ୍ୟାନର ଜୀବଜନ୍ତୁ ଭୂତାଣୁରେ ଆକ୍ରାନ୍ତ ହେଉଛନ୍ତି କେମିତି? ଦୂଷିତ ଜଳ ଏହି ଭୂତାଣୁର କାରଣ କି? ଏହି ତମାମ୍ ପ୍ରଶ୍ନର ଉତର ଖୋଜିବାକୁ ଉଦ୍ୟମ କରିଛି କନକ ନ୍ୟୁଜ୍ ଟିମ୍ ।
Kanak News is now on WhatsApp
Join and get latest news updates delivered to you via WhatsApp
ନନ୍ଦନକାନନ ପ୍ରାଣୀ ଉଦ୍ୟାନ ସଂପୂର୍ଣ୍ଣ ନିର୍ଭରଶୀଳ ଥିବା କାଞ୍ଜିଆ ଦ୍ରହକୁ ପାଣି ଆସୁଛି କେମିତି? ସବୁଦିନିଆ ଜଳସ୍ରୋତ, ଦାରୁଠେଙ୍ଗ-ଭୁଆଶୁଣୀ ଡମ୍ପିଂୟାର୍ଡରୁ ବଡ଼ବନ୍ଧ, ବଡ଼ବନ୍ଧରୁ ଯୁଝଗଡ଼ସଙ୍ଖ, ଯୁଝଗଡ଼ସଙ୍ଖରୁ ଫିଡର ଫାର୍ମ ଦେଇ କାଞ୍ଜିଆ ହ୍ରଦରେ ପହଂଚୁଛି ପାଣି । ତେବେ ଏହି ପାଣିକୁ ନନ୍ଦନକାନନରେ ଥିବା ପଶୁପକ୍ଷୀଙ୍କ ପାଇଁ ବ୍ୟବହାର କରାଯାଇଛି । କିନ୍ତୁ ବଡ କଥା ହେଲା ଏ ପାଣି ଏତେ ସ୍ୱଚ୍ଛ ନୁହେଁ ଯେ ଏହାକୁ ପଶୁପକ୍ଷୀଙ୍କ ପାଇଁ ବ୍ୟବହାର କରାଯାଇପାରିବ । କାରଣ ଦାରୁଠେଙ୍ଗ-ଭୁଆଶୁଣୀ ଡମ୍ପିଂୟାର୍ଡରେ ଗଦା ହୋଇଥିବା କୁଢ କୁଢ ଆବର୍ଜନା ଉପରେ ବର୍ଷା ପଡିବା ପରେ କଳା ମଚମଚ ପ୍ରଦୂଷିତ ପାଣି ଝରି ଆସି କାଞ୍ଜିଆ ହ୍ରଦରେ ମିଶିଥାଏ । ଆଉ ଏହି ପ୍ରଦୂଷିତ ତେଲିଆ ପାଣି ନନ୍ଦନକାନନର ପଶୁପକ୍ଷୀଙ୍କ ପାଇଁ ବ୍ୟବହାର କରାଯାଇଥାଏ ।
ଆଉ ଆଜି ଯେତେବେଳେ ମାସେ ଭିତରେ ୪ଟି ହାତୀଙ୍କ ମୃତ୍ୟୁ ହୋଇଛି, ସ୍ୱାଭାବିକ ଭାବରେ ନନ୍ଦନକାନନର ମୁଖ୍ୟଜଳସ୍ରୋତକୁ ନେଇ ପ୍ରଶ୍ନ ଉଠିଛି । ଏପରିକି ଏହି ପ୍ରଦୂଷିତ ପାଣି ପାଇଁ ନନ୍ଦନକାନନ ଜୀବଜନ୍ତୁଙ୍କର ମୃତ୍ୟୁ ହେଉଛି ବୋଲି ସ୍ଥାନୀୟ ଲୋକ ଅଭିଯୋଗ କରିଛନ୍ତି । ଏହି ଡମ୍ପିଂୟାର୍ଡରୁ ମାତ୍ର ୫ଶହ ମିଟର ଭିତରେ ଆସୁଛି ଚନ୍ଦକା ଅଭୟାରଣ୍ୟ, ଆଉ ମାତ୍ର ଗୋଟିଏ କିଲୋମିଟର ଭିତରେ ଅଛି ନନ୍ଦନକାନନ । ଏପଟେ ନନ୍ଦନକାନନ କର୍ତୃପକ୍ଷ କହୁଛନ୍ତି ଜୀବଜନ୍ତୁଙ୍କୁ ହ୍ରଦର ପାଣିକୁ ବିଶୋଧନ କରି ଦିଆଯାଉଛି । ତେବେ ପ୍ରଶ୍ନ ଉଠୁଛି ଏହି ହ୍ରଦର ପାଣି ଜୀବଜନ୍ତୁଙ୍କ ପାଇଁ କେତେ ଉପଯୋଗୀ ଓ ସୁରକ୍ଷିତ ।
ନନ୍ଦନକାନନରେ ୪ଟି ହାତୀ ହରପିସ ଭୁତାଣୁ ସଂକ୍ରମଣରେ ପ୍ରାଣ ହରାଇଥିବା ବେଳେ ଏବେ ଏହି ଭୁତାଣୁ ନନ୍ଦନକାନନ ବାହାରକୁ ବ୍ୟାପିଥିବାର ଆଶଙ୍କା କରାଯାଉଛି । ଚନ୍ଦକା ଡ଼ମପଡ଼ା ଅଭୟାରଣ୍ୟ ବାଆଁରା ଠାରେ ଏକ ମାଇ ହାତୀ ଗୁରତର ହୋଇଥିବା ଜଣାପଡ଼ିଛି । ପିସିସିଏଫ ହରିଶଙ୍କର ଉପାଧ୍ୟାୟ, ସିଜେଡ୍ ସଦସ୍ୟ ସଂପାଦକ ଏସ୍ ପି ଯାଦବଙ୍କ ସହିତ ଓୟୁଏଟି ଓøଷଧ ବିଭାଗର ପ୍ରଫେସର ନିରଂଜନ ସାହୁ ପହଂଚି ହାତୀର ଚିକିତ୍ସା ଜାରି ରଖିଛନ୍ତି । ତେବେ ଏହି ହରପିସ ଭୂତାଣୁ ଡ଼ମପଡ଼ାକୁ ବ୍ୟାପିଥିବା ଅନୁମାନ କରାଯାଉଛି । ନନ୍ଦନକାନନ ପରେ ଏବେ ଅଭୟାରଣ୍ୟର ହାତୀ ସମ୍ପଦ ଉପରେ ଏହା ବିପଦ ସୃଷ୍ଟି କରିଛି । ହାତୀ ମୃତ୍ୟୁର ତଦନ୍ତ ଜାରି ରହିଥିବା ବେଳେ ଗତକାଲି କେନ୍ଦ୍ରୀୟ ଚିଡିଆଖାନା କତୃପକ୍ଷ ନନ୍ଦନକାନନରେ ପହଂଚି ଏହାର ଅନୁଧ୍ୟାନ କରିଛନ୍ତି ।