ମହାନଦୀରେ ୪ଟି ମୃତଦେହ । ପାଣି ଭିତରୁ ମିଳିଲା ମାଆ, ପୁଅ ଓ ଦୁଇ ଝିଅଙ୍କ ଶବ । ରହସ୍ୟ ଘେରରେ ମୃତ୍ୟୁର କାରଣ । ହତ୍ୟା ନା ଦାରିଦ୍ର୍ୟ ପାଇଁ ଆତ୍ମହତ୍ୟା?
କନକ ବ୍ୟୁରୋ: ପାରାଦୀପ କୁଜଙ୍ଗ ନିକଟ ମହାନଦୀରୁ ଆଜି ୪ ଜଣଙ୍କ ମୃତଦେହ ମିଳିଛି । ମୃତକ ମାନେ ସମସ୍ତେ ଗୋଟିଏ ପରିବାରର । ମାଆ, ଦୁଇ ଝିଅ ଓ ପୁଅ । ଦୁଇ ଝିଅଙ୍କ ବୟସ ୯ ବର୍ଷ ଓ ୫ ବର୍ଷ ହୋଇଥିବା ବେଳେ ପୁଅର ବୟସ ୪ ବର୍ଷ । କିଛି ଦିନ ତଳେ ଏକ ଦୁର୍ଘଟଣାରେ ବାପା, ପ୍ରାଣ ହରାଇଥିଲେ । ଦାରିଦ୍ର୍ୟ ଯୋଗୁଁ ପୁରା ପରିବାର ଆତ୍ମହତ୍ୟା କରିଥିବା କୁହାଯାଉଛି । ତେବେ ମୃତକଙ୍କ ଜଣେ ସମ୍ପର୍କୀୟ କହିଛନ୍ତି, ପୂର୍ବରୁ ସେମାନଙ୍କ ପରିବାରର ଜମିବିବାଦ ଥିଲା । ତେଣୁ ସେମାନଙ୍କୁ ହତ୍ୟା କରାଯାଇଥାଇପାରେ । ସେପଟେ ପୋଲିସ ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରାୟ ଦୁଇ ମାସ ତଳେ କୁଜଙ୍ଗ ଜଗନ୍ନାଥପୁରର ଏହି ପରିବାରର ମୁଖ୍ୟ ଅନନ୍ତ ସେଠୀଙ୍କ ଏକ ଦୁର୍ଘଟଣାରେ ମୃତ୍ୟୁ ହୋଇଥିଲା । ସ୍ଥାନୀୟ କାରଖାନାରେ ଶ୍ରମିକ ଭାବେ କାମ କରୁଥିଲେ ଅନନ୍ତ । ତାଙ୍କ ମୃତ୍ୟୁ ପରେ ଦାରିଦ୍ର୍ୟ ମଧ୍ୟରେ ଗତି କରୁଥିବା ଏହି ପରିବାର ସଂପୂର୍ଣ୍ଣଭାବେ ଭାଂଗି ପଡିଥିଲା । ସ୍ଥାନୀୟ ଲୋକଙ୍କ କହିବା କଥା, ଅତ୍ୟନ୍ତ ଗରିବ ହୋଇଥିବାରୁ ସ୍ୱାମୀଙ୍କ ମୃତ୍ୟୁ ପରେ ମାଆ, ପିଲାଙ୍କୁ ନେଇ ପାଣିକୁ ଡେଇଁ ଆତ୍ମହତ୍ୟା କରିଥାଇପାରନ୍ତି । ତେବେ ଏହା ଏକ ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି ସଂପର୍କୀୟ । ଏବଂ ଏଥିପାଇଁ ପରିବାରରେ ଲାଗି ରହିଥିବା ଜମିବାଡି ବିବାଦ ଦାୟୀ ବୋଲି ସେ କହିଛନ୍ତି ।
ତେବେ ଏକାସଙ୍ଗେ ଚାରି ଚାରିଟି ଜୀବନ ଚାଲିଯିବା ଘଟଣା ଯେତିକି ଆଶ୍ଚର୍ଯ୍ୟକର ସେତିକି ସନ୍ଦେହଜନକ ମଧ୍ୟ । ଏହି ଘଟଣା ଅନେକ ପ୍ରଶ୍ନ ସୃଷ୍ଟି କରୁଛି..
– କାହିଁକି ଆଉ କେଉଁ ପରିସ୍ଥିତିରେ ଘଟିଲା ଅଘଟଣ?
– ଦାରିଦ୍ର୍ୟ ପାଇଁ ଆତ୍ମହତ୍ୟା କରିଛନ୍ତି କି ପରିବାର?
– ନା, ଜମିବାଡି ପାଇଁ ପୂରା ପରିବାରକୁ ହତ୍ୟା କରାଯାଇଛି?