କନକ ବ୍ୟୁରୋ : ଦେଶର ରାଷ୍ଟ୍ରପତି ଦୌପଦୀ ମୁର୍ମୁ ରବିବାର ଦିନ ସୁପ୍ରିମକୋର୍ଟର ପୂର୍ବତନ ବିଚାରପତି ଅଜୟ ମାଣିକରାଓ ଖାନୱଲିକରଙ୍କୁ ଲୋକପାଳ ଅଧ୍ୟକ୍ଷ ଭାବେ ଶପଥ ପାଠ କରାଇଛନ୍ତି । ନ୍ୟାୟଧିଶ ଖାନୱଲିକରଙ୍କୁ ଚଳିତବର୍ଷ ଫେବୃଆରୀ ମାସ ଶେଷ ସପ୍ତାହରେ ଲୋକପାଳ ଅଧ୍ୟକ୍ଷ ଭାବେ ଚୟନ କରାଯାଇଥିଲା । ରବିବାର ଦିନ ରାଷ୍ଟ୍ରପତି ଦୌପଦୀ ମୁର୍ମୁ ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ସୂଚନା ଥାଉ କି, ଗତ ଦୁଇବର୍ଷ ହେବ ଲୋକପାଳ ଅଧ୍ୟକ୍ଷ ପଦ ଖାଲି ପଡିଥିଲା । ଗତବର୍ଷ ସେପ୍ଟେମ୍ବର ମାସରେ ଏହି ପଦ ପାଇଁ ଅନେକ ନାମ ଚର୍ଚ୍ଚାକୁ ଆସିଥିଲା । ହେଲେ ଶେଷରେ ଖାନୱଲିକରଙ୍କ ନାମ ଉପରେ ମୋହର ବାଜିଥିଲା ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
୨୦୨୨ ମେ’୨୭ ତାରିଖରେ ପିନାକୀ ଚନ୍ଦ୍ର ବୋଷଙ୍କ କାର୍ଯ୍ୟକାଳ ଶେଷ ହେବା ପରେ ଲୋକପାଳ ଅଧ୍ୟକ୍ଷ ପଦ ଖାଲିପଡିଥିଲା । ୨୦୨୨ ମେ’ ୨୭ ତାରିଖରୁ ଦେଶରେ ବିନା ଲୋକପାଳରେ କାର୍ଯ୍ୟ ଚାଲିଥିଲା । ଏବେ ଖାନୱାଲିକରଙ୍କୁ ଲୋକପାଳ ଅଧ୍ୟକ୍ଷ ପଦରେ ଅବସ୍ଥାପିତ କରାଯିବା ସହ ଗତମାସରେ ଜଷ୍ଟିସ ଋତୁରାଜ ଅବସ୍ଥି, ଜଷ୍ଟିସ ଲିଙ୍ଗାପ୍ପା ନାରାୟଣ ସ୍ୱାମୀ, ଜଷ୍ଟିସ ସଂଜୟ ଯାଦବଙ୍କୁ ଲୋକପାଳର ନ୍ୟାୟିକ ସଦସ୍ୟ ଭାବେ ନିଯୁକ୍ତ କରାଯାଇଛି ।
ଜଷ୍ଟିସ ଖାନୱଲିକର ୨୦୧୬ ମେ’୧୩ ତାରିଖରୁ ୨୦୨୨ ଜୁୁଲାଇ ୨୯ ତାରିଖ ପର୍ଯ୍ୟନ୍ତ ସୁପ୍ରିମକୋର୍ଟର ବିଚାରପତି ଭାବେ କାର୍ଯ୍ୟ କରୁଥିଲେ । ତାଙ୍କ ସେବାକାଳ ମଧ୍ୟରେ ସେ ଅନେକ ଗୁରୁତ୍ୱପୂର୍ଣ୍ଣ ମାମଲାରେ ରାୟ ଶୁଣାଇଛନ୍ତି । ଯାହା ମଧ୍ୟରେ ରହିଛି ପିଏମଏଲଏ, ବିଦେଶୀ ଯୋଗଦାନ, ଏହାସହ ସମଲିଙ୍ଗୀ ବିବାହ ଉପରେ ରାୟ ଶୁଣାଇ ସେ ଚର୍ଚ୍ଚାକୁ ଆସିଥିଲେ ।