କନକ ବ୍ୟୁରୋ : ଋଷର ପୂର୍ବତନ ରାଷ୍ଟ୍ରପତି ଦିମିତ୍ରୀ ମେଦବେଦେବ ଏବେ ଇସ୍ରାଏଲକୁ ଧମକ ଦେଇଛନ୍ତି । ଇସ୍ରାଏଲ ୟୁକ୍ରେନକୁ ଯୋଗାଉଥିବା ଯୁଦ୍ଧାସ୍ତ୍ରକୁ ନେଇ ସେ ଏଭଳି ଧମକ ଦେଇଛନ୍ତି । ଦିମିତ୍ରୀ କହିଛନ୍ତି କି ଯଦି ଇସ୍ରାଏଲ ପୁଣି ୟୁକ୍ରେନକୁ ଯୁଦ୍ଧାସ୍ତ୍ର ଯୋଗାଏ ତେବେ ଋଷ ସହ ଥିବା କୂୁଟନୈତିକ ସଂପର୍କ ଛିନ୍ନ କରାଯିବ । ସୂଚନା ଥାଉକି ଋଷର ପୂର୍ବତନ ରାଷ୍ଟ୍ରପତି ଦିମିତ୍ରୀ ମେଦବେଦେବ ବର୍ତମାନ ଋଷ ସୁରକ୍ଷା ପରିଷଦର ଡେପୁଟି ଚେୟାରମ୍ୟାନ ସହ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମୁଖ୍ୟ ପରାମର୍ଶଦାତା ପଦରେ ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଋଷର ପୂର୍ବତନ ରାଷ୍ଟ୍ରପତି ଦିମିତ୍ରୀ ମେଦବେଦେବ ଟେଲିଗ୍ରାମ ଆପରେ ଲେଖିଛନ୍ତି କି, ‘ଏମିତି ଶୁଣାଯାଉଛି କି, ଇସ୍ରାଏଲ ତରଫରୁ ୟୁକ୍ରେନକୁ ଯୁଦ୍ଧାସ୍ତ୍ର ଯୋଗାଇ ଦିଆଯାଉଛି । ଏହା ଏକ ଦାୟିତ୍ୱହୀନ ପଦକ୍ଷେପ’ ଏହା ସତ୍ୟ ହୋଇଥିଲେ ଖୁବଶୀଘ୍ର ଋଷ ଓ ଇସ୍ରାଏଲ ମଧ୍ୟରେ ଥିବା ସମସ୍ତ ସଂପର୍କ ଶେଷ କରିଦିଆଯିବ ।
କିଛିଦିନ ପୂର୍ବରୁ ଇସ୍ରାଏଲର ଜଣେ ମନ୍ତ୍ରୀ ନାଚମନ୍ ସାଇ କହିଥିଲେ କି ଇସ୍ରାଏଲ ତରଫରୁ ୟୁକ୍ରେନକୁ ସୈନ୍ୟ ସହାୟତା ଯୋଗାଇ ଦିଆଯିବ । ନାଚମନଙ୍କର ଏହି ବୟାନ ଆଧାରରେ ଦିମିତ୍ରୀ ମେଦବେଦେବ ଏଭଳି କଥା କହିଛନ୍ତି । ପୂର୍ବ ସପ୍ତାହରେ ଏକ ଇଂରାଜୀ ଖବର କାଗଜ ନ୍ୟୁୟର୍କସ୍ ଟାଇମ ମୁତାବକ ଇସ୍ରାଏଲର ଏକ ଘରୋଇ ସୁରକ୍ଷା ଫାର୍ମ ୟୁକ୍ରେନକୁ ଯୁଦ୍ଧରେ ସହାୟତା କରୁଥିଲା ।
ଏସବୁ ଭିତରେ ୟୁକ୍ରେନ ରାଷ୍ଟ୍ରପତି ଜେଲେନସ୍କି କହିଛନ୍ତି କି, ଇସ୍ରାଏଲ ତରଫରୁ ୟୁକ୍ରେନକୁ କୌଣସି ସହାୟତା ମିଳିନାହିଁ । ହେଲେ ଆମ ଭଳି ଇସ୍ରାଏଲ ବି ଏବେ ନିଜ ମାଟିକୁ ରକ୍ଷା କରିବାକୁ ପ୍ରସ୍ତୁତ ହେବାର ସମୟ ଆସିଯାଇଛି ।