ଘାସ ଖାଇଦେବି, କିନ୍ତୁ ସେନାର ବଜେଟ ବଢାଇବି । ପାକିସ୍ତାନ ସେନାକୁ ନେଇ ରାୱଲପିଣ୍ଡି ଏକ୍ସପ୍ରେସ ଦେଲେ ବଡ ବୟାନ ।
ଘାସ ଖାଇଦେବି, କିନ୍ତୁ ସେନାର ବଜେଟ ବଢାଇବି । ପାକିସ୍ତାନରୁ ଆସିଛି ଏଭଳି ଏକ ବୟାନ । ତାହା ବି ପୁଣି ରାୱଲପିଣ୍ଡି ଏକ୍ସପ୍ରେସଙ୍କ ମୁହଁରୁ । ପାକିସ୍ତାନ ସେନା ଉପରେ ଏଭଳି ଏକ ବୟାନ ଦେଇ ଚର୍ଚ୍ଚାକୁ ଆସିଛନ୍ତି ପାକିସ୍ତାନର ପୂର୍ବତନ କ୍ରିକେଟର ସୋଏବ ଅଖତର । ପାକିସ୍ତାନର ଏକ ଗଣମାଧ୍ୟମକୁ ସାକ୍ଷାତକାର ଦେଇ ଅଖତର କହିଛନ୍ତି, ମୁଁ ଘାସ ଖାଇବାକୁ ପ୍ରସ୍ତୁତ କିନ୍ତୁ ସେନାର ବଜେଟ ବଢିବା ଆବଶ୍ୟକ ।
Kanak News is now on WhatsApp
Join and get latest news updates delivered to you via WhatsApp
୪୪ ବର୍ଷୀୟ ଅଖତର ପାକିସ୍ତାନୀ ନ୍ୟୁଜ ଚ୍ୟାନେଲ ଏଆରୱାଇକୁ ଦେଇଥିବା ସାକ୍ଷାତକାରରେ କହିଛନ୍ତି, ଯଦି ଆଲ୍ଲା କେବେ ଅଧିକାର ଦିଅନ୍ତି ତେବେ ମୁଁ ଘାସ ଖାଇଦେବି, ଆଉ ଏହା ବଦଳରେ ସେନାର ବଜେଟ ବଢାଇବି । ଏହାସହ ଅଖତର କହିଛନ୍ତି ଯଦି ମୋତେ ଅଧିକାର ମିଳେ, ତେବେ ସେନାମୁଖ୍ୟଙ୍କ ସହ ବସି ଆଲୋଚନା କରିବି । ଆଉ ଯଦି ସେନାର ବଜେଟ ୨୦ ପ୍ରତିଶତ ଥିବ ତେବେ ତାହାକୁ ୬୦ ପ୍ରତିଶତ କରିଦେବି । ଏହାଛଡା ସେନା କାହିଁକି ସାଧାରଣ ଲୋକଙ୍କ ସହ ମିଳିମିଶି କାମ କରିପାରିବ ନାହିଁ ବୋଲି ପ୍ରଶ୍ନ ଉଠାଇଛନ୍ତି ସୋଏବ । ଯଦି ଆମେ ପରସ୍ପରକୁ ଅପମାନିତ କରୁଥିବା ତେବେ କ୍ଷତି ଆମର ହିଁ ହେବ ।
ଏହାପୂର୍ବରୁ ଦେଶ ପାଇଁ ଗୁଳି ଖାଇବାକୁ ପ୍ରସ୍ତୁତ ଅଛି ବୋଲି କହି ଚର୍ଚ୍ଚାକୁ ଆସିଥିଲେ ସୋଏବ । ଏପରିକି କାର୍ଗିଲ ଯୁଦ୍ଧ ଲଢିବା ପାଇଁ କାଉଣ୍ଟିଂ କ୍ରିକେଟ ଖେଳିନଥିଲି ଓ ଲକ୍ଷାଧିକ ଟଙ୍କା ଛାଡି ଦେଇଥିଲି ବୋଲି ପୂର୍ବରୁ କହିଛନ୍ତି ସୋଏବ । ପାକିସ୍ତାନର ଏହି ପୂର୍ବତନ କ୍ରିକେଟର ଅନେକ ଥର ଭାରତୀୟ କ୍ରିକେଟ ବୋର୍ଡ ତଥା ଖେଳାଳିଙ୍କୁ ଟାର୍ଗେଟ କରିଛନ୍ତି । ଏପରିକି ଅଷ୍ଟ୍ରେଲିଆରେ ହେବାକୁ ଥିବା ଟି-୨୦ ବିଶ୍ୱକପ ବାତିଲ ପଛରେ ବିସିସିଆଇର ହାତ ଥିବା ପରୋକ୍ଷରେ କହିଥିଲେ ସୋଏବ । ପଡିଆରେ ମଧ୍ୟ ଭାରତୀୟ କ୍ରିକେଟରଙ୍କ ସହ ଅନେକଥର ମୁହାଁମୁହିଁ ହୋଇଛନ୍ତି ସୋଏବ ।
ଗୋଟିଏ ପଟେ ବିଭିନ୍ନ ସମୟରେ ଭାରତୀୟ ଖେଳାଳିଙ୍କ ଉପରେ ବିବାଦୀୟ ମନ୍ତବ୍ୟ ଦେଊଥିବା ସୋଏବ କରୋନା ମହାମାରୀର ମୁକାବିଲା ପାଇଁ ଫଣ୍ଡ ଯୋଗାଡ କରିବାକୁ ଭାରତ-ପାକିସ୍ତାନ ମଧ୍ୟରେ କ୍ରିକେଟ ସିରିଜ କରିବାକୁ ପ୍ରସ୍ତାବ ଦେଇଥିଲେ । ଆଉ ଏହାକୁ ପାକିସ୍ତାନର ପୂର୍ବତନ ଅଧିନାୟକ ସାହିଦ ଆଫ୍ରିଦ ମଧ୍ୟ ସମର୍ଥନ କରିଥିଲେ । ତେବେ ଅଖତରଙ୍କ ଏହି ପ୍ରସ୍ତାବକୁ ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ କପିଲ ଦେବଙ୍କ ସମେତ ଅନ୍ୟ କିଛି ଖେଳାଳି ଖାରିଜ କରିଥିଲେ । ଏଠାରେ ସୂଚନାଯୋଗ୍ୟ ଯେ, ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣ ପରଠାରୁ ପାକିସ୍ତାନ ସହ କୌଣସି ଦ୍ୱିପାକ୍ଷିକ ସିରିଜ ଖେଳୁନାହିଁ ଭାରତ । ଏପରିକି ଇଣ୍ଡିଆନ ପ୍ରିମିୟର ଲିଗ୍ ବା ଆଇପିଏଲରେ ମଧ୍ୟ ପାକିସ୍ତାନ ଖେଳାଳିଙ୍କୁ ସାମିଲ କରାଯାଉନାହିଁ ।