ପୂର୍ବତନ ମନ୍ତ୍ରୀ ମହେଶ୍ୱର ମହାନ୍ତି ଗୁରୁତର: ଆଇସିୟୁରେ ଚାଲିଛି ଚିକିତ୍ସା

କନକ ବ୍ୟୁରୋ: ପୂର୍ବତନ ବାଚସ୍ପତି ମହେଶ୍ୱର ମହାନ୍ତି ଅସୁସ୍ଥ ହୋଇପଡିଛନ୍ତି । ତାଙ୍କ ଅବସ୍ଥା ଗୁରୁତର ରହିଛି । ଭୁବନେଶ୍ୱରର ଏକ ଘରୋଇ ହସପିଟାଲର ଆଇସିୟୁରେ ତାଙ୍କର ଚିକିତ୍ସା ଚାଲିଛି । ସନ୍ଧ୍ୟାରେ ଜାରି ହୋଇଥିବା ହେଲଥ ବୁଲେଟିନରେ କୁହାଯାଇଛି , ମହେଶ୍ୱରଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ଥିଲେ ବି ସ୍ଥିର ରହିଛି ।

ମଙ୍ଗଳବାର ସନ୍ଧ୍ୟାରେ ପୁରୀ ବଡଶଙ୍ଖ ଗଜଲକ୍ଷ୍ମୀ ପୂଜାର ସାଂସ୍କୃତିକ କାର୍ଯ୍ୟକ୍ରମରେ ପୂର୍ବତନ ବାଚସ୍ପତି ମହେଶ୍ୱର ମହାନ୍ତି ଯୋଗ ଦେଇଥିଲେ । ସେହି ଦିନ ରାତିରେ ସେ ବହୁତ ସକ୍ରିୟ ଥିଲେ । ସମସ୍ତଙ୍କ ସହ କଥାବାର୍ତା ବି କରୁଥିଲେ । କିନ୍ତୁ ଘରକୁ ଫେରିବା ପରେ ଅସୁସ୍ଥ ଅନୁଭବ କରିଥିଲେ ।

ଗୁରୁତର ଅବସ୍ଥାରେ ମହେଶ୍ୱର ମହାନ୍ତି ଭୁବନେଶ୍ୱରର ଏକ ଘରୋଇ ହସପିଟାଲରେ ଚିକିତ୍ସାଧୀନ ଅଛନ୍ତି । ବୁଧବାରଠାରୁ ଆଇସିୟୁରେ ତାଙ୍କର ଚାଲିଛି ଚିକିତ୍ସା । ଏ ନେଇ ସଂପୃକ୍ତ ହସପିଟାଲ ପକ୍ଷରୁ ଏକ ହେଲଥ ବୁଲେଟିନ ଜାରି କରାଯାଇଛି । ଏଥିରେ କୁହାଯାଇଛି, ମହେଶ୍ୱର ମହାନ୍ତିଙ୍କ ଅବସ୍ଥା ଏବେ ଗୁରୁତର ରହିଛି । ପ୍ରଥମେ ତାଙ୍କୁ ସ୍ନାୟୁ ରୋଗ ବିଭାଗରେ ଭର୍ତି କରାଯାଇଥିଲା । ପରେ ଆଇସିୟୁରେ ଭର୍ତି କରାଯାଇଛି । ଡାକ୍ତରୀ ଟିମ୍ ତାଙ୍କ ସ୍ୱାସ୍ଥ୍ୟବସ୍ଥା ଉପରେ ସ୍ୱତନ୍ତ୍ର ନଜର ରଖିଛନ୍ତି । ମହେଶ୍ୱର ମହାନ୍ତିଙ୍କ ପୁଅ କହିଛନ୍ତି, ଜଗନ୍ନାଥଙ୍କ ଆଶୀର୍ବାଦ ରହିଛି । ଲୋକଙ୍କ ଭଲ ପାଇବା ରହିଛି । ବାପାଙ୍କ ଦେହ ଭଲ ହୋଇଯିବ ।

ମହେଶ୍ୱର ମହାନ୍ତି ହେଉଛନ୍ତି ପୁରୀର ବେଶ ଲୋକପ୍ରିୟ ଓ ଅପ୍ରତିଦ୍ୱନ୍ଦୀ ନେତା । ପୁରୀ ବିଧାନସଭା ଆସନରୁ ସେ ୫-୫ ଥର ବିଧାୟକ ହୋଇଛନ୍ତି । ଏବେ ସେ ପୁରୀ ଜିଲ୍ଲା ବିଜେଡିର ସଭାପତି ଅଛନ୍ତି । ଅସୁସ୍ଥ ଥିବା ଖବର ମିଳିବା ପରେ ମହେଶ୍ୱର ମହାନ୍ତିଙ୍କୁ ଦେଖିବା ପାଇଁ ହସପିଟାଲରେ ପଂହଚିଥିଲେ ବିଜେଡି ନେତା । ଖୁବଶୀଘ୍ର ମହେଶ୍ୱର ସୁସ୍ଥ ହୋଇଯିବେ ବୋଲି ସମସ୍ତେ ଆଶା ପ୍ରକାଶ କରିଛନ୍ତି । ମହେଶ୍ୱର ମହାନ୍ତିଙ୍କ ସ୍ୱାସ୍ଥ୍ୟବସ୍ଥା ଉପରେ ମେଡିକାଲର ଡାକ୍ତରୀ ଟିମ ନଜର ରଖିଛନ୍ତି । ତାଙ୍କୁ ଦେଖିବାକୁ ପଂହଚୁଛନ୍ତି ନେତା ଓ ସମର୍ଥକ ।