କନକ ବ୍ୟୁରୋ : ୧୯ ବର୍ଷରୁ କମ ଭାରତୀୟ କ୍ରିକେଟ ଟିମର ପୂର୍ବତନ ଅଧିନାୟକ ତଥା ସୌରାଷ୍ଟ୍ର ପକ୍ଷରୁ ରଣଜୀ ମ୍ୟାଚ୍ ଖେଳୁଥିବା ଉଦୀୟମାନ ଭାରତୀୟ କ୍ରିକେଟର ଅଭି ବରୁଟଙ୍କ ଅକାଳ ବିୟୋଗ ।  ମାତ୍ର ୨୯ ବର୍ଷ ବୟସରେ ହୃଦଘାତରେ ପ୍ରାଣ ହରାଇଛନ୍ତି ଅଭି ।  ଏନେଇ ଟୁଇଟ୍ କରି ସୂଚନା ଦେଇଛି ସୌରାଷ୍ଟ୍ର କ୍ରିକେଟ ସଂଘ ।

Advertisment

ଅଭି ବରୁଟ ପୂର୍ବରୁ ୧୯ ବର୍ଷରୁ କମ୍ ଭାରତୀୟ ବିଶ୍ୱକପ୍ ଦଳର ଅଧିନାୟକ ରହିଥିଲେ । ଗତ କିଛି ବର୍ଷ ହେବ ସୌରାଷ୍ଟ୍ର ପକ୍ଷରୁ ରଣଜୀ କ୍ରିକେଟ ଖେଳିଛନ୍ତି ଅଭି । ୨୦୧୯-୨୦ ବର୍ଷରେ ସୌରାଷ୍ଟ୍ର ରଣଜୀ ଚାମ୍ପିଅନ ଦଳର ସଦସ୍ୟ ଥିଲେ ଅଭି ବରୁଟ । ସେ ୩୮ଟି ପ୍ରଥମ ଶ୍ରେଣୀ ମ୍ୟାଚ, ୩୮ଟି ଲିଷ୍ଟ ଏ ମ୍ୟାଚ ଏବଂ ୨୦ଟି ଘରୋଇ ଟି ୨୦ ମ୍ୟାଚ ଖେଳିଛନ୍ତି । ଗତକାଲି ତାଙ୍କର ଏପରି ହଠାତ୍ ଅକାଳ ବିୟୋଗରେ ସୌରାଷ୍ଟ୍ର କ୍ରିକେଟ ଆସୋସିଏସନ ଗଭୀର ଶୋକ ପ୍ରକାଶ କରିଛି ।

ଡାହାଣ ହାତୀ ବ୍ୟାଟିଂ ସହ ଅଫ ସ୍ପିନ୍ ବୋଲିଂ କରୁଥିଲେ ଅଭି ବରୁଟ । ସେ ଜଣେ ୱିକେଟ କିପର ବ୍ୟାଟର ଥିଲେ । ପ୍ରଥମ ଶ୍ରେଣୀ କ୍ରିକେଟରେ ୧୫୪୭ ଏବଂ ଲିଷ୍ଟ ଏ କ୍ରିକେଟରେ ୧୦୩୦ ରନ୍ ଏବଂ ଟି ୨୦ କ୍ରିକେଟରେ ୭୧୭ ରନ୍ ସ୍କୋର କରିଛନ୍ତି ।  ସୌରାଷ୍ଟ୍ର ପକ୍ଷରୁ ୨୧ଟି ରଣଜୀ ମ୍ୟାଚ୍, ୧୭ଟି ଲିଷ୍ଟ ଏ ମ୍ୟାଚ ଏବଂ ୧୧ଟି ଘରୋଇ ଟି ୨୦ ମୁକାବିଲାରେ ପ୍ରତିନିଧିତ୍ୱ କରିଥିଲେ । ୨୦୨୧ ମସିହାରେ ସୟଦ ମୁସ୍ତକ ଅଲ୍ଲୀ ଟୁର୍ଣ୍ଣାମେଂଟରେ ଗୋଆ ବିପକ୍ଷରେ ୫୩ ବଲରୁ ୧୨୨ ରନର ଇନିଂସ ଖେଳି ସେ ସମସ୍ତଙ୍କ ଦୃଷ୍ଟି ଆକର୍ଷଣ କରିପାରିଥିଲେ । ୨୦୧୧ ରେ ସେ ୧୯ ବର୍ଷରୁ କମ୍ ଭାରତୀୟ ଦଳର ଅଧିନାୟକ ରହିଥିଲେ ।   ତାଙ୍କର ଏପରି ଅକାଳ ବିୟୋଗ କ୍ରିକେଟପ୍ରେମୀଙ୍କୁ ଶୋକରେ ବୁଡାଇ ଦେଇଛି ।