ନିଶାସକ୍ତ ଅବସ୍ଥାରେ ପଡୋଶୀଙ୍କ ସହ ମାରପିଟ କଲେ ପୂର୍ବ ଭାରତୀୟ କ୍ରିକେଟର ପ୍ରବୀଣ କୁମାର । ମୁହଁରେ ଲାଗିଲା ଗଭୀର ଆଘାତ, ଭାଙ୍ଗିଗଲା ପଡୋଶୀଙ୍କ ହାତ ଆଙ୍ଗୁଠି ।
ପୂର୍ବ ଭାରତୀୟ କ୍ରିକେଟର ପ୍ରବୀଣ କୁମାରଙ୍କ ନାଁରେ ସାଂଘାତିକ ଅଭିଯୋଗ । ପଡୋଶୀଙ୍କୁ ମାଡ ମାରି ଆହତ କରିଥିବା ନେଇ ଥାନାରେ ପ୍ରବୀଣଙ୍କ ନାଁରେ ଅଭିଯୋଗ ହୋଇଛି । ଉତ୍ତର ପ୍ରଦେଶର ମେରଟ ବାସିନ୍ଦା ଦୀପକ ଶର୍ମାଙ୍କ ଅଭିଯୋଗ ଅନୁଯାୟୀ, ପ୍ରବୀଣ ଗାଳିଗୁଲଜ କରିବା ସହ ରାସ୍ତା ଉପରେ ତାଙ୍କୁ ମାଡ ମାରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁଯାୟୀ, ଦୀପକ ଶର୍ମା ନିଜ ପୁଅକୁ ସ୍କୁଲ ବସରୁ ଆଣିବାକୁ ଯାଇଥିବା ବେଳେ ସେଠାରେ ପ୍ରବୀଣଙ୍କ ଗାଡି ମଧ୍ୟ ପହଞ୍ଚିଥିଲା । ତେବେ କିଛି ସମୟ ମଧ୍ୟରେ କୌଣସି କାରଣରୁ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ତେବେ ଗାଳିଗୁଲଜ ପର୍ଯ୍ୟନ୍ତ କଥା ଠିକ୍ ଥିଲା କିନ୍ତୁ ଯେତେବେଳେ ପ୍ରବୀଣ ତାଙ୍କ କୁନି ପୁଅକୁ ମଧ୍ୟ ଧକ୍କା ମାରିଲେ ସେତେବେଳେ ସହିବାର ସବୁ ସୀମା ଟପି ସାରିଥିଲା । ଆଉ ଏହାପରେ ଉଭୟଙ୍କ ମଧ୍ୟରେ ମାରପିଟ୍ ହୋଇଥିଲା । ତେବେ ଦୀପକଙ୍କ ବାପା ଏହାକୁ ବିରୋଧ କରିବାକୁ ପ୍ରବୀଣ ତାଙ୍କୁ ମଧ୍ୟ ମାଡ ମାରିବାକୁ ପଛାଇନଥିଲେ । ଏହି ମାରପିଟ୍ ସମୟରେ ଦୀପକଙ୍କ ହାତ ଆଙ୍ଗୁଠି ଭାଙ୍ଗି ଯାଇଥିବା ବେଳେ ପ୍ରବୀଣଙ୍କ ମୁହଁରେ ଟିକିଏ ଆଘାତ ଲାଗିଛି ।
ମାରପିଟ ପରେ ଦୀପକ ଥାନାରେ ପହଞ୍ଚି ପ୍ରବୀଣଙ୍କ ନାଁରେ ଅଭିଯୋଗ କରିଥିଲେ ମଧ୍ୟ ଏହାକୁ ଗୁରୁତର ସହ ନେଇନଥିଲେ । ବରଂ ଉପରୁ ଫୋନ୍ କଲ ଆସିଲେ ଅଭିଯୋଗ ରଖାଯିବ, କାରଣ ପ୍ରବୀଣ କୁମାର ଅର୍ନ୍ତଜାତୀୟ କ୍ରିକେଟର ବୋଲି ପୋଲିସ କହିଥିଲା । ଏହସହ ଦୀପକ କହିଛନ୍ତି, ପ୍ରବୀଣ କୁମାର ନିଶାସକ୍ତ ଅବସ୍ଥାରେ ମାରପିଟ୍ କରୁଥିଲେ । ଏହି ଅଭିଯୋଗ ପାଇବା ପରେ ଉଭୟଙ୍କୁ ମେଡିକାଲ ଯାଞ୍ଚ ପାଇଁ ପଠାଇ ଦିଆଯାଇଛି । ତେବେ ଏନେଇ କୌଣସି ପ୍ରତିକ୍ର୍ରିୟା ଦେବାକୁ ମନା କରିଛନ୍ତି ପ୍ରବୀଣ କୁମାର ।