ଜଗନ୍ନାଥଙ୍କ ଜମିକୁ ନିଜ ନାଁରେ କରି ନେଉଛନ୍ତି ମାଫିଆ : ସୁପ୍ରିମକୋର୍ଟ ଓ ମନ୍ଦିର ପ୍ରଶାସନର କାଗଜକୁ କରୁଛନ୍ତି ଜାଲିଆତି
ସତ ବାହାର କଲେ ସୋରୋ ତହସିଲଦାର; ପୁରୀରେ ମାମଲା
କନକ ବ୍ୟୁରୋ : ମହାପ୍ରଭୁ ଜଗନ୍ନାଥଙ୍କ ଜମିକୁ ଜାଲିଆତି କରି ନିଜ ନାଁରେ କରିନେବାକୁ କେମିତି ଉଦ୍ୟମ ଚାଲିଛି ସେ ନେଇ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି । ସବୁଠୁ ବଡ କଥା ହେଲା ଜମି ହାତେଇବା ପାଇଁ ଏହି ଦଲାଲ ମାନେ ଶ୍ରୀମନ୍ଦିର ପ୍ରଶାସନର ନକଲି ଦସ୍ତାବିଜ ଏବଂ ସୁପ୍ରିମକୋର୍ଟର ରାୟକୁ ମଧ୍ୟ ଜାଲ କରିଛନ୍ତି । ହେଲେ ଏନେଇ ସୋର ତହସିଲଦାରଙ୍କ ସନ୍ଦେହ ବଢିବା ପରେ ଏହି କେଳେଙ୍କାରୀର ଗୁମର ଖୋଲିଛି । ଯାହାକୁ ନେଇ ସିଂହଦ୍ୱାର ଥାନାରେ ଏତଲା ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ବାଲେଶ୍ବର ଜିଲ୍ଲା ସୋର ତହସିଲ ଅଧୀନରେ ମହାପ୍ରଭୁଙ୍କ ନାମରେ ରହିଥିବା କେତେକ ଜମିର ରେକର୍ଡ ସଂଶୋଧନ ପାଇଁ ୨୦୨୦ ସେପ୍ଟେମ୍ବର ୧ରେ ଚିଠି ନଂ-୧୦୫୩୨, ୨୦୨୧ ଜାନୁଆରି ୫ରେ ଚିଠି ନଂ-୧୩୬ ଓ ୨୦୨୧ ଜାନୁଆରି ୧୭ରେ ଚିଠି ନଂ-୧୫୦୦ରେ ଶ୍ରୀମନ୍ଦିର କାର୍ଯ୍ୟାଳୟରୁ ସୋର ତହସିଲଦାରଙ୍କୁ ଚିଠି କରାଯାଇଥିଲା । ଯାହାର ନକଲ ବାଲେଶ୍ବର ଜିଲ୍ଲାପାଳ, ଉପଜିଲ୍ଲାପାଳଙ୍କୁ ବି ପ୍ରଦାନ କରାଯାଇଥିବା ଚିଠିରେ ଉଲ୍ଲେଖ ରହିଛି । ଯେଉଁଥିରେ ସ୍ପଷ୍ଟ ଉଲ୍ଲେଖ ରହିଛି କି ସୋର ତହସିଲ ଅଧୀନ ରାଇପୁର, କମାଣପୁର, ଶିରାପୁର ଓ ବ୍ରହ୍ମପୁର ମୌଜାର ରେକର୍ଡ ସଂଶୋଧନ କରି ଶ୍ରୀଜଗନ୍ନାଥ ମହାପ୍ରଭୁ ବିଜେ ପୁରୀଙ୍କ ନାମରେ ଥିବା ଜମିକୁ ଦଖଲରେ ଥିବା ପ୍ରଜାଙ୍କ ନାମରେ ସ୍ଥିତିବାନ ସ୍ବତ୍ତ୍ବରେ ରେକର୍ଡ କରାଯାଇଛି । ସୁପ୍ରିମକୋର୍ଟଙ୍କ ଆଦେଶ ଓ ପରିଚାଳନା କମିଟି ନିଷ୍ପତ୍ତିକ୍ରମେ ଏହି ସଂଶୋଧନ କରାଯାଇଛି । ଏଣୁ ମହାପ୍ରଭୁଙ୍କ ଏହି ଜମିର ଖାତା ଓ ପ୍ଲଟଗୁଡ଼ିକୁ ସଂଶୋଧନ କରି ତଫସିଲଭୁକ୍ତ ପ୍ରଜାଙ୍କ ନାମରେ ସ୍ଥିତିବାନ ସୂତ୍ରରେ ରେକର୍ଡ ସଂଶୋଧନ କରିବାକୁ ଚିଠି ମାଧ୍ୟମରେ କୁହାଯାଇଛି ।
ବାରମ୍ବାର ଏଭଳି ଚିଠି ପରେ ବି ତହସିଲ ପକ୍ଷରୁ କିଛି କାର୍ଯ୍ୟାନୁଷ୍ଠାନ ନ ହେବାରୁ ସଂପୃକ୍ତ ଅଭିଯୁକ୍ତମାନେ ପୁଣି ଚିଠି ସହ ସୋର ତହସିଲଦାରଙ୍କୁ ଭେଟି ଅଭିଯୋଗ ଜଣାଇଥିଲେ । ତାହା ସନ୍ଦେହ ବଢ଼ାଇଥିଲା । ଏଣୁ ଗତ ୧୬ ତାରିଖରେ ସୋର ତହସିଲଦାର ଏ ସଂପର୍କରେ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟକୁ ଯୋଗାଯୋଗ କରିଥିଲେ । ଶ୍ରୀମନ୍ଦିର କାର୍ଯ୍ୟାଳୟ ପକ୍ଷରୁ ଆସିଥିବା ଚିଠି ସତ କି ମିଛ ଜାଣିବାକୁ ଚେଷ୍ଟା କରିଥିଲେ। ଖୋଳତାଡ଼ ପରେ ଏହି ଚିଠି ସବୁ ନକଲି ବୋଲି ଜଣାପଡ଼ିଥିଲା । ସଂପୃକ୍ତ ବ୍ୟକ୍ତିମାନେ ଶ୍ରୀମନ୍ଦିର କାର୍ଯ୍ୟାଳୟ ପ୍ୟାଡ୍ର ନକଲ କରି ଏଥିରେ ନକଲି ଚିଠି ନମ୍ବର ପକାଇଥିବା ଜଣାପଡ଼ିଥିଲା ।
ଶ୍ରୀମନ୍ଦିର କାର୍ଯ୍ୟାଳୟରୁ ଅଦ୍ୟାବଧି ୯୩୬୦ଟି ଚିଠି ବିଭିନ୍ନ କାର୍ଯ୍ୟାଳୟ, ନିଯୋଗ ଓ ଅନ୍ୟମାନଙ୍କୁ କରାଯାଇଥିବାବେଳେ ୨୦୨୦ରେ ପ୍ରେରିତ ଚିଠିର ନମ୍ବର ୧୦୫୩୨ ରହିଥିଲା। ଚିଠି ସବୁ ନକଲି ବୋଲି ଜଣାପଡ଼ିବା ପରେ ଶ୍ରୀମନ୍ଦିର କାର୍ଯ୍ୟାଳୟ ପକ୍ଷରୁ ବାଲେଶ୍ବର ଜିଲ୍ଲାପାଳ, ଉପଜିଲ୍ଲାପାଳ ଓ ସୋର ତହସିଲଦାରଙ୍କୁ ପୁନର୍ବାର ଆଉ ଏକ ଚିଠି କରାଯାଇଛି । ଉପରୋକ୍ତ ସମସ୍ତ ଚିଠି ଓ ମାନ୍ୟବର କୋର୍ଟଙ୍କ ଆଦେଶ ମିଛ ଏବଂ ଏହାକୁ ଗ୍ରହଣ ନ କରିବାକୁ କୁହାଯାଇଛି । ଏ ଦିଗରେ ଆବଶ୍ୟକ କାର୍ଯ୍ୟାନୁଷ୍ଠାନ ନେବାକୁ କୁହାଯାଇଛି ।