କନକ ବ୍ୟୁରୋ : ଶିମିଳିପାଳରେ ଶିକାରୀ ଗୁଳିରେ ୨ ଜଣ ଫରେଷ୍ଟରଙ୍କ ମୃତ୍ୟୁକୁ ନେଇ ବନ କର୍ମଚାରୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି । ରାଜ୍ୟ ସରକାର ଓ ବନ ବିଭାଗର ଅବହେଳା ପ୍ରତିବାଦରେ ଆଜି ଆନ୍ଦୋଳନକୁ ଓହ୍ଲାଇଛନ୍ତି । ୫ ଦଫା ଦାବି ନେଇ ଆନ୍ଦୋଳନ କରିବାକୁ ନିଷ୍ପତି ନେଇଛି ଅଣଗେଜେଟେଡ୍ ବନସେବା ସଂଘ । ୨୦୦୯ରେ ମୁଖ୍ୟମନ୍ତ୍ରୀ ଘୋଷଣା କରିଥିବା ସ୍ପେଶାଲ ଷ୍ଟ୍ରାଇକିଂ ଫୋର୍ସ ଗଠନ, ୱେଲଫେୟାର ଫଣ୍ଡ ଗଠନ, ସର୍କଲ ରିଅର୍ଗାନାଇଜେସନ ଗଠନ, ରେଞ୍ଜ ସେକ୍ସନ, ବିଟ୍ ରିଜନ ଗଠନ, ତେଲେଙ୍ଗାନା ସରକାର ଭଳି ଏକ୍ସ ଗ୍ରାସିଆ ପ୍ରଦାନ କରିବାକୁ ଦାବି ରଖିଛନ୍ତି ବନ କର୍ମଚାରୀ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସଂଘ ତରଫରୁ କୁହାଯାଇଛି ଯେ, ଯଦି ସେମାନଙ୍କର ୫ଟି ଦାବି ପୂରଣ ନହେବ, ସେମାନେ ସାମୂହିକ ଛୁଟିରେ ଯିବେ ଓ ଆନ୍ଦୋଳନକୁ ଓହ୍ଲାଇବେ । ଏଥିସହ ବନକର୍ମଚାରୀଙ୍କୁ ଅତ୍ୟାଧୁନିକ ଅସ୍ତ୍ରଶସ୍ତ୍ର ନଦେଲେ ସେମାନେ ଜଙ୍ଗଲ ଜଗିବେ ନାହିଁ ବୋଲି ଘୋଷଣା କରିଛନ୍ତି । ଆଜିଠାରୁ ଜୁଲାଇ ୮ ତାରିଖ ଯାଏଁ ସଂଘ ରାଜ୍ୟବ୍ୟାପୀ ପ୍ରତିବାଦ କରିବ । ବନ କର୍ମଚାରୀ ମାଟି ହାଁସଦା ଓ ବନରକ୍ଷୀ ବିମଳ ଜେନା ଶିକାରୀଙ୍କ ଗୁଳିରେ ପ୍ରାଣ ହରାଇଛନ୍ତି । ଜଙ୍ଗଲ ସୁରକ୍ଷା ପାଇଁ କେନ୍ଦ୍ର ସରକାର କାମ୍ପା ଫଣ୍ଡରେ ଯଥେଷ୍ଟ ଅର୍ଥ ରାଜ୍ୟ ପାଉଥିବା ବେଳେ ତାହା ଜଙ୍ଗଲ ସୁରକ୍ଷାରେ କାହିଁକି ଖର୍ଚ୍ଚ ହେଉନାହିଁ ପ୍ରଶ୍ନ ଉଠାଇଛନ୍ତି ପରିବେଶବିତ୍ ।
ଅନ୍ୟ ରାଜ୍ୟରେ ଶିକାରୀଙ୍କୁ ଦେଖିଲେ ସୁଧି ଗୁଳି କରିବାର ନିର୍ଦ୍ଦେଶ ଥିଲାବେଳେ ଏଠାରେ ଏମିତ ନିୟମ କାର୍ଯ୍ୟକାରୀ ହେଉନାହିଁ କିମ୍ବା ବନସୁରକ୍ଷା କର୍ମଚାରୀଙ୍କୁ ଯଥେଷ୍ଟ ପରିମାଣର ଅସ୍ତ୍ରଶସ୍ତ୍ର ଦିଆଯାଉନାହିଁ ବୋଲି ଅଭିଯୋଗ କରିଛନ୍ତି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଯଦି ବନକର୍ମଚାରୀ ଶିକାରୀଙ୍କୁ ଅଟକାଇବାରେ ସଫଳ ହେଉନାହାନ୍ତି, ତେବେ ରାଜ୍ୟରେ ଥିବା ସଶସ୍ତ୍ରବାହିନୀକୁ କାହିଁକି ବ୍ୟବହାର କରାଯାଉନି ବୋଲି ପ୍ରଶ୍ନ ଉଠୁଛି ।