କନକ ବ୍ୟୁରୋ: ମାଲକାନଗିରି ଜିଲ୍ଲା ବଣ୍ଡା ଘାଟିରେ ୮ଟି ପାହାଡରେ ପୋଡୁ ଚାଷ ପାଇଁ ନିଆଁ ଲାଗିବା ଖବର କନକ ନ୍ୟୁଜରେ ପ୍ରସାରଣ ପରେ ତତ୍ପରତା ଦେଖାଇଛି ମାଥିଲି ବନବିଭାଗ । ରାତିରେ ଘାଟି ଅଂଚଳର ପାହାଡ ଚଢି ନିଆଁକୁ କାବୁ କରିଛି ବନ ବିଭାଗର ସ୍ୱତନ୍ତ୍ର ଟିମ୍ । ସେପଟେ ଜିଲ୍ଲାର ବିଭିନ୍ନ ସ୍ଥାନରେ ଜଙ୍ଗଲ ନିଆଁର ପ୍ରଭାବ ଦେଖିବାକୁ ମିଳିଛି । ୩ ଦିନ ଧରି ଜିଲ୍ଲାରେ ଧୂଆଁଳିଆ ପରିବେଶ ଦେଖିବାକୁ ମିଳୁଛି।
Kanak News is now on WhatsApp
Join and get latest news updates delivered to you via WhatsApp
ରାତିର ଅନ୍ଧାର ଭିତରେ ପାହାଡ ଚଢି ନିଆଁକୁ କାବୁ କରିଛି ବନବିଭାଗ । ବଣ୍ଡା ଘାଟିର ୮ଟି ପାହାଡରେ ନିଆଁ ଲାଗିବା ଖବର କନକ ନ୍ୟୁଜରେ ପ୍ରସାରଣ ହେବା ପରେ ତତ୍ପର ହୋଇଛି ମାଲକାନଗିରି ଜିଲ୍ଲା ମାଥିଲି ବନ ବିଭାଗ । ମାଥିଲି ବନାଂଚଳ ଅଧିକାରୀ ପର୍ଶୁରାମ ଭୂମିଆଙ୍କ ନେତୃତ୍ୱରେ ଶୁକ୍ରବାର ରାତିରୁ ନିଆଁ ଲିଭା କାମ ଜାରି ହୋଇଛି । କିଛି ପରିମାଣରେ ନିଆଁ ଆୟତ୍ତ ହୋଇଥିବା ବେଳେ ବଣ୍ଡାଘାଟି ସମେତ ମାଡକାପଦର, ବେଙ୍ଗପାଣି, ବଡଡୁରାଲ ପାହାଡରେ ନିଆଁକୁ ଆୟତ କରିବା ପାଇଁ ଉଦ୍ୟମ ଚାଲିଛି ।
ଗତ ୪ ଦିନ ହେବ ପାହାଡରେ ନିଆଁ ଲାଗିବା ପରେ ଜଙ୍ଗଲ ଧୂଆଁ ବିଭିନ୍ନ ଅଂଚଳକୁ ବ୍ୟାପି ଯାଇଛି । ଯେଉଁଥିରେ ମାଲକାନଗିରି ଜିଲ୍ଲାର ପରିବେଶ ଧୂଆଁମୟ ହୋଇଯାଇଛି । କୋହଲା ପାଗ ସାଙ୍ଗକୁ ଚାରି ଆଡେ କେବଳ ଧୂଆଁ ଆଉ ଧୂଆଁର ଆସ୍ତରଣ । ଗୁରୁତ୍ୱପୁର୍ଣ୍ଣ କଥା ହେଉଛି, ଏହି ଧୂଆଁଳିଆ ପରିବେଶରେ ଘରୁ ବାହାରକୁ ବାହାରିଲେ ଲୋକଙ୍କ ଆଖି ପୋଡୁଥିବା ଅଭିଯୋଗ ହୋଇଛି । ବଣ୍ଡାଘାଟି ପହାଡ ଉପରେ ବନ ବିଭାଗ ପକ୍ଷରୁ ନିଆଁ ଲିଭା କାର୍ଯ୍ୟ ଜାରି ରହିଛି । ତେଣୁ ନିଆଁ ଲିଭା ପ୍ରକ୍ରିୟାରେ ଅଧିକ ଧୂଆଁ ହେଉଥିବାରୁ ଚାରି ଆଡେ ଏପରି ପରିସ୍ଥିତି ସୃଷ୍ଟି ହୋଇଥିବା ମାଲକାନଗିରି ଡିଏଫଓ ସୂଚନା ଦେଇଛନ୍ତି ।