କମବ୍ୟାକ କରିବ କି କଂଗ୍ରେସ! ୨୦୧୪ ପରେ ପ୍ରଥମଥର ପାଇଁ ଉପନିର୍ବାଚନରେ ଦ୍ୱିତୀୟ ସ୍ଥାନକୁ ଉଠିଲା ‘ହାତ’

କନକ ବ୍ୟୁରୋ: ବ୍ରଜରାଜନଗର ଉପନିର୍ବାଚନରେ ବିଜେଡିର ବଡ ବିଜୟ ହୋଇଛି । ବିଜେଡି ଏଥିରେ ୬୫ ହଜାରରୁ ଅଧିକ ଭୋଟରେ ବାଜିମାରିଛି । ୨୦୧୪ ପରେ ପ୍ରଥମଥର ପାଇଁ ୨ୟ ସ୍ଥାନରେ ରହିଛି କଂଗ୍ରେସ । ବିଜେପିର ରାଧାରାଣୀଙ୍କୁ ପଛରେ ପକାଇ ଦ୍ୱିତୀୟ ସ୍ଥାନରେ ରହିଲେ କଂଗ୍ରେସ ପ୍ରାର୍ଥୀ କିଶୋର ପଟେଲ । ଅଳକା ମହାନ୍ତିଙ୍କୁ ମୋଟ୍ ୯୩ହଜାର ୭୯୦ ଭୋଟ୍ ମିଳିଛି । ସେହିପରି କଂଗ୍ରେସର କିଶୋର ପଟେଲଙ୍କୁ ୨୭ହଜାର ୫୬୫ ଭୋଟ୍ ମିଳିଛି ।

ବର୍ତ୍ତମାନ ରାଜ୍ୟରେ ବିଜେପି ମୁଖ୍ୟ ବିରୋଧୀ ଦଳ ଭୂମିକା ତୁଲାଉଛି । ଏହାବାଦ ବି ବ୍ରଜରାଜନଗର ଉପନିର୍ବାଚନରେ କଂଗ୍ରେସ ଭଲ ପ୍ରଦର୍ଶନ କରିଛି । ୨୦୧୪ ପରେ ଦଳ କୌଣସି ବି ଉପନିର୍ବାଚନରେ ଦ୍ୱିତୀୟ ସ୍ଥାନରେ ରହିନଥିଲା । ହେଲେ ଏବେ ମୁଖ୍ୟ ବିରୋଧୀ ଦଳକୁ ପଛରେ ପକାଇ ଦ୍ୱିତୀୟ ସ୍ଥାନରେ ରହିଛି କଂଗ୍ରେସ । ଏହି ରେଜଲ୍ଟ ପରେ କଂଗ୍ରେସ ପୁଣି ଶାସନ କ୍ଷମତାକୁ ଫେରିବ ବୋଲି ଦଳୀୟ ଶିବିରରେ ଚର୍ଚ୍ଚା ହେଉଛି ।

ସେପଟେ କେନ୍ଦ୍ରରେ କଂଗ୍ରେସ ମୁଖ୍ୟ ବିରୋଧୀ ଦଳର କ୍ଷମତାରେ ରହିଛି । ହେଲେ ସରକାରକୁ ଫେରିବା କଂଗ୍ରେସ ପାଇଁ କାଠିକର ପାଠ ହୋଇଛି । ଏହାରି ମଧ୍ୟରେ କଂଗ୍ରେସର ଏଭଳି ପ୍ରଦର୍ଶନ ନିହାତି ରାଜ୍ୟ କଂଗ୍ରେସ ପାଇଁ କିଛି ମାତ୍ରାରେ ଆଶା ଆଣିଦେଇଛି । ସେହିପରି ପଞ୍ଚାୟତ ନିର୍ବାଚନରେ ମଧ୍ୟ ବିଜେପି ଦ୍ୱିତୀୟ ସ୍ଥାନରେ ରହିଥିଲେ ବି ଭଲ ପ୍ରଦର୍ଶନ କରିପାରିନଥିଲା । ବିଜେଡିଠାରୁ ବହୁ ପଛରେ ରହିଥିଲା ବିଜେପି । ତେଣୁ କଂଗ୍ରେସ ପାଇଁ ଏହା ଏକ ସୁଯୋଗ ହୋଇପାରେ ।