ପ୍ୟାରିସ ଅନ୍ତର୍ଜାତୀୟ ଖାଦ୍ୟ ମେଳାରେ ପ୍ରଶଂସା ସାଉଁଟିଲା ମାଣ୍ଡିଆରେ ପ୍ରସ୍ତୁତ ଖାଦ୍ୟ। ୧୨୫ ଦେଶ ଭିତରେ ପୋଲସରାର ମାଣ୍ଡିଆ ଉତ୍ପାଦକୁ ନେଇ ଚର୍ଚ୍ଚା।

କନକ ବ୍ୟୁରୋ: ଆଉ ଘର ଚାରି କାନ୍ଥ ଭିତରେ ରହିନାହାନ୍ତି ମହିଳା । ନିଜେ ସ୍ୱାବଲମ୍ବୀ ହେବା ସହ ପରିବାର ଚଳାଇବା କ୍ଷମତା ଅଛି । ସ୍ୱୟଂ ସହାୟକ ଗୋଷ୍ଠୀ ଜରିଆରେ ମହିଳା ମାନେ ନିଜକୁ ସକ୍ଷମ କରିପାରିଛନ୍ତି । ଯେମିତି ଗଞ୍ଜାମ ପୋଲସରା ଚିରିକିପଡା ଶାସନ ଗାଁର ସ୍ୱୟଂସହାୟକ ଗୋଷ୍ଠୀ ଏବେ ଚର୍ଚ୍ଚାରେ ରହିଛି । ମାଣ୍ଡିଆରୁ ପ୍ରସ୍ତୁତ କରୁଛି ଭଳିକିଭଳି ଖାଦ୍ୟ । ଯାହାକି ବିଦେଶରେ ମଧ୍ୟ ପ୍ରଶଂସା ସାଉଁଟିଛି । ପ୍ୟାରିସରେ ଆୟୋଜିତ ଅନ୍ତର୍ଜାତୀୟ ଖାଦ୍ୟ ମେଳାରେ ମନୋନୀତ ହୋଇଛି ମହିଳା ଗୋଷ୍ଠୀଙ୍କ ଦ୍ୱାରା ତିଆରି ହୋଇଥିବା ମାଣ୍ଡିଆ ଖାଦ୍ୟ । ପ୍ରାୟ ୧୨୫ ଦେଶ ଏହି ଖାଦ୍ୟ ମେଳାରେ ସାମିଲ ହୋଇଥିବା ବେଳେ ପୋଲସରାର ମାଣ୍ଡିଆରୁ ପ୍ରସ୍ତୁତ ଖାଦ୍ୟ ବିଦେଶୀଙ୍କ ପସନ୍ଦ ପାଲଟିଥିଲା । ଖାସ କରି ବିଚାରକଙ୍କ ଦ୍ୱାରା ମଧ୍ୟ ମନୋନୀତ ହୋଇଥିଲା ।

ତେବେ ଏହି ମହିଳାମାନଙ୍କ ଦ୍ୱାରା ମାଣ୍ଡିଆରୁ ପ୍ରସ୍ତୁତ ଗାଣ୍ଠିଆରୁ ନେଇ ଲଡ଼ୁ, ସେଓ, ବିଭିନ୍ନ କିସମର ପିଠାକୁ ଲୋକମାନେ ମଧ୍ୟ ବେଶୀ ପସନ୍ଦ କରୁଛନ୍ତି । ଗାଁର ମହିଳା ଏକାଠି ହୋଇ ଏହି ସବୁକୁ ବିକ୍ରି କରି ଦୁଇ ପଇସା ରୋଜଗାର କରୁଛନ୍ତି । ମାଣ୍ଡିଅ।।ର ଚାହିଦା ବଢିଚାଲିଥିବା ବେଳେ ମାଣ୍ଡିଆରୁ ପ୍ରସ୍ତୁତ ଖାଦ୍ୟ ସବୁ ପ୍ୟାକେଟ କରି ବଜ।।ରରେ ବିକ୍ରି ହେଉଛି । ଦିନକୁ ଦିନ ଏହି ମାଣ୍ଡିଆ ଖାଦ୍ୟକୁ ମଧ୍ୟ ଲୋକେ ବେଶ ପସନ୍ଦ କରୁଛନ୍ତି ଓ ଅଧିକ ମାତ୍ରାରେ କିଣୁଛନ୍ତି । ଯାହା ପାଇଁ ଏହି ମହିଳା ଗୋଷ୍ଠୀ ବି ବେଶ ଲାଭବାନ୍ ହେଉଛନ୍ତି ।