ଡେଲିଭରି ବୟ ହିନ୍ଦୁ ନୁହେଁ ବୋଲି ଅର୍ଡର କ୍ୟାନସଲ୍ କଲେ ଗ୍ରାହକ । ଟ୍ୱିଟରରେ ଜୋମାଟୋ ଦେଲା ଜବାବ୍, କହିଲା, ‘ଖାଦ୍ୟର ନାହିଁ ଧର୍ମ’ ।
କନକ ବ୍ୟୁରୋ : ହୁଏତ, ଆପଣ ଅନେକ ଥର ଅନଲାଇନରେ ଖାଇବା ମଗାଇ, ଅର୍ଡର କ୍ୟାନସଲ କରିଥିବେ । ଆଉ ଏହି ଅର୍ଡର କ୍ୟାନସଲ କରିବା ପଛରେ ଆପଣଙ୍କ ପାଖରେ ବହୁତ କାରଣ ବି ଥାଇପାରେ । ଯେମିତି କି ଖାଇବା ଭଲ ନଥିଲେ ଅର୍ଡର କ୍ୟାନସଲ କରିଥାଇପାରନ୍ତି କିମ୍ବା ଅର୍ଡର ବିଳମ୍ବ କାରଣରୁ ଖାଦ୍ୟ ଅର୍ଡର କ୍ୟାନସଲ୍ କରିଥାଇପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ଆଜି ଆମେ ଆପଣଙ୍କୁ ଖାଦ୍ୟ ଅର୍ଡର କ୍ୟାନସଲର ଏଭଳି ଏକ କାହାଣୀ କହିବୁ, ଯାହା ଜାଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ । ଡେଲିଭରି ବୟ ହିନ୍ଦୁ ନୁହେଁ ବୋଲି ଜଣେ ଗ୍ରାହକ ଜୋମାଟୋ ଖାଦ୍ୟ ଅର୍ଡରକୁ କ୍ୟାନସଲ କରିଦେଇଛନ୍ତି । ଆଉ ଏହି ଗ୍ରାହକକୁ କଡ଼ା ଜବାବ ଦେଇଛି ଜୋମାଟୋ ।
ଇଏ ହେଉଛନ୍ତି ଅମିତ ଶୁକ୍ଲା । ଏମବିଏ ପାଠ ପଢ଼ିଛନ୍ତି, ଏକ ବଡ଼ ପ୍ରକଳ୍ପରେ କନସଲଟାଂଟ ଭାବେ କାମ କରନ୍ତି । ଏହି ଅମିତ ଶୁକ୍ଲା, ଜୋମାଟୋ ଏବଂ ଡେଲିଭରି ବୟକୁ ନେଇ ଏହି ପୁରା କାହାଣୀ । ଅମିତ ଶୁକ୍ଲା ଅନଲାଇନ୍ ସାଇଟ୍ ଜୋମାଟୋରେ ଖାଦ୍ୟ ଅର୍ଡର କରିଥିଲେ, ଆଉ ଯେତେବେଳେ ଜଣେ ଅଣହିନ୍ଦୁ ବ୍ୟକ୍ତି ଡେଲିଭରି ଦେବାକୁ ଆସିଲା ସେ ଚିହିଁକି ଯାଇଥିଲେ ।
ଅର୍ଡରକୁ ତୁରନ୍ତ କ୍ୟାନସଲ କରିବା ସହ ଟ୍ୱିଟରରେ ଲେଖିଥିଲେ । ‘ମୁଁ ଏବେ ଜୋମାଟୋରେ ଖାଦ୍ୟ ଅର୍ଡରକୁ କ୍ୟାନସଲ୍ କରିଦେଲି । କାରଣ ସେମାନେ ଜଣେ ଅଣହିନ୍ଦୁ ବ୍ୟକ୍ତିକୁ ଅର୍ଡର ଦେବା ପାଇଁ ପଠାଇଥିଲେ । କଂପାନୀ ପକ୍ଷରୁ କୁହାଗଲା, ସେମାନେ ଡେଲିଭରି ବୟର ପରିବର୍ତ୍ତନ କରିପାରିବେ ନାହିଁ । ଏହା ସହିତ ଖାଇବା ଅର୍ଡର କ୍ୟାନସଲ କରିବାରୁ ଟଙ୍କା ଫେରସ୍ତ କରିବାକୁ ମନା କରିଦେଲେ । ମୁଁ କହିଲି, ଅର୍ଡର ରଖିବାକୁ ମୋତେ ବାଧ୍ୟ କରିପାରିବେ ନାହିଁ । ମୋତେ ଖାଦ୍ୟ ଦରକାର ନାହିଁ, ଅର୍ଡର କ୍ୟାନସଲ କରୁଛି ।’
ଆଉ ଏହା ପରେ ଜୋମାଟୋ ଦେଲା କଡ଼ା ଜବାବ୍ । ଉଚିତ ଶିକ୍ଷା ପାଇଲେ ଅନଲାଇନ ଗ୍ରାହକ । ଡେଲିଭରି ବୟଙ୍କ ଏଭଳି ପ୍ରତିକ୍ରିୟାର କିଛି ସମୟ ପରେ ଜୋମାଟୋ ପକ୍ଷରୁ ଆସିଥିଲା ଜବାବ୍ । ଟ୍ୱିଟରେ ଜୋମାଟୋ ପକ୍ଷରୁ ଲେଖାଯାଇଥିଲା, ‘ଖାଦ୍ୟର କୌଣସି ଧର୍ମ ନଥାଏ । ଖାଦ୍ୟ ହିଁ ଗୋଟିଏ ଧର୍ମ ।’
ଆଉ ଜୋମାଟୋର ଏଭଳି ଜବାବକୁ ନେଇ ଏବେ ସୋସିଆଲ ମିଡ଼ିଆରେ ବଢ଼ିବାରେ ଚାଲିଛି ଚର୍ଚ୍ଚା । ଅନେକ ବ୍ୟକ୍ତି ଜୋମାଟୋର ଏଭଳି ପ୍ରତିକ୍ରିୟାକୁ ପ୍ରଶଂସା କରିଛନ୍ତି । ଆସନ୍ତୁ ଦେଖିବା ଏହି ଘଟଣାକୁ ନେଇ ପ୍ରତିକ୍ରିୟା ପ୍ରକାଶ କରିଥିବା କିଛି ବ୍ୟକ୍ତିଙ୍କ ଟ୍ୱିଟ୍ ଉପରେ ।
-ପ୍ରଣିତ ଭଟ୍ଟ ଟ୍ୱିଟରରେ ଲେଖିଛନ୍ତି, ‘ଏହା କେଉଁ ଭଳି ବ୍ୟବହାର ପଣ୍ଡିତ୍ ଜୀ ।’
-ସେହିପରି ରିଆ ନାମକ ଜଣେ ଟ୍ୱିଟର ଆକାଉଂଟଧାରୀ ଲେଖିଛନ୍ତ, ‘ଆପଣ ବିଶ୍ୱାସ କରିପାରୁଛନ୍ତି ଜଣେ ଏମବିଏ ପାଠପଢୁଆ ବ୍ୟକ୍ତିର ବ୍ୟବହାର । ଭଗବାନ ହିଁ ଜାଣନ୍ତି ଆମ ଦେଶର ଲୋକଙ୍କ ଭିତରେ କ’ଣ ଚାଲିଛି ।’
– ଅରୁଣ ବିଶ୍ୱାନାଥନ ଟ୍ୱିଟରରେ ଲେଖିଛନ୍ତି, ‘ଶ୍ରାବଣ ମାସରେ ବାହାରୁ କାହିଁକି ଖାଦ୍ୟ ଅର୍ଡର କରି ଖାଉଛନ୍ତି ।’
ଏହି ଭଳି ଅନେକ ପ୍ରତିକ୍ରିୟା ସୋସିଆଲ ମିଡ଼ିଆରେ ଆସିବାକୁ ଲାଗିଛି । ଆଉ ଏହାରି ଭିତରେ ଜୋମାଟୋର ପ୍ରତିଷ୍ଠାତା ଦୀପିନ୍ଦର ଗୋୟଲ ଟ୍ୱିଟରରେ ଲେଖିଛନ୍ତି, ‘ଭାରତକୁ ନେଇ ଆମେ ଗର୍ବିତ । ଆମ ଗ୍ରାହକ ଓ ପାର୍ଟନରଙ୍କ ବିବିଧତାକୁ ଆମେ ସମ୍ମାନ ଦେଇ ଆସିଛୁ । ଆମ ବ୍ୟବସାୟରେ କ୍ଷତି ହେଲେ ବି ଆମେ ଦୁଃଖିତ ନୁହେଁ । କିନ୍ତୁ ଆମ ଆଦର୍ଶ ବଜାୟ ରଖିବୁ ।