କନକ ବ୍ୟୁରୋ : ଅଳ୍ପଦିନ ଭିତରେ ବଦଳି ଯାଇଛି ଶ୍ରୀମନ୍ଦିର ଆଖପାଖର ଚିତ୍ର । ଶ୍ରୀକ୍ଷେତ୍ରକୁ ନେଇ ମୁଖ୍ୟମନ୍ତ୍ରୀ ଦେଖିଥିବା ସ୍ୱପ୍ନ ଏବଂ ପୁରୀକୁ ବିଶ୍ୱ ଐତିହ୍ୟ ସହର ଭାବେ ଗଢ଼ି- ତୋଳିବାର ଆହ୍ୱାନ । ଏହି ଦୁଇଟି ପ୍ରମୁଖ ଲକ୍ଷ୍ୟ ନେଇ ଜାନୁଆରୀ ୧୬ ତାରିଖରେ ଜଗନ୍ନାଥ ଧାମରେ ପହଞ୍ଚିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୫୧୦ କୋଟି ଟଙ୍କାରେ ନିର୍ମାଣ ହେବାକୁ ଥିବା ୭ଟି ପ୍ରମୁଖ ପ୍ରକଳ୍ପର ଶିଳାନ୍ୟାସ କରିଥିଲେ । ଶ୍ରୀ ସେତୁ, ଶ୍ରୀଜଗନ୍ନାଥ ବଲ୍ଲଭ ଯାତ୍ରୀ ସେବା କେନ୍ଦ୍ର, ସ୍ୱର୍ଗଦ୍ୱାର ଶ୍ମଶାନ ଘାଟର ସୌନ୍ଦର୍ଯ୍ୟକରଣ, ଜେଲ ରୋଡରେ ବହୁତଳ ପାର୍କିଂ, ବେଳାଭୂମିରେ ଭେଣ୍ଡିଂ ଜୋନ, ମାର୍କେଟ୍ ଛକରେ ବହୁମୁଖୀ ମାର୍କେଟ୍ କମ୍ପେ୍ଲକ୍ସ ଭଳି ୭ଟି ପ୍ରକଳ୍ପର ଶିଳାନ୍ୟାସ କଲେ ।
Kanak News is now on WhatsApp
Join and get latest news updates delivered to you via WhatsApp
ଏହି ଲକ୍ଷ୍ୟ ନେଇ ଶ୍ରୀମନ୍ଦିରରୁ ୭୫ ମିଟର ଭିତରେ ଥିବା କମରସିଆଲ୍ ଷ୍ଟ୍ରକଚର ବା ବ୍ୟବସାୟିକ ପ୍ରତିଷ୍ଠାନ ଏବଂ ଅସୁରକ୍ଷିତ ନିର୍ମାଣ ସବୁକୁ ଉଚ୍ଛେଦ କରିବାକୁ ଆରମ୍ଭ ହେଲା ଅଭିଯାନ । ୭୫ ମିଟର ପରିଧି ଭିତରେ ଆସୁଥିବା ମଠ ଗୁଡ଼ିକର ସଂରକ୍ଷଣ ଓ ସୁରକ୍ଷାକୁ ଧ୍ୟାନରେ ରଖି ଚାଲିଥିଲା ବୁଲଡୋଜର । ଜଷ୍ଟିସ ବିପି ଦାସ କମିଶନଙ୍କ ସୁପାରିଶ ଏବଂ ବିଶେଷଜ୍ଞଙ୍କ ମତ ଆଧାରରେ ଏଭଳି ଏକ ଯୋଜନା ପ୍ରସ୍ତୁତ କରିଥିଲେ ସରକାର । ମେଘନାଦ ପାଚେରୀ କଡରୁ ଉଚ୍ଛେଦ ବେଳେ ଭାଙ୍ଗିବାକୁ ଥିବା ଘର ଓ ଦୋକାନ ପାଇଁ ଉପଯୁକ୍ତ କ୍ଷତିପୂରଣ ସହ ବିକଳ୍ପ ଜାଗା ଯୋଗାଇ ଦେବାକୁ ମଧ୍ୟ ଘୋଷଣା କରାଯାଇଛି ।
ପୁରୀର ସ୍ୱର୍ଣ୍ଣିମ ବେଳାଭୂମି ବହୁ ଦଶନ୍ଧି ପରେ ତାର ବାସ୍ତବ ରୂପ ନେଇଛି । ପୁରୀ ବେଳାଭୂମିକୁ ବିଶ୍ୱସ୍ତରୀୟ କରାଯାଇଛି । ସାଜସଜା ଏବଂ ସବୁଜିମାରେ ନୂଆ ଚେହେରା ପାଇଛି ବେଳାଭୂମି । ଏଥିସହିତ ରହିଛି ପର୍ଯ୍ୟଟକଙ୍କ ପାଇଁ ଅନେକ ସୁବିଧା ସୁଯୋଗ । ଦିଗବାରେଣୀ ଖୁଂଟିଠାରୁ ମେ’ ଫେୟାର ହୋଟେଲ ପର୍ଯ୍ୟନ୍ତ ୮୬୦ ମିଟର ବ୍ୟାପ୍ତ ନୂଆ ଭାବେ ତିଆରି ହୋଇଥିବା ଏହିି ବ୍ଲୁ-ଫ୍ଲାଗ ବିଚର କାମ ଶେଷ ପର୍ଯ୍ୟାୟରେ ପହଂଚିଛି । ପରିବେଶ ନିୟମକୁ ଗୁରୁତ୍ୱ ଦିଆଯିବା ସହ ବିକାଶମୂଳକ କାମ କରାଯାଇଥିବାରୁ ଏହି ସମ୍ମାନ ଜନକ ଟ୍ୟାଗ ମିଳିଥିବା ଟ୍ୱିଟ କରି ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ପ୍ରଭୁ ଲିଙ୍ଗରାଜଙ୍କ ମନ୍ଦିର ଚତୁପାଶ୍ୱର୍ର ଏବେ ନବୀକରଣ କାମ ହୋଇଛି । ସୁନ୍ଦର ବୃକ୍ଷ ଓ ଆଲୋକମାଳାରେ ସଜେଇ ହୋଇଛି ଲିଙ୍ଗରାଜ ମନ୍ଦିରଙ୍କ ଚତୁଃପାଶ୍ୱର୍ । ବାହାରୁ ଆସୁଥିବା ପର୍ଯ୍ୟଟକମାନେ ଲିଙ୍ଗରାଜଙ୍କ ଚାରିପଟର ପରିବେଶ ଦେଖି ବିମୋହିତ ହେଉଛନ୍ତି । ବିଶେଷକରି ମନ୍ଦିର ଆଗରେ ଲୁଚିଯାଇଥିବା ଦେବୀ ପାଦହରା ପୁଷ୍କରିଣୀ ଅନେକଙ୍କୁ ଆକୃଷ୍ଟ କରୁଛି । ଦେବୀ ପାଦହରା ବା ଦେଓପା ପୋଖରୀ ଭିତରେ ରହିିଛି ପାହାଚ ପରେ ପାହାଚ । ଏହା ସହିତ ରହିଛି ପୋଖରୀ ଭିତରେ ୧୦୮-ଲିଙ୍ଗଯୁକ୍ତ ଛୋଟ ଛୋଟ ମନ୍ଦିର । ରାଜ୍ୟ ସରକାରଙ୍କ ଯୋଜନା ଅନୁସାରେ ଲିଙ୍ଗରାଜ ମନ୍ଦିର ଆଖାପାଖରେ ୬୬ ଏକର ଜାଗା ପାଇବ ଏହିଭଲି ନୂଆ ରୁପ । ଏକାମ୍ର କ୍ଷେତ୍ର ଯୋଜନାରେ ମୋଟ ୭ ଶହ କୋଟି ଟଙ୍କାର କାର୍ଯ୍ୟକ୍ରମ ହାତକୁ ନିଆଯାଇଥିବା ବେଳେ ୨୦୨୦-୨୧ ଆର୍ଥିକ ବର୍ଷରେ ଏଥିପାଇଁ ଖର୍ଚ୍ଚ ହେବ ୧୫୦ କୋଟି ଟଙ୍କା ।
ଏକାମ୍ର କ୍ଷେତ୍ରର ଆରାଧ୍ୟା ପ୍ରଭୁ ଶୀଲିଙ୍ଗରାଜଙ୍କ ମହାଦୀପ ଉଠିଲାବେଳେ ୨ ଲକ୍ଷ ଭକ୍ତ ଏହାକୁ ପ୍ରତ୍ୟକ୍ଷ ଦର୍ଶନ କରିବା ପାଇଁ ବନ୍ଦୋବସ୍ତ କରୁଛନ୍ତି ରାଜ୍ୟ ସରକାର । ସୌନ୍ଦର୍ଯ୍ୟକରଣ ସହ ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରିବାକୁ ଆଗେଇ ଚାଲିଛି ବିକାଶ କାମ । ରଥଖଳାରୁ ଦେଖିହେବ ବିନ୍ଦୁସାଗରରେ ପ୍ରଭୁ ଲିଙ୍ଗରାଜଙ୍କ ଚନ୍ଦନ ଯାତ୍ରା । ଶ୍ରାବଣରେ ଯେଭଳି ଲକ୍ଷ ଲକ୍ଷ ଭକ୍ତ ଆସି ଜଳଲାଗି କରିପାରିବେ ସେଥିଲାଗି ସୁବନ୍ଦୋବସ୍ତ କିରିବେ ସରକାର । ଏପରିକି ଲିଙ୍ଗରାଜ ମନ୍ଦିର ନିକଟରେ ଥିବା ବିନ୍ଧ୍ୟବାସିନୀ, ଭବାନୀଶଙ୍କର, ସୁକଶାରୀ ଓ ମୋହିନୀ ମନ୍ଦିରର ବିକାଶ କରିବାକୁ ଲକ୍ଷ୍ୟ ରଖିଛନ୍ତି ।