ସ୍ୱାସ୍ଥ୍ୟକ୍ଷେତ୍ରରେ ନବୀନ ସରକାରକୁ ସଫଳତାର ସାର୍ଟିଫିକେଟ । ବଡ ମେଡିକାଲକୁ ଏମ୍ସ ପ୍ଲସ ପାଇଁ ବ୍ଲୁ-ପ୍ରିଣ୍ଟ, ଭାଇଚାରା ସହରର ଭାଗ୍ୟ ବଦଳାଇବାକୁ ଲକ୍ଷ୍ୟ ।
କନକ ବ୍ୟୁରୋ : ଗୋଟିଏ ଗରିବୀ, ଅପପୁଷ୍ଟି ଓ ପ୍ରାକୃତିକ ବିପର୍ଯ୍ୟୟ ପ୍ରବଣ ରାଜ୍ୟକୁ ପ୍ରଗତିଶୀଳ ଓ ସମ୍ଭାବନାର ରାଜ୍ୟରେ ପରିଣତ କରିବା ପଛରେ ରହିଛି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିଚକ୍ଷଣ ନେତୃତ୍ୱ । ୮୦ ଲକ୍ଷରୁ ଅଧିକ ଲୋକଙ୍କୁ ଗରିବୀ ସୀମାରେଖା ତଳୁ ଉପରକୁ ଆଣିବା ଏକ ବଡ ଉପଲବ୍ଧି । କ୍ଷମତାର ଡୋର ହାତରେ ଧରିବା ବେଳେ ଶିଶୁ ଆଉ ମାତୃ ମୃତ୍ୟୁହାର ରାଜ୍ୟପାଇଁ ଅପବାଦର କାରଣ ପାଲଟିଥିଲା । ଆଜି ରାଜ୍ୟର ମାତୃ ଓ ଶିଶୁ ମୃତ୍ୟୁ ହାର ଜାତୀୟ ହାର ଠାରୁ ବେଶ ଭଲ ରହିବା ସ୍ୱାସ୍ଥ୍ୟକ୍ଷେତ୍ର ପ୍ରତି ନବୀନଙ୍କ ଗୁରୁତ୍ୱର ବଡ ପ୍ରମାଣ । ଲୋକଙ୍କ ପାଖରେ ସ୍ୱାସ୍ଥ୍ୟସେବା ପହଁଚାଇବା ପାଇଁ ଆବଶ୍ୟକ ଥିବା ଭିତ୍ତିଭୂମି ଉପରେ ଗତ ୨୦ ବର୍ଷରେ ଯଥେଷ୍ଟ ଧ୍ୟାନ ଦିଆଯାଇଛି । ଦିନେ ମୟୁରଭଂଜ ଏବଂ କୋରାପୁଟରେ ମେଡିକାଲ କଲେଜ ଖୋଲିବା ସ୍ୱପ୍ନ ଥିବା ବେଳେ ତାକୁ ବାସ୍ତବତାର ରୂପ ଦେଇ ପାରିଛନ୍ତି ରାଜ୍ୟ ସରକାର ।
Kanak News is now on WhatsApp
Join and get latest news updates delivered to you via WhatsApp
୨୦୦୦ ମସିହା ବେଳକୁ ରାଜ୍ୟରେ ୩ଟି ମେଡିକାଲ କଲେଜ ଥିବା ବେଳେ ରାଜ୍ୟରେ ଆଉ ୮ଟି ମେଡିକାଲ କଲେଜର ଗଠନ ଦିଗରେ ପଦକ୍ଷେପ ନିଆଯାଇଛି । ଏଥିରୁ ୪ଟି ଅର୍ଥାତ୍ କୋରାପୁଟ, ବାରିପଦା, ବାଲେଶ୍ୱର ଓ ବଲାଙ୍ଗୀର ମେଡିକାଲ କଲେଜ କାର୍ଯ୍ୟକ୍ଷମ ହୋଇସାରିଛି । ଏସସିବି ମେଡିକାଲ କଲେଜକୁ ଏମସ ପ୍ଲସରେ ପରିଣତ କରିବାକୁ ୧୦୦୦ କୋଟିର ବ୍ୟବସ୍ଥା କରାଯାଇଛି । ୩୦୦୦ ଶଯ୍ୟା ବିଶିଷ୍ଟ ବିଶ୍ୱସ୍ତରୀୟ ଏବଂ ସମନ୍ୱିତ ଡାକ୍ତରଖାନାରେ ପରିଣତ କରିବାକୁ ରାଜ୍ୟ ସରକାର ଅଣ୍ଟା ଭିଡିଛନ୍ତି ।
କଟକ ଶ୍ରୀରାମ ଚନ୍ଦ୍ର ଭଞ୍ଚ ମେଡିିକାଲ କଲେଜ ଏବଂ ହସ୍ପିଟାଲର ପୁନର୍ବିନ୍ୟାସ କରି ଅନ୍ତର୍ଜାତୀୟ ମାନର ଚିକିତ୍ସା ସେବା ଯୋଗାଇ ଦେବାକୁ ନିଷ୍ପତି ନିଆଯିବା ପରେ ଆରମ୍ଭ ହୋଇଛି ପ୍ରକ୍ରିୟା । ଏସସିବିର ସମ୍ପ୍ରସାରଣ ପାଇଁ ପ୍ରାୟ ୨୫ ଏକର ଜମି ଅଧିଗ୍ରହଣ କରାଯିବ । ସରକାରଙ୍କ ଏହି ମହତାକାଂକ୍ଷୀ ଯୋଜନାରେ ଅନେକ କ୍ଷତିଗ୍ରସ୍ତ ହେବା ସମ୍ଭାବନା ଥିବାରୁ ସେମାନଙ୍କୁ କିପରି ଥଇଥାନ କରାଯିବ, ସେ ନେଇ ପ୍ରାଥମିକତା ଦେଇଛନ୍ତି ସରକାର । ଏସସିବିକୁ ୩ ହଜାର ଶଯ୍ୟା ବିଶିଷ୍ଟ ବିଶ୍ୱସ୍ତରୀୟ ଚିକିତ୍ସାଳୟ କରିବା ପାଇଁ ଯୋଜନା କରିଛନ୍ତି । ଏଥିପାଇଁ ତାଳଦଣ୍ଡା କେନାଲର ଦୁଇ ପାଶ୍ୱର୍ରେ କେନାଲ ବନ୍ଧର ସଂପ୍ରସାରଣ କରାଯିବ । କେନାଲ ବନ୍ଧର ଉଭୟ ପାଶ୍ୱର୍ ଜୋବ୍ରା ବ୍ୟାରେଜ ନିକଟରେ ରିଙ୍ଗ ରୋଡକୁ ସଂଯୋଗ କରିବ । ଫଳରେ ରାଜ୍ୟର ବିଭିନ୍ନ ଅଂଚଳରୁ ରୋଗୀ ଓ ଆମ୍ବୁଲାନ୍ସ ସୁବିଧାରେ ଆସିପାରିବେ । କେନାଲର ଉଭୟ ରାସ୍ତାକୁ ମଧ୍ୟ ତିନି ଥାକିଆ କରାଯିବ । ରାସ୍ତାର ଉଭୟ ପଟରେ ଫୁଟପାଥ ସହ ପାର୍କିଂ ଆଂଚଳର ବିକାଶ କରାଯିବ । ରାସ୍ତା କଡରେ ଗଛ ଲଗାଇବା ସହ ଲାଇଟ ବ୍ୟବସ୍ଥା କରାଯିବ । ଛତ୍ର ବଜାର ଅଂଚଳର ଭବିଷ୍ୟତ ସଂପ୍ରସାରଣ ପାଇଁ ମଧ୍ୟ ଯୋଜନା ଅଛି ।
ପଂଚମ ପାଳିରେ ବିପୁଳ ଜନାଦେଶ ସହ କ୍ଷମତାକୁ ଆସିବା ପରେ ମୋ ସରକାର ଆଉ ୫-ଟି ଜରିଆରେ ପ୍ରଶାସନକୁ ଅଧିକ କ୍ରିୟାଶୀଳ କରିବାକୁ ପଦକ୍ଷେପ ନେଇଛନ୍ତି ନବୀନ ।
ନବୀନଙ୍କ ୫-ଟି
– ଟ୍ରାନ୍ସପାରେନ୍ସି
– ଟିମୱର୍କ
– ଟେକ୍ନୋଲୋଜି
– ଟାଇମ୍
– ଟ୍ରାନ୍ସଫରମେସନ
ଏଥିପାଇଁ ଜଣେ ସ୍ୱତନ୍ତ୍ର ସଚିବଙ୍କୁ ନିଯୁକ୍ତ କରି ସରକାରୀ ବିଭାଗ ଗୁଡିକରେ ବ୍ୟବସ୍ଥାରେ ପରିବର୍ତନ କରି ଲୋକଙ୍କ ଅଧିକ ନିକଟତର ହେବାକୁ ପ୍ରୟାସ କରିଛନ୍ତି ।
ସରକାରୀ ବିଭାଗ ଓ କାର୍ଯ୍ୟାଳୟକୁ ଦୁର୍ନୀତିମୁକ୍ତ କରିବା ସହ ସ୍ୱଚ୍ଛତା ରଖି କେବଳ ଲୋକଙ୍କ ସେବାରେ ନିୟୋଜିତ କରିବା ପାଇଁ ରାଜ୍ୟ ସରକାରଙ୍କ ଏହି ମହତ୍ୱାକାଂକ୍ଷୀ ପଦକ୍ଷେପ ବ୍ୟବସ୍ଥାରେ ଅଧିକ ପାରଦର୍ଶିତା ଆଣିପାରିଛି । ସରକାରୀ ନାଲି ଫିତାର ପ୍ରଭାବକୁ କମାଇବା ସହ ଲୋକଙ୍କ ପାଖରେ ସୂଚନା ପହଂଚାଇବା ଓ ସେମାନଙ୍କଠାରୁ ପ୍ରତିକ୍ରିୟା ନେବାର ମାଧ୍ୟ ପାଲଟିଛି । ଯାହା ବାସ୍ତବରେ ପରିଚାଳନାରେ ଟ୍ରାନ୍ସଫରମେସନ ବା ରୁପାନ୍ତରଣ ଘଟାଇଛି ।