କୋଲକାତାରେ ଭୁଶୁଡିଲା ପୋଲ ! ବ୍ରିଜର ଗୋଟିଏ ଅଂଶ ଭାଙ୍ଗିଯିବାରୁ ଜଣେ ମୃତ, ୬ ଆହତ, ଫସିରହିଛି ଅନେକ ଯାନବାହନ ।
କନକ ବ୍ୟୁରୋ : କୋଲକାତାରେ ଭୁଶୁଡିଲା ଫ୍ଲାଏ ଓଭର । ଦକ୍ଷିଣ କୋଲକାତାର ମାଝେରହାଟ ଅଂଚଳରେ ଥିବା ଫ୍ଲାଏ ଓଭର ଭୁଶୁଡି ପଡିବାରୁ ଜଣଙ୍କର ମୃତ୍ୟୁ ହୋଇଛି । ୬ଜଣଙ୍କୁ ଭଙ୍ଗା ପୋଲ ତଳୁ ଉଦ୍ଧାର କରାଯାଇଛି । ସେମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତି କରାଯାଇଛି । ଏବେ ବି ଭଙ୍ଗା ଫ୍ଲାଏଓଭର ତଳେ ୨୦ରୁ ଅଧିକ ଲୋକ ଚାପି ହୋଇ ରହିଥିବା ସୂଚନା ମିଳିଛି । ଭାଙ୍ଗିପଡ଼ିଥିବା ପୋଲ ତଳେ କିଛି ବସ୍, କାର ଏବଂ ଦୁଇ ଚକିଆ ଯାନ ଫଶି ରହିଛି । ଏନଡିଆରଏଫ୍ ଟିମ୍, ପୁଲିସ୍, ଅଗ୍ନିଶମ କର୍ମଚାରୀ ଉଦ୍ଧାର କାର୍ଯ୍ୟ ଚଳାଇଛନ୍ତି । ନିକଟରେ ଥିବା ଏକ ସେନା କ୍ୟାମ୍ପରୁ ଏକାଧିକ ଯବାନ ଘଟଣା ସ୍ଥଳରେ ପହଂଚି ଉଦ୍ଧାର କାର୍ଯ୍ୟରେ ସହଯୋଗ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଜି ଅପରାହ୍ନ ପ୍ରାୟ ସାଢ଼େ ୪ଟା ବେଳେ ଅଚାନକ୍ ୪୦ ବର୍ଷ ତଳର ଏହି ଫ୍ଲାଏ ଓଭରର କିଛି ଅଂଶ ଭୁଷୁଡି ପଡ଼ିଥିଲା । ଏହି ଅଘଟଣକୁ ଗୁରୁତର ସହ ନେଇଛନ୍ତି ପଶ୍ଚିମବଙ୍ଗ ସରକାର । ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, ଏହି ଅଘଟଣକୁ ନେଇ ସମସ୍ତେ ବିବ୍ରତ । ଘଟଣାସ୍ଥଳରେ କଣ ସ୍ଥିତି ରହିଛି ସେ ଉପରେ ସରକାରଙ୍କ ନଜର ରହିଛି । ବର୍ତମାନ ସମୟରେ ଲୋକଙ୍କ ଉଦ୍ଧାରକାର୍ଯ୍ୟକୁ ଗୁରୁତ୍ୱ ଦିଆଯାଇଛି । ସେହିପରି ଫ୍ଲାଏଓଭର ଦୁର୍ଘଟଣା ନେଇ ତଦନ୍ତ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ ।
ପଶ୍ଚିମବଙ୍ଗର ଦକ୍ଷିଣ କୋଲକାତାରେ ଥିବା ମାଝେରହାଟ ପୋଲ ଭାଙ୍ଗିପଡିଛି । ଫଳରେ ପୋଲ ଉପରେ ଯାଉଥିବା ଅନେକ ଲୋକ ଓ ଗାଡି ଏହାରି ଭିତରେ ଦବି ରହିଛି । ମାଝେରଘାଟ ରେଳ ଷ୍ଟେସନକୁ ଲାଗି ରହିଛି ଏହି ପୋଲ । କୁହାଯାଉଛି ଏହି ପୋଲ ୪୦ବର୍ଷରୁ ଅଧିକ ପୁରୁଣା ହେବ । ନିକଟରେ କୋଲକାତାରେ ଏପରି ପୋଲ ଭୁଷୁଡି ପଡିବାରେ ଏହା ହେଉଛି ତୃତୀୟ ଘଟଣା । ୨୦୧୬ରେ ମଧ୍ୟ କୋଲକାତାରେ ଏପରି ପୋଲ ଭୁଷୁଡି ପଡିଥିଲା । ନିର୍ମାଣଧୀନ ଏକ ପୋଲ ଭୁଷୁଡି ପଡିବା ଯୋଗୁଁ ୧୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା ଏବଂ ଶହେରୁ ଅଧିକ ଲୋକ ଆହତ ହୋଇଥିଲେ ।
ମାଝେରହାଟ ପୋଲ ଭୁଷୁଡିବା ପରେ ସେଠାରେ ଉଦ୍ଧାରକାର୍ଯ୍ୟକୁ ତ୍ୱରାନ୍ୱିତ କରାଯାଇଛି । ଏନଡିଆରଏଫ ସହ ସେନାକୁ ମଧ୍ୟ ଉଦ୍ଧାର କାର୍ଯ୍ୟରେ ନିୟୋଜିତ କରାଯାଇଛି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜି ଦାର୍ଜିଲିଂ ଗସ୍ତରେ ଅଛନ୍ତି । ତେବେ ଘଟଣାର ତଦନ୍ତ ପରେ କରାଯିବ ଏବେ ଉଦ୍ଧାରକାର୍ଯ୍ୟ ଉପରେ ଗୁରୁତ୍ୱ ଦିଆଯାଇଛି ବୋଲି ସେ କହିଛନ୍ତି । ସେପଟେ ମାଝେରହାଟ ପୋଲ ଦେଇ ଯାଇଥିବା ରାସ୍ତାକୁ ବନ୍ଦ କରିଦିଆଯାଇଛି । ଏବଂ ଏଥିପାଇଁ ଅନ୍ୟାନ୍ୟ ବିକଳ୍ପ ଟ୍ରାଫିକ ବ୍ୟବସ୍ଥା କରାଯାଇଛି ।