ପ୍ରଧାନମନ୍ତ୍ରୀ ମୋଦିଙ୍କ ସଂସଦୀୟ କ୍ଷେତ୍ରରେ ଭୁଶୁଡ଼ିପଡ଼ିଲା ଫ୍ଲାଏଓଭର ! ପୋଲ ତଳେ ଚାପି ହୋଇ ୧୨ ମୃତ, ଫଶି ରହିଛନ୍ତି ୫୦ରୁ ଅଧିକ ଲୋକ
କନକ ବ୍ୟୁରୋ : ପ୍ରଧାନମନ୍ତ୍ରୀଙ୍କ ସଂସଦୀୟ କ୍ଷେତ୍ର ବାରଣାସୀରେ ବଡ଼ଧରଣର ଦୁର୍ଘଟଣା । ଭୁଷୁଡ଼ିପଡ଼ିଲା ନିର୍ମାଣଧୀନ ଫ୍ଲାଏଓଭର । ପ୍ରାଥମିକ ସୂଚନା ଅନୁଯାୟୀ, ଏହି ଭୟଙ୍କର ଦୁର୍ଘଟଣାରେ ୫୦ ଲୋକ ଫଶି ରହିଥିବା ଆଶା କରାଯାଉଛି । ଏହାସହ ୧୨ ଜଣ ଲୋକଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ପୋଲ ତଳେ ଚାପି ହୋଇ ରହିଥିବାରୁ ମୃତାହତଙ୍କ ସଂଖ୍ୟା ଆହୁରି ବୃଦ୍ଧି ପାଇବ ବୋଲି ଆଶଙ୍କା ପ୍ରକାଶ ପାଇଛି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି । ଘଟଣାସ୍ଥଳରେ ଉଦ୍ଧାରକାରୀ ଦଳ ଓ ଏନଡିଆରଏଫ ଟିମ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, କେଣ୍ଟ ଅଞ୍ଚଳରେ ଥିବା ଏହି ଫ୍ଲାଏଓଭରର ନିର୍ମାଣ କାର୍ଯ୍ୟ ଚାଲୁଥିବା ବେଳେ ହଠାତ୍ ଏହାର ଏକ ଅଂଶ ଭାଙ୍ଗିପଡ଼ିଥିଲା । ଯାହାଦ୍ୱାରା ଫ୍ଲାଏଓଭର ତଳେ ଅନେକ ଗାଡ଼ି ଚାପି ହୋଇଯାଇଥିଲା । ଏହାସହ ସେହି ବାଟରେ ଯାଉଥିବା କିଛି ଲୋକମାନେ ମଧ୍ୟ ପୋଲ ତଳେ ଚାପି ହୋଇଯାଇଛନ୍ତି । ତେବେ କେତେ ସଂଖ୍ୟାରେ ଲୋକ ପୋଲ ତଳେ ଚାପି ହୋଇଛନ୍ତି ତାହା ଏଯାଏଁ ସ୍ପଷ୍ଟ ଜଣାପଡ଼ିନାହିଁ । ଏହି ଦୁର୍ଘଟଣାକୁ ନେଇ ଯୋଗୀ ଆଦିତ୍ୟନାଥ ଦୁଃଖ ପ୍ରକାଶ କରିବା ସହ ଯଥାସମ୍ଭବ ସହାୟତା କରିବାକୁ ନିର୍ଦ୍ଦେଶ ଦେଇଛନ୍ତି ।ଏହାଛଡ଼ା ଉତ୍ତରପ୍ରଦେଶ ଉପ ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ମଧ୍ୟ ବାରଣାସୀ ଅଭିମୁଖେ ଯାତ୍ରା କରିଛନ୍ତି ।
ଯେଉଁଠି ନିଜ ସଂସଦୀୟ କ୍ଷେତ୍ରକୁ ପ୍ରଧାନମନ୍ତ୍ରୀ ମୋଦି ଜାପାନର ଧାର୍ମିକ ରାଜଧାନୀ କ୍ୟୁଟୋ ଭଳି ବିକଶିତ କରିବାକୁ ସ୍ୱପ୍ନ ଦେଖୁଛନ୍ତି ସେଠାରେ ଏତେବଡ଼ ଦୁର୍ଘଟଣାକୁ ନେଇ ସାଧାରଣ ଲୋକ ପ୍ରଶ୍ନ ଉଠାଇଛନ୍ତି ।