ଛାତ ଉପରେ ଫୁଲ ପରିବା ବଗିଚା । ପରିବାର ସଦସ୍ୟଙ୍କ ଭଳି ଯତ୍ନ ନଉଛନ୍ତି, ୧୫୦ ଅଧିକ ପ୍ରଜାତିର ଫୁଲରେ ସୁନ୍ଦର ବଗିଚା ତିଆରି କରିଛନ୍ତି ଅମୀୟ ପ୍ରସାଦ
କନକ ବ୍ୟୁରୋ: ଅନେକ ଭାବନ୍ତି ପୁଷ୍ପ ଉଦ୍ୟାନ କେବଳ ସଉକିଆ ଲୋକଙ୍କ କାମ । ଆଉ କେହି ଭାବନ୍ତି ଯେ ଏହା ସମୟ ସାପେକ୍ଷ । ପୁଷ୍ପ ଉଦ୍ୟାନଟିଏ ପ୍ରସ୍ତୁତ କରିବା ପାଇଁ ହେଲେ ବହୁତ ଜାଗା ଦରକାର ଅଳ୍ପ ଜାଗାରେ ଏହା ସମ୍ଭବପର ନୁହଁ ବୋଲି କିଛି ଲୋକଙ୍କ ଧାରଣା ରହିଛି । ହେଲେ ଏହି ଧାରଣାକୁ ଭୂଲ୍ ବୋଲି ପ୍ରମାଣିତ କରିଛନ୍ତି ପୂର୍ବତଟ ରେଳବାଇରେ ସବ୍ ଇନ୍ସପେକ୍ଟର ଭାବେ କାର୍ଯ୍ୟ କରୁଥିବା ଅମୀୟ ପ୍ରସାଦ ସାହୁ । ନିଜ ଉଦ୍ୟମରେ ଘର ଛାତ ଉପରେ ତିଆରି କରିଛନ୍ତି ଅତି ସୁନ୍ଦର ଫୁଲ ବଗିଚା ।ଏହି ଫୁଲ ବଗିଚାରେ ପ୍ରାୟ ୯୦ ରୁ ଅଧିକ ପ୍ରକାରର ଫୁଲ । ଆଉ ତା ସହ ବିଭିନ୍ନ ପନିପରିବାର କିଚେନ୍ ଗାର୍ଡେନ । ସେ ସବୁ ଗଛକୁ ନିଜ ପରିବାର ସଦସ୍ୟଙ୍କ ଭଳି ଯତ୍ନ ନିଅନ୍ତି ଅମୀୟ ।
Kanak News is now on WhatsApp
Join and get latest news updates delivered to you via WhatsApp
ଏପରିକି ଶୀତ ଛୁଟିରେ ଅଧିକ ଫୁଲ ଫୁଟିବା ସମୟ ହୋଇଥିବାରୁ ସେ ସମୟରେ ଉଦ୍ୟାନରେ ଅଧିକ ସମୟ ଦେବାକୁ ପଡିଥାଏ ସେଥିପାଇଁ ପରିବାର ସହ ଛୁଟି କଟେଇବାକୁ ମଧ୍ୟ ବାହାରକୁ ଯିବାକୁ ପସନ୍ଦ କରନ୍ତି ନାହିଁ ଅମୀୟ । ଜଣେ କାର୍ଯ୍ୟରତ ପୋଲିସ୍ ଅଧିକାରୀ ହୋଇଥିବାରୁ ବ୍ୟସ୍ତ ବହୁଳ ଜୀବନ ଭିତରେ ଉଦ୍ୟାନ ପାଇଁ ସମୟ ବାହାର କରିବା ମୁସ୍କିଲ ହୋଇପଡେ ଅମୀୟଙ୍କୁ । କିନ୍ତୁ ନିଜର ସଉକ ପାଇଁ ପୁଷ୍ପ ଉଦ୍ୟାନରେ ଗଛ ଗୁଡିକର ଯତ୍ନ ନେବାରେ ଲାଗିପଡିଥାନ୍ତି ଅମୀୟ ।
ଚାକିରୀ ସମୟ ଭିତରୁ ସମୟ କାଢି ଘରର ଛାତ ଉପରେ ଗୋଲାପ, କେତକୀ, ଡାଲିଆ, ସେବତୀ,କାଲେଂଚୁ,ଆନ୍ଥୋରିୟମ୍, ମନିପ୍ଲାଂଟ, ପିଟୁନିଆ, ସାଲଭିଆ, ପାଇସ୍ଲିଲି ଭଳି ବିଭିନ୍ନ ପ୍ରଜାତିର ପନ୍ଦର ଶହରୁ ଅଧିକ ଫୁଲ । ଏଭଳି ଏକ ପୁଷ୍ପ ଉଦ୍ୟାନ ଓ କିଚେନ୍ ଗାର୍ଡେନ କରି ନିଜର ଏକ ନିଆରା ପରିଚୟ ସୃଷ୍ଟି କରି ପାରିଛନ୍ତି ଅମୀୟ । ଯାହାକୁ ଦେଖିବା ପାଇଁ ତାଙ୍କ ନିଜ ବିଭାଗୀୟ ଅଧିକାରୀ ଓ ଅନ୍ୟ ବିଶେଷ ବ୍ୟକ୍ତି ମାନେ ତାଙ୍କ ଘରକୁ ଛୁଟି ଆସନ୍ତି । ତାଙ୍କ ବିଭାଗରେ ଏଥିପାଇଁ ତାଙ୍କୁ ଢେର ପ୍ରଂଶସା ଓ ଅନେକ ଜାଗାରେ ପୁରସ୍କୃତ ମଧ୍ୟ ହୋଇଛନ୍ତି ।