ମହାନଦୀରେ ବନ୍ୟା ସ୍ଥିତି ନେଇ ସତର୍କ କଲେ ସରକାର । ଆସନ୍ତାକାଲି ସକାଳ ୫ଟା ସୁଦ୍ଧା ମୁଣ୍ଡଳିରେ ପହଞ୍ଚିବ ହୀରାକୁଦ ଡ୍ୟାମର ବନ୍ୟା ଜଳ । ଉପରମୁଣ୍ଡରେ ବର୍ଷା ଯୋଗୁଁ ଖୋଲିଲା ହୀରାକୁଦର ୪୬ ଗେଟ୍, ବନ୍ୟା ସ୍ଥିତିର ମୁକାବିଲା ପାଇଁ ୬ ବରିଷ୍ଠ ଆଇଏଏସଙ୍କୁ ସ୍ୱତନ୍ତ୍ର ଦାୟିତ୍ୱ ।
କନକ ବ୍ୟୁରୋ: ଉପର ମୁଣ୍ଡରେ ଲଗାଣ ବର୍ଷା ଫଳରେ ସମ୍ବଲପୁରସ୍ଥିତ ହୀରାକୁଦ ଜଳଭଣ୍ଡାରରେ ଘଂଟାକୁ ୮ ସେଂଟିମିଟର ବଢୁଛି ଜଳସ୍ତର । ଏହି ପାଣି ଆସନ୍ତାକାଲି ମୁଣ୍ଡୁଳିରେ ପହଂଚିବା ପରେ ମହାନଦୀ ଅବବାହିକା ଏବଂ ଉପକୂଳ ଅଂଚଳରେ ବନ୍ୟା ପରିସ୍ଥିତି ସୃଷ୍ଟି ହେବା ନେଇ ଆଶଙ୍କା ସୃଷ୍ଟି ହୋଇଛି । ଏହାକୁ ଦୃଷ୍ଟିରେ ରଖି ସମସ୍ତ ଜିଲ୍ଲାକୁ ଆଲର୍ଟରେ ରଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ହୀରାକୁଦ ଜଳଭଣ୍ଡାରରେ ଯେତିକି ଯେତିକି ଗେଟ ଖୋଲୁଛି, ଉପକୂଳ ତଥା ତଳିଆ ଅଂଚଳବାସୀଙ୍କ ମନରେ ସେତିକି ଛନକା ପଶୁଛି । କାରଣ ହୀରାକୁଦ ଜଳଭଣ୍ଡାରର ଜଳଧାରଣ କ୍ଷମତା ବଢୁଥିବା କାରଣରୁ ଡ୍ୟାମର ୪୬ଟି ଗେଟ ଖୋଲାସରିଛି । ତେଣୁ ଏହି ବନ୍ୟା ଜଳ ଆସନ୍ତାକାଲି ସକାଳ ୫ଟା ସୁଦ୍ଧା କଟକସ୍ଥିତ ମୁଣ୍ଡଳିରେ ପହଁଚିବ । ଏହି ସମୟରେ ମୁଣ୍ଡଳିରେ ୧୦ ଲକ୍ଷରୁ ଅଧିକ କ୍ୟୁସେକ ଜଳ ପ୍ରବାହିତ ହେବ ।
ସେହିପରି ଆଜି ହୀରାକୁଦରୁ ଛଡା ଯାଇଥିବା ପାଣି ୩୬ ଘଂଟା ପରେ ମୁଣ୍ଡଳିରେ ପହଂଚିବ । ତେଣୁ ମହାନଦୀ ଅବବାହିକାରେ ବନ୍ୟା ଆଶଙ୍କା ସୃଷ୍ଟି ହୋଇଛି । ବିଶେଷ କରି ଉପକୂଳ ଜିଲ୍ଲା ଗୁଡିକରେ ବନ୍ୟା ଆଶଙ୍କା ରହିଛି । ଏହାକୁ ଦୃଷ୍ଟିରେ ରଖି ସମସ୍ତ ଜିଲ୍ଲାକୁ ଆଲର୍ଟରେ ରଖାଯାଇଛି । ବିଶେଷକରି ତଳିଆ ଅଂଚଳର ଲୋକେ ସମ୍ଭାବ୍ୟ ବନ୍ୟାକୁ ନେଇ ଭୟ ଭିତରେ ଅଛନ୍ତି ।
ସେପଟେ ବନ୍ୟା ସ୍ଥିତିର ତଦାରଖ ପାଇଁ ୬ଜଣ ବରିଷ୍ଠ ଆଇଏଏସ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ଆଇଏଏସ ହେମନ୍ତ ଶର୍ମାଙ୍କୁ କେନ୍ଦ୍ରାପଡା, ଡି କେ ସିଂହଙ୍କୁ କଟକ, ରାଜସ୍ୱ ସଚିବ ବିଷ୍ଣୁ ପ୍ରସାଦ ସେଠୀଙ୍କୁ ଭଦ୍ରକ, ବିଶାଲ ଦେବଙ୍କୁ ବାଲେଶ୍ୱର, ବୀର ବିକ୍ରମ ଯାଦବଙ୍କୁ ଯାଜପୁର, ସତ୍ୟବ୍ରତ ସାହୁଙ୍କୁ ଜଗତସିଂହପୁର ଓ କେନ୍ଦ୍ରାଂଚଳ ଆରଡିସିଙ୍କୁ ପୁରୀ ଦାୟିତ୍ୱ ଦିଆଯାଇଛି । ଏହି ଅଧିକାରୀମାନଙ୍କୁ ତୁରନ୍ତ ସମ୍ପୃକ୍ତ ଜିଲ୍ଲା ଗସ୍ତ କରିବା ପାଇଁ କୁହାଯାଇଛି ।
ହୀରାକୁଦ ଡ୍ୟାମରେ ମୋଟ୍ ୯୮ଟି ଗେଟ୍ ରହିଛି । ହୀରାକୁଦ ଜଳଭଣ୍ଡାରରେ ଘଂଟାକୁ ୮ ସେଂଟିମିଟର ବଢୁଛି ଜଳସ୍ତର । ଡ୍ୟାମର ସର୍ବୋଚ୍ଚ ଜଳଧାରଣ କ୍ଷମତା ରହିଛି ୬୩୦ ଫୁଟ୍ । ବର୍ତମାନ ଡ୍ୟାମର ଜଳସ୍ତର ରହିଛି ୬୨୬.୯୭ ଫୁଟ । ଜଳସ୍ତର ବଢିବା ପରେ ଡ୍ୟାମର ୪୬ଟି ଗେଟ୍ ଖୋଲା ଯାଇଛି । ପ୍ରତି ସେକେଣ୍ଡରେ ଜଳଭଣ୍ଡାରକୁ ୯ ଲକ୍ଷ ୧୧ ହଜାର ୨୭୯ କ୍ୟୁସେକ୍ ଜଳ ପ୍ରବେଶ କରୁଛି । ପ୍ରତି ସେକେଣ୍ଡରେ ଜଳଭଣ୍ଡାରରୁ ୭ ଲକ୍ଷ ୫୮ ହଜାର ୮୦୮କ୍ୟୁସେକ୍ ଜଳ ନିଷ୍କାସିତ ହେଉଛି ।