କନକ ବ୍ୟୁରୋ : ବୁଡାଇ ଦେଇଛି ଲଘୁଚାପ ବର୍ଷା । ରାଜ୍ୟର ବିଭିନ୍ନ ସ୍ଥାନରେ ଜଳବନ୍ଦୀ ହୋଇଛନ୍ତି ବହୁ ସଂଖ୍ୟାରେ ଲୋକ । କେଉଁଠି ଘର ଭିତରେ ପାଣି ପଶି ଯାଇଛି ତ ଆଉ କେଉଁଠି ଗାଁ ଦାଣ୍ଡରେ ଲହଡି ଭାଙ୍ଗୁଛି ବର୍ଷା ପାଣି । କେତେକ ସ୍ଥାନରେ ରାସ୍ତା ଉପରେ ପ୍ରଖର ସ୍ରୋତରେ ପାଣି ଚାଲୁଛି । ଫଳରେ ସମ୍ପୂର୍ଣ୍ଣ ଅଞ୍ଚଳ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ପୁରୀ ଜିଲ୍ଲା କଣାସ ଅଂଚଳର ଏକ ଗାଁର ସ୍ଥିତି ବୟାନ କରୁଛି ଅତ୍ୟଧିକ ଲଘୁଚାପ ବର୍ଷା କେତେ ଭୟଙ୍କର ହୋଇପାରେ । ଗାଁଦାଣ୍ଡରେ ଅଣ୍ଟାଏ ଅଣ୍ଟାଏ ପାଣି, ଘର ଭିତରେ ବି ଲହଡି ମାରୁଛି ପାଣି । ମଲାଗୁଣି ନଇକୁ ସଂଯୋଗ କରୁଥିବା ଓଇଖିଆ ନଦୀରେ ୫୦ ଫୁଟର ଘାଇ ସୃଷ୍ଟି ହେବା ପରେ ଏହି ଅବସ୍ଥା ସୃଷ୍ଟି ହୋଇଛି ।
ହଳଦୀ ପଦର, ତଇଲା, ଅଭୟପୁର, ବରଗଡ଼, ବାରମାଣ, ତୋଟପଡ଼ା ଗାଁ ଏବେ ପାଣି ଘେରରେ ।
ସେପଟେ ଲଗାଣ ବର୍ଷାରେ ବେହାଲ ଢେଙ୍କାନାଳ ଜିଲ୍ଲାର କାମାକ୍ଷାନଗର ଉପଖଣ୍ଡ । ଆଣ୍ଠୁଏ ପାଣି ଭିତରେ ସମସ୍ତଙ୍କ ଚିନ୍ତା ପିଇବା ପାଣି ପାଇବେ କେମିତି । ସେଥିପାଇଁ ଦୂର ଜାଗାକୁ ଯାଇ ପାନୀୟ ଜଳ ସଂଗ୍ରହ କରୁଛନ୍ତି । ରାମିଆଳ ଓ ତାର ଶାଖାନଦୀରେ ବନ୍ୟା ସ୍ଥିତି ପାଇଁ ଭୁବନ ବ୍ଲକର ୩ଟି ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଛି । ଜୟପୁର, ମାଳପୁରା ଓ ଦଧିସିଂଗା ଗାଁ ଜଳବନ୍ଦୀ ଅବସ୍ଥାରେ ରହିଛି । ସେପଟେ ଭୁବନ ଜୟପୁରରେ ବି ସମାନ ସ୍ଥିତି । ପାଣି ଘେରରେ ଫସିରହିଛନ୍ତି ପ୍ରାୟ ୨ହଜାର ଲୋକ ।
ଆଠଗଡରେ ମଧ୍ୟ ଚାରିଆଡେ ପାଣି ଆଉ ପାଣି । ଗୋପୀନାଥପୁର ଠାରେ କଂଟିଆ ନଇରେ ବଢି ପାଣି ଆସିବାରୁ ଏହି ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି । ବାଇଲୋ ଓ ନୂଆଗାଁ ଶବରସାହି ରାସ୍ତା ଉପରେ ୪ଫୁଟ ଉଚ୍ଚର ବନ୍ୟା ପାଣି ପ୍ରବାହିତ ହେଉଛି । ଲୋକେ ଛାତ ଉପରେ ଏବଂ ଉଚ୍ଚ ସ୍ଥାନରେ ଆଶ୍ରୟ ନେବାକୁ ବାଧ୍ୟ ହେଉଛନ୍ତି । ଏଥିସହ ଜଳମଗ୍ନ ହୋଇପଡ଼ିଛି ଶହ ଶହ ଏକର ଚାଷ ଜମି । ଘର ଭିତରେ ପାଣି ପଶିଯିବାରୁ ଲୋକେ ଛାତ ଉପରେ ଆଶ୍ରୟ ନେବାକୁ ବାଧ୍ୟ ହେଉଛନ୍ତି ।
ପାଣିରେ ବୁଡିଲା ଉଦଳା । ପୋଖରୀ ବନିଲା ଗାଁଦାଣ୍ଡ । ଲଘୁଚାପ ବର୍ଷାରେ ମୟୁରଭଂଜ ଉଦଳା ଅଂଚଳରେ ଏଭଳି ପରିସ୍ଥିତି ସୃଷ୍ଟି ହୋଇଛି । ବିଶେଷକରି କପ୍ତିପଦା ଉପଖଣ୍ଡରେ ନଦୀର ଜଳସ୍ତର ବୃଦ୍ଧି ପାଇବାରୁ ବ୍ଳକର ଭୀମତାଳି ପଂଚାୟତ, ଜାଲଦା ଏବଂ ମଦନାପାଳ ଅଂଚଳ ପ୍ରଭାବିତ ହୋଇଛି । ଏଥିସହ ଲୋକେ ଜଳବନ୍ଦୀ ଅବସ୍ଥାରେ ରହିଛନ୍ତି । ଲୋକଙ୍କ ଘର ଭିତରେ ପଶିଯାଇଛି ପାଣି । ଲୋକେ ସେମାନଙ୍କ ଆସବାବପତ୍ର ଧରି ଘର ଛାଡ଼ୁଥିବାର ଚିତ୍ର ଦେଖିବାକୁ ମିଳିଛି । ସୋନ ନଦୀରେ ଜଳସ୍ତର ବୃଦ୍ଧି କାରଣରୁ କପ୍ତିପଦା-ଔପଦା ଯୋଗାଯୋଗ ବିଚ୍ଛିନ୍ନ ହୋଇଛି । ସେପଟେ କରଂଜିଆରେ ବି ଲଗାତାର ବର୍ଷା ପାଇଁ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଥିଲା । ଦେଓ ନଦୀବନ୍ଧରେ ଜଳସ୍ଥର ବୃଦ୍ଧି ପାଉଥିବାରୁ ନିକଟସ୍ଥ ସ୍କୁଲ ଗୁଡିକରେ ବି ପାଣି ପଶିଯାଇଛି ।