କନକ ବ୍ୟୁରୋ: ସିନେମାର କାହାଣୀ ପରି ୱିଙ୍ଗ କମାଣ୍ଡର ଅଭନନ୍ଦନ ବର୍ତ୍ତମାନଙ୍କ ଜୀବନ କାହାଣୀ ମଧ୍ୟ ଏକାପରି ଥିଲା । ୧୯୯୯ କାର୍ଗିଲ ଯୁଦ୍ଧର କାହାଣୀକୁ ନେଇ ତିଆରି ହୋଇଥିବା ତାମିଲ ଫିଲ୍ମ ‘କାଟରୁ ବେଲ୍ଲିଦାୟୀ’ରେ ଯେଉଁ ସବୁ ଦୃଶ୍ୟ ଦେଖାଯାଇଥିଲା ତାହା ସତସତିକା ଘଟିଥିଲା ଅଭିନନ୍ଦନଙ୍କ ସହ । ତେବେ ତାମିଲ ଫିଲ୍ମର କନସଲଟାଂଟ୍ ଭାବେ କାମ କରିଥିଲେ ବାୟୁସେନା ୱିଙ୍ଗ କମାଣ୍ଡର ଅଭିନନ୍ଦନ ବର୍ତ୍ତମାନଙ୍କ ବାପା ଏସ୍. ବର୍ତ୍ତମାନ । ଜାଣିଲେ ଆଶ୍ଚର୍ଯ୍ୟ ହେବେ, ଏହି ଫିଲ୍ମରେ ବି ଥିଲା ପାକିସ୍ତାନରେ ବନ୍ଦୀ ଜଣେ ବାୟୁସେନା ପାଇଲଟଙ୍କ କାହାଣୀ । ଆଉ ଉକ୍ତ କାହାଣୀ ନିଜ ପୁଅ ସହ ସତ ହୋଇଗଲା ।
Kanak News is now on WhatsApp
Join and get latest news updates delivered to you via WhatsApp
ସ୍ୱାଭାବିକ ଭାବେ ଫିଲ୍ମ ତିଆରି କଲାବେଳେ ବାପା ଏସ. ବର୍ତମାନ ହୁଏତ କେବେ କଳ୍ପନା ବି କରିନଥିବେ ଯେ, ବଡ ପରଦାର କାହାଣୀ ଦିନେ ସତ ପାଲଟିଯିବ । ଗୋଟିଏ କାଳ୍ପନିକ କଥାବସ୍ତୁ ତାଙ୍କ ନିଜ ଜୀବନରେ ଘଟିଯିବ । ପାଇଲଟ୍ ପୁଅ ପାକିସ୍ତାନରେ ପଣବନ୍ଦୀ ହେବ ।
୨୭ ଫେବ୍ରୁଆରୀ ୨୦୧୯ରେ ଭାରତୀୟ ବାୟୁସୀମାରେ ପଶି ପାକିସ୍ତାନୀ ଲଢୁଆ ବିମାନ ସାମରିକ ପ୍ରତିଷ୍ଠାନକୁ ଟାର୍ଗେଟ କଲାବେଳେ ସାମ୍ନାରେ ଥିଲେ ବାୟୁସେନାର ବୀର ଯୋଦ୍ଧା । ମିଗ୍-୨୧ ବାଇସନ୍ ବିମାନରେ ପାକିସ୍ତାନୀ ବିମାନକୁ କଡା ଟକ୍କର ଦେଇଥିଲେ ୱିଙ୍ଗ କମାଣ୍ଡର ଅଭିନନ୍ଦନ ବର୍ତ୍ତମାନ । ତାଙ୍କରି ଆକ୍ରମଣରେ ଖସିପଡିଥିଲା ଭାରତ ମାଟିରେ ଆକ୍ରମଣ କରିବାକୁ ସାହସ କରୁଥିବା ପାକିସ୍ତାନୀ ଏଫ-୧୬ ବିମାନ । ହେଲେ ପାକିସ୍ତାନୀ ବିମାନକୁ ପିଛା କରି ପିଓକେ ଭିତରକୁ ପଶିଯାଇଥିଲେ ଅଭିନନ୍ଦନ । ଦୁର୍ଭାଗ୍ୟରୁ ତାଙ୍କ ବିମାନ ମଧ୍ୟ ଶତ୍ରୁ ଗୁଳିର ଶିକାର ହେଲା, ଆଉ ପାରାଚ୍ୟୁଟରେ ତଳକୁ ଖସି ପାକିସ୍ତାନ କବଜାରେ ପଡିଗଲେ ଭାରତୀୟ ପାଇଲଟ୍ ଅଭିନନ୍ଦନ ।
୨୦୧୧ରେ ଏକ ଫୁଡ ଟ୍ରାଭେଲ ଶୋରେ ଅଭିନନ୍ଦନ ଥରେ କହିଥିଲେ ଯେ, ବେପରୁଆ ମନୋଭାବ ହିଁ ଜଣଙ୍କୁ ଲଢୁଆ ପାଇଲଟ୍ କରିପାରିବ । ଏହି ପଦିଏ କଥା ହିଁ ସେତେବେଳେ ଅଭିନନ୍ଦନଙ୍କ ସାହସ ଓ ଦକ୍ଷତାର ପ୍ରମାଣ ଦେଇଥିଲା ।
ତାମିଲନାଡୁର ଅଭିନନ୍ଦନଙ୍କ ପରିବାର ଗତ ତିନି ପୀଢି ହେଲା ଭାରତୀୟ ବାୟୁସେନାରେ ରହି ଦେଶମାତୃକାର ସେବା କରିଆସୁଛନ୍ତି । ତାଙ୍କ ଜେଜେବାପା ଦ୍ୱିତୀୟ ବିଶ୍ୱଯୁଦ୍ଧ ସମୟରେ ବାୟୁସେନାରେ ଥିଲେ । ତାଙ୍କ ବାପା କାର୍ଗିଲ ଯୁଦ୍ଧ ସମୟରେ ଏୟାର ମାର୍ସାଲ ଥିଲେ । ୨୦୦୪ରେ ଭାରତୀୟ ବାୟୁସେନାରେ ପାଇଲଟ୍ ଭାବେ ଯୋଗ ଦେଇଥିଲେ ଅଭିନନ୍ଦନ । ତାଙ୍କ ପତ୍ନୀ ମଧ୍ୟ ସ୍କ୍ୱାର୍ଡନ ଲିଡର ଭାବେ ବାୟୁସେନାରୁ ଅବସର ନେଇଛନ୍ତି । ତାଙ୍କ ଭାଇ ମଧ୍ୟ ଭାରତୀୟ ବାୟୁସେନାରେ ଅଛନ୍ତି । ଦେଶର ସୁରକ୍ଷା ପାଇଁ ସମର୍ପିତ ପୂରା ପରିବାର ।
ତେବେ ଭାରତୀୟ ପାଇଲଟ ଅଭିନନ୍ଦନ ପାକିସ୍ତାନରେ ବନ୍ଦୀ ହେବାପରେ ତାଙ୍କର କେତେକ ସମ୍ବେଦନଶୀଳ ଫଟୋ ଭାଇରାଲ ହୋଇଥିଲା । ତାଙ୍କ ମୁହଁରେ ଥିଲା ଗଭୀର କ୍ଷତ, ରକ୍ତ ଜୁଡୁବୁଡୁ ଚେହେରା । ସେ ଫଟୋ ଯେତିକି ସମବେଦନା ସାଉଁଟିଥିଲା ତାଠାରୁ ଅଧିକ ପ୍ରଶଂସା ପାଇଥିଲା ପାକିସ୍ତାନୀ ସେନା ଆଗରେ ନିର୍ଭୟରେ ଅଭିନନ୍ଦନ ରଖୁଥିବା ଉତ୍ତରର ଭିଡିଓ । ଶତ୍ରୁ ଦେଶର ସେନାଙ୍କ ଅକଥନୀୟ ଅତ୍ୟାଚାର ସତ୍ତେ୍ୱ ବି ଶତ୍ରୁ ସାମ୍ନାରେ ଦେଶର ଗୋପନୀୟତାକୁ ପ୍ରକାଶ କରିନଥିଲେ ଅଭିନନ୍ଦନ ।