ଝାରଖଣ୍ଡରେ ମୁସଲିମ୍ ଯୁବକଙ୍କୁ ପିଟି ପିଟି ହତ୍ୟା କରିଥିବା ଘଟଣା ! ୧୧ ଜଣ ଅଭିଯୁକ୍ତଙ୍କୁ ଗିରଫ କଲା ପୋଲିସ୍ , ୨ ପୋଲିସ୍ ଅଧିକାରୀ କାର୍ଯ୍ୟରୁ ନିଲମ୍ବିତ ।
ଝାରଖଣ୍ଡର ଏକ ଗାଁରେ ଜଣେ ୨୪ ବର୍ଷୀୟ ଯୁବକଙ୍କୁ ଭୀଡ ପିଟି ପିଟି ମାରିଥିବା ଘଟଣାରେ ୧୧ ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ୍ । ଏହାସହ ୨ ପୋଲିସ୍ ଅଧିକାରୀଙ୍କୁ ମଧ୍ୟ ସସପେଣ୍ଡ୍ କରାଯାଇଛି । ଗତ ମଙ୍ଗଳବାର ମୋଟରସାଇକେଲ୍ ଚୋରୀ କରିବା ଅଭିଯୋଗରେ ୨୪ ବର୍ଷୀୟ ତବରେଜ୍ ଅନ୍ସାରୀଙ୍କୁ ପିଟି ପିଟି ହତ୍ୟା କରାଯାଇଥିଲା । ତେବେ ଏହି ଘଟଣାରେ ପୋଲିସ୍ ଆଉ ଜଣେ ଅଭିଯୁକ୍ତଙ୍କୁ ମଧ୍ୟ ଖୋଜୁଛି । ପରିବାର ଲୋକଙ୍କ କହିବାନୁସାରେ ତବରେଜ୍ ଗତ ମଙ୍ଗଳବାର ନିଜ ସାଙ୍ଗମାନଙ୍କ ସହ ଜମଶେଦପୁରର ସରାୟକେଲା ଖରସାଂବା ଜିଲ୍ଲାର ଧତକିଡିହ ଗାଁ ଯାଇଥିଲେ । ଏହି ସମୟରେ ଘରଠାରୁ ୫ କି.ମି. ଦୂରରେ ତାଙ୍କ ଉପରକୁ ଆକ୍ରମଣ କରାଯାଇଥିଲା । ଲୋକଙ୍କ ଅଭିଯୋଗ ଥିଲା ସେ ତବରେଜ୍ ମୋଟର ସାଇକେଲ୍ ଚୋରି କରିଥିଲେ । ଭିଡ ଏକ ଖମ୍ବରେ ତାଙ୍କୁ ବାନ୍ଧି ୧୮ ଘଣ୍ଟା ସମୟ ପର୍ଯ୍ୟନ୍ତ ତାଙ୍କୁ ପିଟିଥିଲା । ଯାହାର ଏକ ଭିଡିଓ ଏବେ ଖୁବ୍ ଭାଇରାଲ୍ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଅଭିଯୁକ୍ତ ଯୁବକଙ୍କୁ ‘ଜୟ ଶ୍ରୀରାମ’ ଏବଂ ‘ଜୟ ହନୁମାନ’ ନାରା ଲଗାଇବା ପାଇଁ ମଧ୍ୟ ବାଧ୍ୟ କରୁଥିବା ଦେଖାଦେଇଛି । ଚେତାଶୂନ୍ୟ ହେବା ପରେ ଯୁବକଙ୍କୁ ପୋଲିସ୍ ହାତରେ ଧରାଇ ଦେଇଥିଲେ ଅଭିଯୁକ୍ତ । ହାଜତରେ ୪ ଦିନ ରହିବା ପରେ ତବରେଜ୍ ଙ୍କୁ ଯେତେବେଳେ ହସ୍ପିଟାଲ୍ ନିଆଗଲା ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ପରିବାର ଲୋକଙ୍କ କହିବାନୁସାରେ ବିନତୀ କରିବା ପରେ ମଧ୍ୟ ପୋଲିସ୍ ଯୁବକଙ୍କୁ ଉପଚାର ପାଇଁ ଷ୍ଟେପ୍ ନେଇନଥିଲା ଏବଂ ପରିବାରକୁ ମିଶିବାକୁ ମଧ୍ୟ ଦିଆଯାଇନଥିଲା । ହସ୍ପିଟାଲ୍ ନେବା ପୂର୍ବରୁ ହିଁ ସେ ଆରପାରିକୁ ଚାଲିଯାଇଥିଲା । ପୋଲିସ୍ ଏବଂ ଡାକ୍ତରଙ୍କ ସମେତ ଏହି ଘଟଣାରେ ଲିପ୍ତ ଥିବା ଅନ୍ୟ ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପରିବାର ତରଫରୁ ଗୁହାରୀ କରାଯାଇଛି ।