ବାଣ ଫୁଟାଇବା ଓ ବିକ୍ରି : ଆଜି ଆସିପାରେ ଏସଆରସିଙ୍କ ଗାଇଡଲାଇନ
ଗତକାଲି ହାଇକୋର୍ଟ ଶୁଣାଣି କରି ସ୍ୱତନ୍ତ୍ର ରିଲିଫ କମିଶନରଙ୍କୁ ଗାଇଡଲାଇନ ଜାରି କରିବାକୁ ଦେଇଛନ୍ତି ନିର୍ଦ୍ଦେଶ; ପୂର୍ବରୁ ସେପ୍ଟେମ୍ବର ୩୦ରେ ବାଣ ବିକ୍ରି ଓ ଫୁଟାଇବା ଉପରେ କଟକଣା ଲଗାଇଛନ୍ତି ରାଜ୍ୟ ସରକାର
କନକ ବ୍ୟୁରୋ : ଦୀପାବଳିରେ ବାଣ ବିକ୍ରି ଓ ଫୁଟାଇବା ନେଇ ଆଜି ଆସିପାରେ ଗାଇଡଲାଇନ୍ । ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଏସଆରସି ଆଜି ଏହି ଗାଇଡ ଲାଇନ୍ ଜାରି କରିପାରନ୍ତି । କରୋନା ସଂକ୍ରମଣ ପାଇଁ ଗତମାସ ୩୦ ତାରିଖରେ ରାଜ୍ୟ ସରକାର ବାଣ ଫୁଟାଇବା ଏବଂ ବିକ୍ରି ଉପରେ ପ୍ରତିବନ୍ଧକ ଲଗାଇଥିଲେ । ସରକାରଙ୍କ ଏହି ନିଷ୍ପତିକୁ ଚ୍ୟାଲେଞ୍ଜ କରି ବାଣ ବ୍ୟବସାୟୀ ସଂଘ ହାଇକୋର୍ଟଙ୍କ ଦ୍ୱାରସ୍ଥ ହୋଇଛିି । ଆବେଦନର ଶୁଣାଣି କରି ହାଇକୋର୍ଟ ଏସଆରସିଙ୍କୁ ଗାଇଡ୍ ଲାଇନ ଜାରି କରିବାକୁ ନିର୍ଦ୍ଦେଶ ଦେଇଛନ୍ତି । ଗାଇଡ୍ ଲାଇନ୍ ପ୍ରସ୍ତୁତ ବେଳେ ସୁପ୍ରିମକୋର୍ଟ ଏବଂ ଏନଜିଟିଙ୍କ ଗାଇଡ୍ ଲାଇନ୍ ଉପରେ ଧ୍ୟାନ ଦେବାକୁ କହିଛନ୍ତି ହାଇକୋର୍ଟ । ସୋମବାର ସୁଦ୍ଧା ନୂଆ ଗାଇଡ ଲାଇନ ବାବଦରେ ଏସଆରସିଙ୍କୁ ହାଇକୋର୍ଟରେ ଅବଗତ କରାଇବାକୁ କୁହାଯାଇଥିବା ସୂଚନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଖୋର୍ଦ୍ଧା ଜିଲ୍ଲା ଜଟଣୀ ହେଉଛି ବାଣ ବ୍ୟବସାୟର ପେଣ୍ଠସ୍ଥଳ। ପୁରୀ, ଗଞ୍ଜାମ, ନୟାଗଡ଼, କନ୍ଧମାଳ ଆଦି ଜିଲ୍ଲାର ଲୋକେ ଏଠାରୁ ବାଣ କିଣି ଖୁଚୁରା ବେପାର କରନ୍ତି । ରାଜ୍ୟର ବିଭିନ୍ନ ସ୍ଥାନରେ ତିଆରି ହେଉଥିବା ବାଣ ସହିତ ତାମିଲନାଡ଼ୁ ଶିବକାଶୀରୁ ବିପୁଳ ବାଣ ଏଠାକୁ ଆମଦାନି ହୋଇଥାଏ । ଜଟଣୀରେ ପ୍ରାୟ ୧୦ରୁ ଅଧିକ ପାଇକାରୀ ବେପାରୀ ଏହି ବେପାର କରନ୍ତି। ବର୍ଷସାରା ବିବାହ, ବ୍ରତ ଓ ଯାନିଯାତ୍ରା ପାଇଁ ଲୋକେ ଏଠାରୁ ବାଣ କିଣନ୍ତି । ତେବେ ପାର୍ବଣ ସମୟରେ ଏହି ବେପାର ଭଲ ହୁଏ । ବ୍ୟବସାୟୀମାନେ ମଧ୍ୟ ସରକାରଙ୍କୁ ଏଥିପାଇଁ ଲକ୍ଷ ଲକ୍ଷ ଟଙ୍କାର ଟିକସ ଦିଅନ୍ତି । ମାତ୍ର ଗତବର୍ଷଠାରୁ ଜଟଣୀରେ ବାଣ ବେପାର ମାନ୍ଦା ପଡ଼ିଛି। ମହାମାରୀ କରୋନା ପାଇଁ କଟକଣା ଲାଗୁ ହେଉଥିବାରୁ ବେପାର ଠପ୍ ହୋଇଯାଇଛି । ଚଳିତବର୍ଷ କିଛି ବେପାର ହେବ ବୋଲି ବ୍ୟବସାୟୀମାନେ ଆଶା କରିଥିଲେ ।
କରୋନା ସଂକ୍ରମଣ ହ୍ରାସ ପାଇଥିବାରୁ ଓ କିଛି କିଛି କଟକଣା କୋହଳ ହୋଇଥିବାରୁ ବେପାରୀମାନେ ଭଲ ଆଶା କରିଥିଲେ। ମାତ୍ର ଦଶହରା କଟକଣା ଭିତରେ ଗଲା । ରାବଣ ପୋଡ଼ି ହେଲା ନାହିଁ । ତେଣୁ ବାଣ ବେପାର ହେଲା ନାହିଁ । ସେହିଭଳି ଗଜଲକ୍ଷ୍ମୀ ପୂଜା ବି କଟକଣାରେ ଶେଷ ହୋଇଛି। ଏବେ ଦୀପାବଳିକୁ ଅପେକ୍ଷା । ଯଦି ଦୀପାବଳି କଟକଣା ଭିତରେ ଚାଲିଯାଏ, ପାର୍ବଣ ଋତୁ ଆପାତତଃ ସରିଯିବ । ଦୀପାବଳି ପାଖେଇ ଆସିଲାଣି । କିନ୍ତୁ ବାଣ ବେପାର ଉପରେ ଲାଗୁ ହୋଇଥିବା କଟକଣା ଓ ତାହାକୁ ନେଇ ଉଚ୍ଚ ନ୍ୟାୟାଳୟରେ ଚାଲିଥିବା ମାମଲାର ଅନ୍ତ ହୋଇପାରିନାହିଁ । ଗତବର୍ଷ କଟକଣା ପାଇଁ ବ୍ୟବସାୟୀମାନେ ଆମଦାନି କରିଥିବା ବାଣ ବିକ୍ରି କରିପାରିନଥିଲେ । ଫଳରେ ବହୁ କ୍ଷତି ସହିଥିଲେ । ଏମିତିକି ଗତବର୍ଷ କିଣିଥିବା ବାଣ ପାଇଁ ଋଣ କରିଥିବା ଟଙ୍କାର ସୁଧ ୧୮ ମାସ ହେଲା ଗଣୁଛନ୍ତି । ଗତବର୍ଷର କ୍ଷତ ଶୁଖି ନଥିବା ବେଳେ ଚଳିତ ବର୍ଷର ଆଶଙ୍କା ସେମାନଙ୍କୁ ଆତଙ୍କିତ କରି ରଖିଛି ।