ବାଣ ବ୍ୟବସାୟୀଙ୍କ ଘରେ ବିସ୍ଫୋରଣ । ୬ ମୃତ, ଏବେ ବି କୋଠା ତଳେ ଚାପି ହୋଇ ରହିଛନ୍ତି ଅନେକ ଲୋକ

କନକ ବ୍ୟୁରୋ : ବିହାରର ସାରଣ ଜିଲ୍ଲାରେ ଜଣେ ବାଣ ବ୍ୟବସାୟୀଙ୍କ ଘରେ ବିସ୍ଫୋରଣ ହୋଇଛି । ବିସ୍ଫୋରଣ ପରେ ଘରେ ନିଆଁ ଲାଗିଯିବାରୁ ଘରଟି ସମ୍ପୂର୍ଣ୍ଣ ଭାବେ ଜଳି ଯାଇଛି । ଏଭଳି ଘଟଣା ସାରଣ ଜିଲ୍ଲାର ଖେରା ଥାନା ଅଞ୍ଚଳ ଖୁଦାଇ ବାଗ ଗାଁରେ ଘଟିଛି । ଏଠାରେ ବାଣ ବ୍ୟବସାୟୀ ରବିଶ ହୋସେନଙ୍କ ଘରେ ବିସ୍ଫୋରଣ ହୋଇଛି । ଏହି ବିସ୍ଫୋରଣରେ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଲୋକ ଭଙ୍ଗା କୋଠାତଳେ ଚାପି ହୋଇ ରହିଥିବା ଅନୁମାନ କରାଯାଉଛି । ଏଭଳି ସୂଚନା ପାଇବା ପରେ ସ୍ଥାନୀୟ ପ୍ରଶାସନ ତରଫରୁ ଉଦ୍ଧାର କାର୍ଯ୍ୟ ଜାରି ରହିଛି ।
ଘରଟି ନଦୀକୂଳରେ ହୋଇଥିବାରୁ ବିସ୍ଫୋରଣ ପରେ ଏହି ଜଳିବା ସହ ଘରର କିଛି ଅଂଶ ନଦୀମଧ୍ୟକୁ ଗଳିପଡିଛି । କୁହାଯାଉଛି କି ବିସ୍ଫୋରଣ ବେଳେ ଘର ଭିତରେ ୧୦ ରୁ ଅଧିକ ଲୋକ ଥିଲେ   । ସେମାନଙ୍କ ମଧ୍ୟରୁ ୬ ଜଣଙ୍କର ମୃତଦେହ ଉଦ୍ଧାର କରାଯାଇଥିବା ବେଳେ ଅନ୍ୟମାନେ ଗଳିପଡିଥିବା ଘରତଳେ ଚାପି ହୋଇ ରହିଥିବା ଆଶଂକା କରାଯାଉଛି ।

କୁହାଯାଉଛି କି, ଯେଉଁ ଘରେ ବିସ୍ଫୋରଣ ହୋଇଛି ସେହି ଘର ଭିତରେ ବାଣ ପ୍ରସ୍ତୁତ କରାଯାଉଥିଲା । ଘର ଭିତରେ ଲଗାତର ୧ ଘଂଟା ଧରି ବାଣଗୁଡିକ ବିସ୍ଫୋଟିତ ହୋଇଥିଲା । ଫଳରେ ସ୍ଥାନୀୟ ଲୋକ ଓ ପୋଲିସ ପ୍ରଶାସନ ଘର ଭିତରକୁ ପଶିବାରେ ଅକ୍ଷମ ହୋଇଥିଲେ ।

Bihar | Six people dead after a house collapsed due to a blast in Chhapra. Efforts are being made to rescue people trapped under the debris. We're investigating the reason behind the explosion. Forensic team and Bomb disposal squad have also been called: Santosh Kumar, Saran SP pic.twitter.com/bCJgEMgZHf

— ANI (@ANI) July 24, 2022

ସାରଣ ଜିଲ୍ଲା ଏସପି ସନ୍ତୋଷ କୁମାର ଜାତୀୟ ଗଣମାଧ୍ୟମ ଏଏନଆଇକୁ କହିଛନ୍ତି କି ଏହି ବିସ୍ଫୋରଣରେ ୬ ଜଣଙ୍କର ମୃତ୍ୟୁ ହୋଇଛି ଓ ଏହାସହ କିଛି ଲୋକ ଘର ତଳେ ଚାପି ହୋଇ ରହିଛନ୍ତି । ହେଲେ କେଉଁ କାରଣରୁ ବିସ୍ଫୋରଣ ହେଲା ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇ ନାହିଁ ।