ରାଜଧାନୀ ଦିଲ୍ଲୀ ଅଲ୍ଲିପୁର ଅଞ୍ଚଳରେ ଥିବା ରଙ୍ଗ ତିଆରି କାରଖାନାରେ ଭୀଷଣ ଅଗ୍ନିକାଣ୍ଡ । ଦୁର୍ଘଟଣାରେ ୭ଜଣ ଜୀବନ୍ତ ଦଗ୍ଧ, କୋଟି କୋଟି ଟଙ୍କାର ସମ୍ପତି ପୋଡ଼ି ପାଉଁଶ ।

କନକ ବ୍ୟୁରୋ : ରାଜଧାନୀ ଦିଲ୍ଲୀ ଅଲ୍ଲିପୁର ଅଞ୍ଚଳରେ ଥିବା ଏକ ରଙ୍ଗ ତିଆରି କାରଖାନାରେ ଭୀଷଣ ଅଗ୍ନିକାଣ୍ଡ । ଏହି ଦୁର୍ଘଟଣାରେ ୭ଜଣ ଜୀବନ୍ତ ଦଗ୍ଧ ହୋଇଯାଇଥିବା ବେଳେ ଅନେକ ଗୁରୁତର ଆହତ ହୋଇଛନ୍ତି । ଅଲ୍ଲୀପୁର ଏକ ଜନବହୁଳ ଅଞ୍ଚଳ ହୋଇଥିବା ବେଳେ ଏହି ରଙ୍ଗ ତିଆରି କାରଖାନାରେ ବହୁ ସଂଖ୍ୟକ ଶ୍ରମିକ କାମ କରୁଥିଲେ ।

ଗୁରୁବାର ସଂଧ୍ୟାରେ ଏହି କାରଖାନାରେ ଅଚାନକ ନିଆଁ ଲାଗିଯିବା ସହିତ ସଙ୍ଗେସଙ୍ଗେ ଚାରିଆଡ଼କୁ ମାଡ଼ି ଯାଇଥିଲା । ଏହି ଅଗ୍ନିକାଣ୍ଡରେ ପ୍ରାୟ ୭ଜଣ ଶ୍ରମିକଙ୍କର ମୃତ୍ୟୁ ହୋଇଥିବା ବେଳେ ଅନେକ ଗୁରୁତର ଭାବେ ଉଦ୍ଧାର ହୋଇ ମେଡିକାଲରେ ଭର୍ତି ହୋଇଥିବା ଜଣାପଡିଛି । ୨୨ଟି ଦମକଳ ଗାଡ଼ି ଘଟଣାସ୍ଥଳରେ ପହଁଚି ନିଆଁକୁ ଆୟତକୁ ଆଣିଥିବା ବେଳେ କୋଟି କୋଟି ଟଙ୍କାର ସମ୍ପତି ପୋଡ଼ି ପାଉଁଶ ହୋଇଯାଇଛି । ଅଗ୍ନିକାଣ୍ଡର କାରଣ ସ୍ପଷ୍ଟ ହୋଇନଥିବା ବେଳେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ପୋଲିସ ।