ଦଣ୍ଡ ଉପବାସ କରିବାରୁ ପରିବାରକୁ ନିଆଁ ପାଣି ବାସନ୍ଦ। ୧୦ ବର୍ଷ ହେଲା ସଜା କାଟୁଛନ୍ତି ବସନ୍ତ ବେହେରାଙ୍କ ପରିବାର।

କନକ ବ୍ୟୁରୋ: ଗାଁ ମଶାଣି ମନା, ଗାଁର କାହା ସାଥିରେ କଥା ହେବା ବି ମନା । ଯଦି କିଏ କଥା ହେବ ତେବେ ତାଠାରୁ ୧୦ ହଜାର ଟଙ୍କା ଫାଇନ ଆଦାୟ କରାଯିବ ବୋଲି ନିଷ୍ପତି ନେଇଛନ୍ତି ଗାଁ ମୁଖିଆ । ବର୍ଷେ କି ୨ ବର୍ଷ ନୁହେଁ ୧୦ ବର୍ଷ ଧରି ଗାଁରୁ ବାସନ୍ଦ ଅଛନ୍ତି କଟକ ଜିଲ୍ଲା ବାଙ୍କୀ ବ୍ଲକ ମଧୁଆପଲ୍ଲୀ ପାଟଣା ଗାଁର ବସନ୍ତ ବେହେରାଙ୍କ ପରିବାର । ଅନ୍ୟ ଗାଁରେ ହେଉଥିବା ଝାମୁ ଯାତ୍ରାରେ ଦଣ୍ଡ ଉପବାସ କରିବାରୁ ଏହି ପରିବାରକୁ ନିଆଁ ପାଣି ବାସନ୍ଦ ଭଳି ନିର୍ଯାତନାର ଶିକାର ହୋଇଛନ୍ତି । ଏପରିକି ଗାଁର ପୋଖରୀ କିମ୍ବା ଗାଁର ମନ୍ଦିରକୁ ଏହି ପରିବାର ଯିବେ ନାହିଁ ବୋଲି ରୋକ୍ଠୋକ୍ କୁହାଯାଇଛିି ।

୨୦୧୩ ମସିହାରେ ମଧୁଆପଲୀ ଓ ମଧୁଆପଲୀ ପାଟଣା ଏହି ୨ ଗାଁ ମଧ୍ୟରେ ଝାମୁ ଯାତ୍ରାକୁ ନେଇ ବିବାଦ ଦେଖାଦେଇଥିଲା । ଏହି ସମୟରେ ମଧୁଆପଲୀ ପାଟଣା ଗାଁର ବସନ୍ତ ବେହେରା ମଧୁଆପଲୀ ଗାଁରେ ଚାଲିଥିବା ଝାମୁଯାତ୍ରାରେ ସେହି ଗାଁ ଲୋକଙ୍କ ସହ ମିଶି ଦଣ୍ଡ ଉପବାସ କରିଥିଲେ । ଯାହା ପାଇଁ ଗାଁର ବସନ୍ତ ବେହେରାଙ୍କ ପରିବାରକୁ ଗାଁ ମୁଖିଆ ବାସନ୍ଦ କରି ଦେଇଥିଲେ । ଏହାରି ଭିତରେ ୧୦ ବର୍ଷ ବିତିଯାଇଥିଲେ ମଧ୍ୟ ଏବେବି ଗାଁରେ ନିର୍ଯାତନାର ଶିକାର ହେଉଛନ୍ତି ଏହି ପରିବାର । ସେପଟେ ଏନେଇ ଜିଲ୍ଲାପାଳଙ୍କ ଠାରୁ ଆରମ୍ଭ କରି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପର୍ଯ୍ୟନ୍ତ ସମସ୍ତଙ୍କ ନିକଟରେ ଅଭିଯୋଗ କରି ଆସୁଥିଲେ ମଧ୍ୟ ନ୍ୟାୟ ପାଇବାରୁ ବଞ୍ଚିତ ହେଉଥିବା ଏହି ପରିବାର ଅଭିଯୋଗ କରିଛନ୍ତି । ହେଲେ କେହି ଶୁଣି ନଥିବା କହିଛନ୍ତି ପରିବାର ।