ଜିରୋ ନାଇଟରେ ସହରରେ ବୁଲୁଥିଲେ ମାତାଲ ଡ୍ରାଇଭର । ଭୁବନେଶ୍ୱରରେ ୨୨ଜଣ ମଦୁଆ ଗାଡି ଚାଳକଙ୍କ ଠାରୁ ଚାଲାଣ କାଟିଲା ପୋଲିସ ।
କନକ ବ୍ୟୁରୋ : ନୂଆବର୍ଷକୁ ସ୍ୱାଗତ କରିବା ପାଇଁ ଉତ୍ସାହର ପରିବେଶ ଭିତରେ ସାରା ରାଜ୍ୟରେ ପାଳିତ ହୋଇଛି ଜିରୋ ନାଇଟ୍ ସେଲିବ୍ରେସନ୍ । ବିଭିନ୍ନ ହୋଟେଲ ମାନଙ୍କରେ ବେଶ୍ ମଉଜମସ୍ତିରେ ଲୋକେ ପାଳନ କରିଛନ୍ତି । ବିଶେଷ କରି ଯୁବଗୋଷ୍ଠୀଙ୍କ ଭିତରେ ଏହି ଉତ୍ସାହର ସ୍ତର ବେଶ୍ ଉପରେ ରହିଥିଲା । ଅନ୍ୟପଟେ ମଉଜ କରିବା ସହ ମାତାଲ ହୋଇଥିଲେ କିଛି ବ୍ୟକ୍ତି । କେବଳ ସେତିକି ନୁହେଁ, ଏଭଳି କିଛି ବ୍ୟକ୍ତି ରାତିରେ ମାତାଲ ଅବସ୍ଥାରେ ଗାଡି ଚଲାଉଥିବା ବେଳେ ଧରାପଡିଛନ୍ତି । ବିଭିନ୍ନ ଛକରେ ପୋଲିସ ପାଟ୍ରୋଲିଂ କରିବା ସହ ରାତିରେ ଗାଡି ଚାଳକ ମାନଙ୍କୁ ଯାଂଚ କରିଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ, କମିଶରେଟ ପୋଲିସ କେବଳ ଭୁବନେଶ୍ୱରରେ ୨୨ ଜଣ ବ୍ୟକ୍ତିଙ୍କୁ ମଦ ପିଇ ଗାଡି ଚଲାଇବା ବେଳେ ଧରିଛନ୍ତି । ରାଜ୍ୟର ଅନ୍ୟ ଅଂଚଳରେ ମଧ୍ୟ ଏଭଳି ଧରପଗଡ ହୋଇଥିବା ଜଣାପଡିଛି । ଅନ୍ୟପଟେ କଟକରେ ୧୨ ଜଣଙ୍କ ବିରୋଧରେ ମଦ ପିଇ ଗାଡି ଚଳାଇବା ଅଭିଯୋଗରେ ଚାଲାଣ କାଟିଛି କମିଶନରେଟ ପୋଲିସ । କଟକର ବିଭିନ୍ନ ଥାନା ଅଂଚଳରେ ଗତକାଲି ମଧ୍ୟରାତ୍ରିରେ ଟ୍ରାଫିକ୍ ଖିଲାପ କରିଥିବା ଅଭିଯୋଗରେ ମୋଟ ୧ ଲକ୍ଷ ୭୧ ହଜାର ୫ଶହ ଟଙ୍କା ଆଦାୟ କରାଯାଇଥିବା ସୂଚନା ମିଳିଛି ।
ତେବେ କମିଶନରେଟ ପୋଲିସ ଜଣ ପିଛା ୧ ହଜାର ଟଙ୍କା ଲେଖାଏଁ ଚାଲାଣ କାଟିଥିବା ଜଣା ପଡିଛି । ନୂଆ ମଟରଯାନ ଆଇନ ଅନୁସାରେ ମାତାଲ ଡ୍ରାଇଭର ଧରାପଡିଲେ ୧୦ ହଜାର ଟଙ୍କାର ଜରିମାନା ସହ ଜେଲର ବ୍ୟବସ୍ଥା ରହିଛି । କିନ୍ତୁ ଜିରୋ ନାଇଟ୍ ଦିନ ଧରା ପଡିଥିବା ମାତାଲ ଡ୍ରାଇଭରଙ୍କ ବିରୋଧରେ ମାତ୍ର ୧ ହଜାର ଟଙ୍କାର ଚାଲାଣ କଟାଯାଇଛି । ତେଣୁ ନୂଆ ବର୍ଷରେ ମାତାଲଙ୍କୁ ରିହାତି ଦିଆଯାଇଛି ବୋଲି କଟାକ୍ଷରେ କୁହାଯାଉଛି ।