କନକ ବ୍ୟୁରୋ : ସାମାଜିକ ଦୂରତା ରକ୍ଷା ନକଲେ ଗଣିବାକୁ ପଡିବ ୫ଶହ ଟଙ୍କା ଜରିମାନା । ଭୁବନେଶ୍ୱର କଟକ ଅଞ୍ଚଳରେ କରୋନା ସଂକ୍ରମଣକୁ ରୋକିବା ପାଇଁ ଆଜି ଗାଇଡଲାଇନ ଜାରି କରିଛି କମିଶନରେଟ ପୁଲିସ । ଏହି ଅଧିନିୟମ ମେ ୧ ତାରିଖରୁ ଲାଗୁ ହେବାକୁ ଯାଉଛି । ସାମାଜିକ ବ୍ୟବଧାନ କହିଲେ ଦୁଇ ଜଣ ବ୍ୟକ୍ତିଙ୍କ ମଧ୍ୟରେ ୨ ମିଟର ବା ୬ ଫୁଟ ରହିବ ।
Kanak News is now on WhatsApp
Join and get latest news updates delivered to you via WhatsApp
ସବୁ ଦୋକାନ ମାଲିକ ନିଜ ଦୋକାନ ପରିସରରେ ସାମାଜିକ ଦୂରତା ରକ୍ଷା ପାଇଁ ସମସ୍ତ ପ୍ରକାର ପଦକ୍ଷେପ ନେବେ । ବିଏମସି ଓ ସିଏମସିର ଅନୁମତି ପାଇନଥିଲେ ଦୁଇ ମହାନଗର ନିଗମ ଅଞ୍ଚଳରେ ଦୋକାନ ଖୋଲି ପାରିବେ ନାହିଁ । ଏହାଛଡା ଦୋକାନ ଖୋଲିବା ପାଇଁ ଦିଆଯାଇଥିବା ସମୟ ନିର୍ଘଣ୍ଟକୁ କଡାକଡି ଭାବେ ପାଳନ କରିବେ । ସେହିପରି ଗ୍ରାହକମାନେ ମଧ୍ୟ କିଣାକିଣି କଲାବେଳେ ସାମାଜିକ ଦୂରତା ରକ୍ଷା ଓ ଶୃଙ୍ଖଳିତ ଆଚରଣ କରିବେ । କେହି ସାମାଜିକ ଦୂରତା ନମାନିଲେ ତୁରନ୍ତ ପୁଲିସକୁ ଜଣାଇବାକୁ ନିର୍ଦ୍ଦେଶ ଦିଆଯାଇଛି । ପୁଲିସକୁ ନଜଣାଇଲେ ଦୋକାନ ଓ ବ୍ୟବସାୟିକ ପ୍ରତିଷ୍ଠାନର ମାଲକଙ୍କୁ ସମାନ ଭାବେ ଦାୟୀ କରାଯିବ । ସବୁ ଦୋକାନ ଓ ବ୍ୟବସାୟିକ ପ୍ରତିଷ୍ଠାନର ମାଲିକମାନେ ସର୍ବଦା ମାସ୍କ ପିନ୍ଧିବେ ।
ମୁଖା ପିନ୍ଧିନଥିବା ଗ୍ରାହକଙ୍କୁ ଦୋକାନରେ ପଶିବାକୁ ଦିଆଯିବ ନାହିଁ ଓ ଦୋକାନରେ ଥିବା ବେଳେ ଗ୍ରାହକମାନେ କୌଣସି ସମୟରେ ମୁଖା ଖୋଲିବେ ନାହିଁ । ପ୍ରତ୍ୟେକ ଦୋକାନ ଓ ବ୍ୟବସାୟିକ ପ୍ରତିଷ୍ଠାନରେ ହାତ ଧୋଇବା ପାଇଁ ସାନିଟାଇଜର ବ୍ୟବସ୍ଥା କରିବେ । କୌଣସି ବ୍ୟକ୍ତି ବଜାର ଅଞ୍ଚଳକୁ ଗୁଟଖା, ପାନ ପାଟିରେ ରଖି ଯିବେ ନାହିଁ ଓ ବାହାରେ ଛେପ ପକାଇ ପାରିବେ ନାହିଁ । ଏସବୁ ଆଇନ ମେ ମାସ ୧ ତାରିଖରୁ ଭୁବନେଶ୍ୱର ଓ କଟକରେ ଲାଗୁ ହେବ । ଆଉ ଏହି ନିୟକୁ ଯିଏ ଉଲ୍ଲଂଘନ କରିବ ଓଡିଶା ସହରାଂଚଳ ଆଇନର ଧାରା ୯୬-ଡି ଅନୁସାରେ ୫ ଶହ ଟଙ୍କାର ଜରିମାନା ଗଣିବେ ।