ଭାବର ଠାକୁରଙ୍କୁ ନେଇ ଅନୁଭୂତି ବଖାଣିଲେ ସବ୍ୟସାଚ୍ଚୀ । ଫିଲ୍ମ ସୁଟିଂ ସେଟରେ ମହାପ୍ରସାଦକୁ ନେଇ ଅନୁଭୂତି ବଖାଣିଲେ, କହିଲେ ମନର କଥା ଶୁଣନ୍ତି ମହାପ୍ରଭୁ ।
କନକ ବ୍ୟୁରୋ : ଜଗତର ନାଥ ଜଗନ୍ନାଥ । ଯାହାଙ୍କ ଟିକିଏ ଝଲକ ପାଇବା ପାଇଁ କାହିଁ କେତେ ଦୂରରୁ ଚାଲି ଆସନ୍ତି ଭକ୍ତ । ଆଉ ଯେଉଁ ଭକ୍ତ ଶ୍ରୀମନ୍ଦିର ଭିତରେ ବଡ ଠାକୁରଙ୍କୁ ଦେଖିବାର ସୁଯୋଗ ପାଇନଥାନ୍ତି ସେମାନଙ୍କୁ ଦର୍ଶନ ଦେବା ପାଇଁ ମହାପ୍ରଭୁ ବଡଦାଣ୍ଡକୁ ଓହ୍ଲାଇ ଆସନ୍ତି । ବଡଦାଣ୍ଡରେ ଏକାକାର ହୋଇଯାଆନ୍ତି ଭକ୍ତ ଓ ଭଗବାନ । ଘଣ୍ଟା ଘଣ୍ଟା ମହାପ୍ରଭୁଙ୍କ ମୁଖକୁ ଚାହିଁ ରହିଥିଲେ ମଧ୍ୟ ଭକ୍ତ ଆଖିରେ ପଲକ ପଡିନଥାଏ । କାଳିଆ ଠାକକ୍ର ଶ୍ରୀମୁଖକୁ ଚାହିଁ ଭକ୍ତ ଆଖିରେ ଲୁହ ଜକେଇ ଆସିଥାଏ । ଆଉ ଭକ୍ତ ନିଜର ମନର କଥା ବଡ ଠାକୁରଙ୍କୁ କହିବାକୁ ଭୁଲିନଥାଏ । ଭାବର ଠାକୁର ହୋଇଥିବାରୁ ଭକ୍ତର ଭାବନାକୁ ବେଶ ଭଲ ଭାବରେ ବୁଝି ନେଇଥାନ୍ତି କାଳିଆ ଠାକୁର । ଏହିଭଳି ଅନେକ ଭକ୍ତ ରହିଛନ୍ତି ଯେଉଁମାନେ ମହାପ୍ରଭୁଙ୍କ ନିକଟରେ ନିଜର ମନର କଥା କହିଛନ୍ତି ଓ ତାହା ପୂରଣ ହୋଇଛି ମଧ୍ୟ । ସେହିଭଳି ଅନୁଭୂତି ସାଉଁଟିଥିବା ଭକ୍ତଙ୍କ ମଧ୍ୟରୁ ଜଣେ ଭକ୍ତ ହେଉଛନ୍ତି ଓଲିଉଡ ଅଭିନେତା ସବ୍ୟସାଚୀ ମିଶ୍ର । କନକ ନ୍ୟୁଜକୁ ଦେଇଥିବା ସାକ୍ଷାତକାରରେ ମହାପ୍ରଭୁଙ୍କ ଅଲୌକିକତାର ଅନୁଭୂତି କହିଛନ୍ତି ସବ୍ୟସାଚୀ ।
Kanak News is now on WhatsApp
Join and get latest news updates delivered to you via WhatsApp
ମହାପ୍ରଭୁଙ୍କ ବିନା ଆର୍ଶୀବାଦରେ କୌଣସି କାମ ଆରମ୍ଭ କରୁନଥିବା ସବ୍ୟସାଚୀ ନିଜର ଅନୁଭୂତି ବଖାଣିବା ବେଳେ ବେଶ ଭାବବିହ୍ୱଳ ହୋଇପଡିଥିଲେ । ମହାପ୍ରଭୁଙ୍କୁ ନିଜ ପରିବାରର ସଦସ୍ୟ ବୋଲି କହିବା ସହ ପ୍ରତ୍ୟେକ କାମରେ ଜଗନ୍ନାଥଙ୍କ ନିକଟରେ ଆର୍ଶୀବାଦ ଭିକ୍ଷା କରିଥାନ୍ତି । ଭାବର ଠାକୁର ଭକ୍ତର ମନର କଥା ଜାଣିପାରନ୍ତି । କାରଣ ଯେତେବେଳେ ମହାପ୍ରଭୁଙ୍କ ପ୍ରସାଦ ଅବଢା ଖାଇବାକୁ ଇଚ୍ଛା ହୋଇଛି କେଉଁ ନା କେଉଁ ବାଟରେ ତାହା ପୂରଣ ହୋଇଛି । ଯାହା ଜଗନ୍ନାଥଙ୍କ ପ୍ରତି ଥିବା ବିଶ୍ୱାସକୁ ଅଧିକ ଗଭୀର କରିଛି ।
ସେହିଭଳି ଏକ ଅନୁଭୂିତ ମନେ ପକାଇ ସବ୍ୟ କହିଛନ୍ତି, ଥରେ ଫିଲ୍ମ ସେଟରେ ସୁଟ୍ କରୁଥିବା ବେଳେ ମହାପ୍ରଭୁଙ୍କ ଅବଢା ଖାଇବାକୁ ବେଶ ଇଚ୍ଛା ହୋଇଥିଲା । ଢେର ଦିନ ହେଲା ମହାପ୍ରସାଦ ଖାଇନଥିବାରୁ ଭାରି ଇଚ୍ଛା ହୋଇଥିଲା । କିନ୍ତୁ ସୁଟିଂ ସେଟରେ କିଏ ବା ଅବଢା ଆଣି ଦେବ । ତେବେ ଭକ୍ତର ଇଚ୍ଛାକୁ ଭଗବାନ ମାରି ପାରନ୍ତେ ବା କିପରି । ସୁଟିଂ ଚାଲୁଥିବା ବେଳେ ଜଣେ ସିନିୟର କଳାକାର ଅବଢା ଧରି ସେଟରେ ପହଞ୍ଚିଥିଲେ । ଆଉ ଅବଢା ଆଣିଛି ଖାଇବୁ ବୋଲି ମୋତେ ପଚାରିବାରୁ ମୁଁ ଆଶ୍ଚର୍ଯ୍ୟ ହୋଇଯାଇଥିଲି । କାରଣ କିଛି ସମୟ ପୂର୍ବରୁ ଅବଢା ଖାଇବି ବୋଲି ଭାବୁଥିବା ବେଳେ ହଠାତ୍ ସୁଟିଂ ସେଟକୁ ସିନିୟର କଳାକାର ଜଣକ ଅବଢା ଆଣିବା ମୋତେ ଆଶ୍ଚର୍ଯ୍ୟ କରିଥିଲା । ଆଉ ସେତେବେଳେ ଭାବିଥିଲି ଯେ, ମହାପ୍ରଭୁଙ୍କର ଆର୍ଶୀବାଦ ମୋ ପ୍ରତି ସବୁବେଳେ ରହିଛି ।
ସେହିଭଳି ଶ୍ରୀମନ୍ଦିରରେ ଜଗତର ନାଥ ଜଗନ୍ନାଥଙ୍କୁ ଦର୍ଶନ କଲା ବେଳେ ମୋ ଆଖି ସବୁବେଳେ ଛଳଛଳ ହୋଇଯାଏ । ଯେତେ ଭିଡ ଥିଲେ ମଧ୍ୟ ମୋତେ ସବୁବେଳେ ଲାଗେ ଯେ, ମହାପ୍ରଭୁଙ୍କ ସାମ୍ନାରେ ମୁଁ ଏକା ଛିଡା ହୋଇଛି ଆଉ ଭାବର ଠାକୁର ମୋ କଥା ଶୁଣୁଛନ୍ତି ।