କୁଚିଣ୍ଡା ଉପଖଣ୍ଡରେ ସାର କେଳେଙ୍କାରୀ : ଏକ ଏକରରୁ କମ ଥିବା ଚାଷୀଙ୍କ ନାଁରେ ଉଠାଯାଇଛି ୫୦ ବସ୍ତାରୁ ଅଧିକ ସାର, କୃଷକଙ୍କ ପାଖରେ ନାହିଁ ଖବର; କୃଷି ବିଭାଗର ତଦନ୍ତ
କନକ ବ୍ୟୁରୋ : ପ୍ରତିବର୍ଷ ଚାଷ ସମୟରେ କୁଚିଣ୍ଡା ଉପଖଣ୍ଡରେ ସାରର ଘୋର ଅଭାବ ଦେଖାଦିଏ । ଆଉ ଅନେକ ଯାଗାରେ କଳାବଜାରୀ ସହିତ ୨ରୁ ୩ ଗୁଣା ଦେଇ ଚାଷୀ ସାର କିଣିଥାଆନ୍ତି । ସେ ଯାହା ହେଉ ଆବଶ୍ୟକ ଅନୁଯାୟୀ ସାର ନମିଳିଲେ ଚାଷୀ ଆନ୍ଦୋଳନ କରିବା ସହ କୃଷି କାର୍ଯାଳୟ ଘେରିଥାଆନ୍ତି । ହେଲେ ଏବେ ସାରକୁ ନେଇ ଏକ ରୋଚକ ତଥ୍ୟ ସାମ୍ନାକୁ ଆସିଛି । ରାଜ୍ୟ ସରକାରଙ୍କ ତରଫରୁ ଏକ ଚିଠି ସମ୍ବଲପୁର ଜିଲ୍ଲାପାଳଙ୍କୁ ଦିଆଯାଇଛି ଏବଂ ସେଥିରେ ପ୍ରତି ଲ୍ୟାମ୍ପସରୁ ୟୁରିଆ ସାର ନେଇଥିବା ପ୍ରଥମ ୨୦ ଜଣଙ୍କ ରିପୋର୍ଟ ଦେବା ପାଇଁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଆଉ ସେହି ଚିଠି ଆସିବା ପରେ ସମ୍ବଲପୁର ଜିଲ୍ଲା କୁଚିଣ୍ଡାର ପରୁଆଭାଡି ଲ୍ୟାମ୍ପସ ଅଧିନ ପ୍ରଥମ ୨୦ ଜଣଙ୍କ ତାଲିକା କରାଯାଇ ତଦନ୍ତ କରାଯାଇଛି । ଆଉ ସେଥିରୁ ଯେଉଁ ତଥ୍ୟ ଆସିଛି ସେଥିରେ ଏକ ବଡ ଧରଣର ଘୋଟାଲାର ସୁରାକ ମିଳିଛି । ଯେଉଁମାନଙ୍କର ଅଧ ଏକର ବା ଏକ ଏକର ଜମି ଅଛି ବା ମୁଳରୁ ଚାଷ କରିନାହାଁନ୍ତି ସେମାନଙ୍କ ନାଁରେ ୫୦ ରୁ ଅଧିକ ବସ୍ତା ସାର ଉଠାଯାଇଛି । ହେଲେ ସେମାନେ ଜାଣିନଥିବା କହିଥିବା ବେଳେ କୁଚିଣ୍ଡା କୃଷି ବିଭାଗର ତଦନ୍ତ ବେଳେ ଏହା ଜଣାପଡିଛି ।
ତେବେ କୁଚିଣ୍ଡା ଅଂଚଳରେ ଯେତେ ଚାଷ ଜମି ଅଛି ତାର ତିନି ଗୁଣା ୟୁରିଆ ସାର ଦିଆଯାଇଥିବା ସରକାରୀ ରିପୋର୍ଟରେ ଲେଖା ହୋଇଛି । ପ୍ରକୃତ ଚାଷୀ ଏତେ ପରିମାଣର ସାର ପାଇ ନଥିବା ବେଳେ ସାର ସବୁ କଳାବଜାରରେ ବିକ୍ରି କରାଯାଇଥିବା ଚାଷୀ ଅଭିଯୋଗ କରିଛନ୍ତି । ତେବେ ଏହାର ତଦନ୍ତ ପରେ ଅନ୍ୟ ଲ୍ୟାମ୍ପସର ତଥ୍ୟ ସାମ୍ନାକୁ ଆସିବ ବୋଲି ଅତିରିକ୍ତ କୃଷିଅଧିକାରୀ କହୁଥବା ବେଳେ କ୍ୟାମେରା ସାମ୍ନାରେ କିଛି କହିବାକୁ ମନା କରିଦେଇଛନ୍ତି ।