କରୋନା ସଂକ୍ରମଣ ଭୟ : ଜୀବନ ଓ ଜୀବିକା ଭିତରେ ଆରମ୍ଭ ହୋଇଗଲା ଯୁଦ୍ଧ; କାମଧନ୍ଧା ହରାଇବା ଆଶଙ୍କାରେ ମହାରାଷ୍ଟ୍ର ଛାଡିଲେ ଶହଶହ ଶ୍ରମିକ
କନକ ବ୍ୟୁରୋ : ଗତବର୍ଷ ଠିକ୍ ଏହି ସମୟରେ ସାରା ଦେଶରେ ଲାଗୁ ହୋଇଥିଲା ଲକଡାଉନ । ଲୋକେ ଘର ଭିତରେ ବନ୍ଦ ହୋଇ ରହିଲେ, କଳକାରଖାନା ସବୁ ଠପ୍ ହୋଇଗଲା । କରୋନାର ସଂକ୍ରମଣ ଭୟ ଭିତରେ ଜୀବନ ଓ ଜୀବିକା ଭିତରେ ଆରମ୍ଭ ହୋଇଗଲା ଯୁଦ୍ଧ । ସରକାରଙ୍କ ପାଇଁ ଜୀବନ ବଂଚାଇବା ଜରୁରୀ ଥିଲା ହେଲେ ଜୀବିକା ହରାଇ ଲୋକେ ଜୀବନ ଜିଇଁବାକୁ ସଂଘର୍ଷ କରୁଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏତିକି ବେଳେ କାମଧନ୍ଧା ହରାଇ, ଖାଇବାକୁ ପିଇବାକୁ ନପାଇ ମାଇଲ ମାଇଲ ବାଟ ଚାଲି ଚାଲି ଅତିକ୍ରମ କଲେ ଲକ୍ଷ ଲକ୍ଷ ଶ୍ରମିକ । ଏଥର ଯେମିତି ସେହି ପରିସ୍ଥିତି ନଉପୁଯେ ସେଥିପାଇଁ ଆଗୁଆ ପ୍ରସ୍ତୁତି ଆରମ୍ଭ କରିଛନ୍ତି ପ୍ରବାସୀ ଶ୍ରମିକ । ଦେଶର ସର୍ବାଧିକ କରୋନା ସଂକ୍ରମିତ ମହାରାଷ୍ଟ୍ରରେ ପ୍ରଥମ ରାଜ୍ୟ ଭାବେ ଲାଗୁ ହୋଇଛି ଜନତା କର୍ଫ୍ୟୁ । ଏଥିସହ କଳକାରଖାନା ବନ୍ଦ ହୋଇଯିବା ଆଶଙ୍କାରେ ମହାରାଷ୍ଟ୍ର ଛାଡୁଛନ୍ତି ଶହଶହ ଶ୍ରମିକ । ଟ୍ରେନ, ବସ୍ ସବୁ ବନ୍ଦ ହୋଇଯିବା ଆଗରୁ ନିଜ ନିଜ ଘରକୁ ଫେରିବା ଆରମ୍ଭ କରିଛନ୍ତି ଏମାନେ । ନହେଲେ ଗତବର୍ଷ ଭଳି ଘରକୁ ଫେରିବାର ବାଟ ନପାଇ ଅନେକ ହଇରାଣ ହରକତ ହେବାକୁ ପଡିବ ।
ଶହଶହ ମାଇଲ ପିଲାଛୁଆଙ୍କୁ ଧରି ପାଦରେ ଚାଲି ଚାଲି ଫେରିବାକୁ ହେବ । ମହାରାଷ୍ଟ୍ରରେ ଆଜି ରାତି ୮ଟାରୁ ରାଜ୍ୟବ୍ୟାପୀ ୧୪୪ ଧାରା ଜାରି ହେବ ବୋଲି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଉଦ୍ଧବ ଠାକରେ । ବୁଧବାର ରାତି ୮ଟାରୁ ଏପ୍ରିଲ ୩୦ ତାରିଖ ଯାଏଁ ସାରା ରାଜ୍ୟରେ ଲକଡାଉନ ଭଳି କଟକଣା ଜାରି ହେବ । ୧୪୪ ଧାରା ଜାରି ହେଲେ ସକାଳ ୭ରୁ ରାତି ୮ଟା ଯାଏଁ ଜରୁରୀକାଳିନ ସେବା ଛଡା ସବୁ କିଛି ବନ୍ଦ ରହିବ । ଟ୍ରେନ ଓ ବସର ବ୍ୟବହାର ଜରୁରୀକାଳୀନ ପରିସ୍ଥିତି ପାଇଁ କେବଳ କରାଯିବ ବୋଲି କହିଛନ୍ତି ଉଦ୍ଧବ ।