୩ ରାଜ୍ୟକୁ ବାତ୍ୟା ଭୟ : ଘନୀଭୂତ ହେଲା ବଙ୍ଗୋପସାଗରରେ ସୃଷ୍ଟ ଘୂର୍ଣିଝଡ; ଘଂଟାକୁ ୫କିଲୋମିଟର ବେଗରେ ପଶ୍ଚିମ ମୁହାଁ ‘ନିଭାର’
ବାତ୍ୟାର ରୁପ ନେଇ ତାମିଲନାଡୁ-ପୁଡୁଚେରୀ ଉପକୂଳରେ ହୋଇପାରେ ମାଡ; ଆନ୍ଧ୍ର ଓ ରାୟଲସୀମାରେ ପଡିବ ପ୍ରଭାବ
କନକ ବ୍ୟୁରୋ : ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ କ୍ରମଶ ଘନୀଭୂତ ହୋଇ ଘୂର୍ଣ୍ଣିଝଡରେ ପରିଣତ ହୋଇଛି । ଏହା ଘଂଟାକୁ ପ୍ରାୟ ୫କିଲୋମିଟର ବେଗରେ ପଶ୍ଚିମ ଦିଗରେ ଗତି କରୁଛି । ମଧ୍ୟରାତ୍ର ବେଳକୁ ଏହା ଘନୀଭୂତ ହୋଇ ସିଭିୟର ସାଇକ୍ଲୋନିକ ଷ୍ଟର୍ମର ରୂପ ନେଇଛି । ଆସନ୍ତା ୨୪ ଘଂଟାରେ ଏହା ସମୁଦ୍ର ମଧ୍ୟରେ ଅଧିକରୁ ଅଧିକ ବଳ ଗୋଟାଇ ଭୀଷଣ ବାତ୍ୟାର ରୁପ ନେବ । ଆଜି ସନ୍ଧ୍ୟା ସୁଦ୍ଧା ଏହା ତାମିଲନାଡୁ ଏବଂ ପୁଡୁଚେରୀ ନିକଟରେ ଉପକୂଳ ଛୁଇଁବ ବୋଲି ପାଣିପାଗ ବିଭାଗ ସ୍ପଷ୍ଟ କରିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ସମୟରେ ଘଂଟା ପ୍ରତି ୧୨୦ରୁ ୧୩୦ କିଲୋମିଟର ବେଗରେ ପବନ ବୋହିବା ସହ ସର୍ବାଧିକ ୧୪୫କିଲୋମିଟର ବେଗରେ ପବନ ବହିବାର ଆଶଙ୍କା ରହିଛି । ସାଇକ୍ଲୋନିକ ଷ୍ଟର୍ମ ‘ନିଭାର’ ପ୍ରଭାବରେ ତାମିଲନାଡୁ, ପୁଡୁଚେରି, କରାଇକେଲ, ଆନ୍ଧ୍ରପ୍ରଦେଶର ଦକ୍ଷିଣ ଉପକୂଳ ଓ ରୟାଲ ସୀମା, ଦକ୍ଷିଣ ପୂର୍ବ ତେଲେଙ୍ଗାନାରେ ଆସନ୍ତା ଦୁଇ ଦିନ ଧରି ପ୍ରବଳ ବର୍ଷା ହେବାର ପୂର୍ବାନୁମାନ କରିଛି ପାଣିପାଗ ବିଭାଗ । ଏଥି ଯୋଗୁଁ ଓଡିଶାକୁ ବିପଦକୁ ନଥିଲେ ମଧ୍ୟ ରାଜ୍ୟରେ ବର୍ଷା ଆରମ୍ଭ ହୋଇଯିବ । କିନ୍ତୁ ପବନର ପ୍ରଭାବ ଓଡିଶାରେ ରହିବ ନାହିଁ ବୋଲି ଆଂଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ କୁହାଯାଇଛି । କେନ୍ଦ୍ର ପକ୍ଷରୁ କୁହାଯାଇଛି ଯେ ୨୫ ଓ ୨୬ ତାରିଖରେ ମାଲକାନଗିରି, କୋରାପୁଟ, ରାୟଗଡା, ଗଜପତି ଓ ଗଞ୍ଜାମ ଜିଲ୍ଲାର ଗୋଟିଏ ଦୁଇଟି ସ୍ଥାନରେ ହାଲକାରୁ ମଧ୍ୟମଧରଣର ବର୍ଷା ହେବ ବାତ୍ୟା ।
‘ନିଭାର’ର ମୁକାବିଲା ପାଇଁ ତାମିଲନାଡୁ ଓ ପୁଡୁଚେରୀ ମୁଖ୍ୟମନ୍ତ୍ରୀଙ୍କ ସହ ଫୋନରେ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ । ଏଥିସହ ଉଦ୍ଧାରକାରୀ ଦଳଙ୍କ ସହ ଏନଡିଆରଏଫକୁ ନିୟୋଜିତ କରାଯାଇଛି । ଏବେ ଠାରୁ ଏହାର ପ୍ରକୋପ ତାମିଲନାଡୁରେ ଦେଖିବାକୁ ମିଳିଛି । ବାତ୍ୟା ନିଭାର ପ୍ରଭାବରେ ଚେନ୍ନାଇ ସମେତ ଅଧିକାଂଶ ସ୍ଥାନରେ ଆରମ୍ଭ ହୋଇଛି ବର୍ଷା । ସେପଟେ ପରିସ୍ଥିତିକୁ ନଜରରେ ରଖି ୨୫ନଭେମ୍ବର ତାମିଲନାଡୁରେ ସାର୍ବଜନିକ ଛୁଟି ଘୋଷଣା କରାଯାଇଛି । ସୁରକ୍ଷା ଦୃଷ୍ଟିରୁ ପଣ୍ଡିଚେରୀରେ ଜାରି ହୋଇଛି ୧୪୪ଧାରା । ତାମିଲନାଡୁ,ପଣ୍ଡିଚେରୀ ଓ ଆନ୍ଧ୍ରପ୍ରଦେଶରେ ୨୩ଟି ଏନଡିଆରଏଫ ଟିମ ମୁତୟନ କରାଯାଇଛି ।