ବାପା ! ତମେ ନାହଁ ତ ଏ ମାର୍କର ମୂଲ୍ୟ କଣ ? ଝିଅର ମାଟ୍ରିକ ରେଜଲ୍ଟ ବାହାରିବା ପୂର୍ବରୁ କରୋନାରେ ଆଖି ବୁଜିଲେ ବାପା । ସଫଳତା ପାଇବା ପରେ ଅଭିମାନରେ ଝିଅର ପ୍ରଶ୍ନ… ବାପା ତମେ କୁଆଡେ ଗଲ… ?
କନକ ନ୍ୟୁଜ: ବାପା ! ଦରକାର ନାହିଁ ମୋର ଡାକ୍ତର ହେବା, ଦରକାର ନାହିଁ ବଡ ମଣିଷ ହେବା… ଏତେ ମାର୍କ ରଖି ଲାଭ କଣ ? ଏତେ ଭଲ ରେଜଲ୍ଟ ରହି କି ଫାଇଦା? ଏ ଜୀବନର ମୂଲ୍ୟ କଣ ବାପା ? ଯେଉଁ ଜୀବନରେ ତୁମେ ନାହଁ… ଏ ଖୁସିର ମାନେ କଣ ବାପା ଯେଉଁ ଖୁସିରେ ସାମିଲ ହେବାକୁ ଆଜି ତମେ ନାହଁ… ? କାହିଁକି ଠକି ଦେଲ ବାପା, ତମେ କୁଆଡେ ଚାଲିଗଲ… ?? ଦେଖ ତମ ଝିଅ ଆଜି ମାଟ୍ରିକରେ ଜିଲ୍ଲାରେ ରେକର୍ଡ କରିଛି… ହେଲେ ସେ ଖୁସି ଖବର ଶୁଣିବାକୁ ଆଜି ତମେ ନାହଁ… ଧିକ୍ ଏ ସଫଳତା ବାପା ଧିକ୍…
Kanak News is now on WhatsApp
Join and get latest news updates delivered to you via WhatsApp
ମାଟ୍ରିକ ପରୀକ୍ଷାର ରେଜଲ୍ଟ ସିନା ଝିଅ ମନରେ ଖୁସି ଭରି ଦେଇଛି । ହେଲେ ଯେଉଁ ପରିଶ୍ରମ କରି, ଯେଉଁ କସରତ କରି ଝିଅ ଆଜି ସଫଳତା ପାଇଛି । ଭଲ ରେଜଲ୍ଟ କରିଛି, ସେ ଖୁସି ଖବର ଶୁଣିବାକୁ ଆଜି ତା ପାଖରେ ତା ବାପା ନାହାନ୍ତି । ମାଟ୍ରିକ ରେଜଲ୍ଟ ବାହାରିବା ପୂର୍ବରୁ ହିଁ ମହାମାରୀ କରୋନା ତା ବାପାଙ୍କୁ ଛଡାଇ ନେଇଛି । ମେ ପହିଲାରେ ବାପା କରୋନାରେ ପ୍ରାଣ ହରାଇଥିବା ବେଳେ ଜୁନରେ ଝିଅ ଦଶମରେ ୫୫୨ ନମ୍ବର ରଖି ଜିଲ୍ଲାରେ ୩ୟ ସ୍ଥାନ ଅଧିକାର କରିଛି ହେଲେ ତା ଖୁସି ଦେଖିବାକୁ ବାପା ନଥିବାରୁ ମନମାରୀ ବସିଛି ଝିଅ ପ୍ରତିଭା ।
ଝାରସୁଗୁଡା ଜିଲ୍ଲା ଅତାବିରା ପଞ୍ଚାୟତ କଣ୍ଟାପାଲି ଗାଁର ପ୍ରତିଭା ପ୍ରଧାନ ଚଳିତ ବର୍ଷ ମାଟ୍ରିକ ପରୀକ୍ଷାରେ ୫୫୨ ମାର୍କ ରଖି ସାରା ଜିଲ୍ଲାରେ ତୃତୀୟ ସ୍ଥାନ ଅଧିକାର କରିଥିବାରୁ ପ୍ରତିଭାଙ୍କ ପାଖକୁ ଛୁଟୁଛି ଶୁଭେଚ୍ଛାର ସୁଅ । ଗୋଟିଏ ମାସ ତଳେ କରୋନାରେ ପ୍ରତିଭା ବାପାଙ୍କୁ ହରାଇଥିବା ବେଳେ ସେହି ଦୁଃଖ ଭିତରେ ନିଜ କ୍ୟାରିଅରର ପ୍ରଥମ ଖୁସିକୁ ଭଲରେ ଭୋଗି ପାରି ନାହାନ୍ତି ପ୍ରତିଭା ।
ବାପା ଥିଲେ ବୋଲି ତ ତାଙ୍କ ପ୍ରେରଣାରେ ପାଠ ପଢୁଥିଲେ ପ୍ରତିଭା । ରାତି ଅନିଦ୍ରା ହୋଇ ବାପାଙ୍କ ସ୍ୱପ୍ନକୁ ପୂରଣ କରିବାକୁ କସରତ କରୁଥିଲେ । ଆଉ ତାଙ୍କରି ଇଚ୍ଛାରେ ଆଗକୁ ଡାକ୍ତର ହେବାକୁ ଲକ୍ଷ୍ୟ ରଖିଥିଲେ । ବାପା ସବୁବେଳେ ଡାକ୍ତର ହେବାକୁ ତାଙ୍କ କାନେକାନେ କୁହନ୍ତି । ରୋଗୀ ସେବା କରିବାକୁ ପ୍ରୋତ୍ସାହନ ଦିଅନ୍ତି । ବାପା କହିଥିଲେ, ମାଟ୍ରିକରେ ଭଲ ମାର୍କ ରଖିଲେ ଭଲ କଲେଜରେ ପଢେଇବେ । ହେଲେ ଏବେ ଭଲ କଲେଜରେ ପଢିବାର ସେ ଆଶା ମିଳେଇଯାଇଛି ଏ ମେଧାବୀ ଛାତ୍ରୀଙ୍କର…
ଅନ୍ୟପଟେ କରୋନା ପରିବାରର ଏକମାତ୍ର ରୋଜଗାରିଆ ପୁଅକୁ ଛଡାଇ ନେବାପରେ ଭାଙ୍ଗି ପଡିଛନ୍ତି ସମସ୍ତେ । ପୁଅକୁ ହରାଇଛନ୍ତି ବୁଢାବାପାମାଆ, ସ୍ତ୍ରୀ ପିଲାଛୁଆ । ସେପଟେ ଆଶିର୍ବାଦ ଯୋଜନାରେ ପ୍ରତିଭାଙ୍କୁ ସାମିଲ ପାଇଁ ମିଳିଛି ପ୍ରତିଶ୍ରୁତି ।