କୃଷି ଆଇନ ପ୍ରତ୍ୟାହାର ଦାବିରେ ଜାରି ରହିଛି ଚାଷୀଙ୍କ ଲଢେଇ । ଜୟପୁର- ଦିଲ୍ଲୀ ଜାତୀୟ ରାଜପଥରେ ବିଭିନ୍ନ ସ୍ଥାନରେ ଟୋଲପ୍ଲାଜା ଘେରିଲେ ଅନ୍ନଦାତା
କନକ ବ୍ୟୁରୋ: କୃଷି ଆଇନ୍ ପ୍ରତ୍ୟାହାର ଦାବିରେ ଦିଲ୍ଲୀରେ ଜାରି ରହିଛି ଆନ୍ଦୋଳନ । ଆଜି ଆନ୍ଦୋଳନକୁ ୧୭ ଦିନ ଛୁଇଁଛି ।ସେପଟେ ଆଜି ଦିଲ୍ଲୀ –ଜୟପୁର ଜାତୀୟ ରାଜପଥରେ ଥିବା ଟୋଲପ୍ଲାଜା ଗୁଡିକୁ ଘେରାଉ କରିଛନ୍ତି ଚାଷୀ ସଂଗଠନ । ଦିଲ୍ଲୀ, ହରିୟାଣା, ଉତରପ୍ରଦେଶର ଦିଲ୍ଲୀ-ଜୟପୁର ଜାତୀୟ ରାଜପଥରେ ସମସ୍ତ ଟୋଲପ୍ଲାଜା ଗୁଡିକ ନିକଟରେ ଚାଷୀ ଏକାଠି ହୋଇ ରାସ୍ତା ଅବରୋଧ କରିଛନ୍ତି । ଫଳରେ ଜାତୀୟ ରାଜପଥ ଉପରେ ଫସି ରହିଛି ଶହ ଶହ ଗାଡି ମୋଟର । କୃଷକଙ୍କ ଆନ୍ଦୋଳନକୁ ନଜରରେ ରଖି ହରିୟାଣାରେ ଆଜି ଟୋଲ୍ ପ୍ଲାଜାକୁ ଦେୟ ମୁକ୍ତ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ହଜାର ହଜାର ଚାଷୀ ଗାଡି ସହିତ ଦିଲ୍ଲୀ-ଜୟପୁର ଜାତୀୟ ରାଜପଥରେ ପ୍ରତିବାଦ କରୁଛନ୍ତି । ସେପଟେ ଦିଲ୍ଲୀରୁ ନେଇ ଅଂବାଲା, ଫରିଦାବାଦ, କୁରୁକ୍ଷେତ୍ର ସବୁଠି ଚାଷୀ ଜାତୀୟ ରାଜପଥକୁ ଅବରୋଧ କରିଛନ୍ତି । ପରିସ୍ଥିତିକୁ ନଜରରେ ରଖି ଗୁରୁଗ୍ରାମ ଓ ଫରିଦାବାଦରେ ସୁରକ୍ଷାକୁ କଡାକଡି କରାଯାଇଛି । ସୀମାରେ ୬୦ ଜଣ ମାଜିଷ୍ଟ୍ରେଟଙ୍କୁ ନିୟୋଜିତ କରାଯାଇଛି । କେନ୍ଦ୍ର ସରକାରଙ୍କ ନୂଆ କୃଷି ଆଇନକୁ ବିରୋଧ କରି ୩୦ରୁ ଅଧିକ ଚାଷୀ ସଂଗଠନ ବିରୋଧରେ ସାମିଲ ହୋଇଛନ୍ତି । ଆସନ୍ତା ୧୪ ତାରିଖରେ ଦେଶବ୍ୟାପି ବିକ୍ଷୋଭ କରିବାକୁ ଡାକରା ଦେଇଛନ୍ତି ଚାଷୀ ସଂଗଠନ ।