ସରକାରୀ ନିର୍ଦ୍ଧାରିତ MSP ଠାରୁ ଅଧିକ ଦାମରେ କପା ବିକିଲେ ଚାଷୀ । ମଣ୍ଡିରେ କମ୍ ଦାମ ଯୋଗୁଁ ବାହାରେ ବିକିବାକୁ ହେଉଛନ୍ତି ବାଧ୍ୟ ।
କନକ ବ୍ୟୁରୋ : କପା ଚାଷ କରି ଚାଷୀ ଏବେ ହରଡଘଣରେ । ଅମଳ କପାକୁ ଚାଷୀ ମଣ୍ଡିରେ ବିକ୍ରି କରି ଦୁଇ ପଇସା ରୋଜଗାର ଆଶା ରଖିଥିବା ଚାଷୀ ଏବେ ଚିନ୍ତାରେ । ମଣ୍ଡିରେ କପାର କୁଇଣ୍ଟାଲ ପିଛା ସର୍ବନିମ୍ନ ସହାୟକ ମୂଲ୍ୟ ଖୋଲା ବଜାର ଠାରୁ କମ ରହିଥିବା ବେଳେ ଚାଷୀମାନେ ଆନ୍ଧ୍ର ବ୍ୟବସାୟୀଙ୍କୁ ବିକି ଦେଇଛନ୍ତି କପା । ଏଭଳି ସମସ୍ୟା ଦେଖିବାକୁ ମିଳିଛି ରାୟଗଡା ଜିଲ୍ଲାରେ ।
Kanak News is now on WhatsApp
Join and get latest news updates delivered to you via WhatsApp
ଚଳିତ ବର୍ଷ ଜିଲ୍ଲାରେ ଗୁଣୁପୁର ସମେତ ରାୟଗଡା, ମୁନିଗୁଡା, ପଦ୍ମପୁର, ଗୁଡାରି, ରାମାନାଗୁଡା ବ୍ଲକ ଅଞ୍ଚଳରେ ପାଖାପାଖି ୪୫.୮୪ହଜାର ହେକ୍ଟର ଜମିରେ କପା ଚାଷ କରାଯାଇଛି । ପ୍ରତିବର୍ଷ କପା ଚାଷୀ ମଣ୍ଡି ମାଧ୍ୟମରେ ନିଜର ଉତ୍ପାଦିତ ଦ୍ରବ୍ୟକୁ ଭାରତୀୟ କପା ନିଗମକୁ ବିକ୍ରି କରିଥାନ୍ତି । କିନ୍ତୁ ଚଳିତ ବର୍ଷ ଭାରତୀୟ କପା ନିଗମ ଦ୍ୱାରା ମଣ୍ଡି ଖୋଲା ଯାଇଥିଲେ ମଧ୍ୟ ସରକାରଙ୍କ ସର୍ବନିମ୍ନ ସହାୟକ ମୂଲ୍ୟ କୁଇଣ୍ଟାଲ ପ୍ରତି ୬୦୨୫ ଟଙ୍କା ରହିଛି । କିନ୍ତୁ ବାହାରେ ବ୍ୟବସାୟୀମାନେ କୁଇଂଟାଲ ପିଛା ୭୫୦୦ରୁ ଅଧିକ ଟଙ୍କାରେ କିଣୁଛନ୍ତି । ମଣ୍ଡିରେ କମ ଦର ରହିଥିବାରୁ ଚାଷୀମାନେ ବାଧ୍ୟ ହୋଇ ଆନ୍ଧ୍ର ବ୍ୟବସାୟୀଙ୍କ ନିକଟରେ କପାକୁ ବିକ୍ରି କରୁଥିବାର ଦେଖିବାକୁ ମିଳୁଛି ।