କନକ ବ୍ୟୁରୋ : ଆଇନ ପ୍ରତ୍ୟାହାର ପରେ ଦିଲ୍ଲୀ ସୀମାରୁ ଆନ୍ଦୋଳନରତ କୃଷକମାନେ ଆନ୍ଦୋଳନ ଭାଙ୍ଗି ପଳାଇଯିବେ ବୋଲି ସରକାରଙ୍କର ଯେଉଁ ଧାରଣା ଥିଲା ତାହା ଭୁଲ ପ୍ରମାଣିତ ହୋଇଛି । ଆଜି ସଂଯୁକ୍ତ କିଷାନ ମୋର୍ଚ୍ଚାର ୪୨ ଟି କୃଷକ ସଂଗଠନ ବୈଠକ ପରେ ଘୋଷଣା କରାଯାଇଛି କି ଯେପର୍ଯ୍ୟନ୍ତ ସରକାର ସର୍ବନିମ୍ନ ସହାୟକ ମୂଲ୍ୟ (ଏମଏସପି) ଉପରେ ଗ୍ୟାରେଣ୍ଟି ଦେଇ ନାହାଁନ୍ତି ସେପର୍ଯ୍ୟନ୍ତ ଆନ୍ଦୋଳନ ଜାରି ରହିବ । ଏହାସହ ଆନ୍ଦୋଳନ ବେଳେ ମୃତ୍ୟୁବରଣ କରିଥିବା କୃଷକଙ୍କ ପରିବାରକୁ ଆର୍ଥିକ ସହାୟତା ଓ କୃଷକମାନଙ୍କ ଉପରେ ଦାଖଲ ହୋଇଥିବା ଅଭିଯୋଗ ପ୍ରତ୍ୟାହାର ନେଇ ବି କୃଷକ ସଂଗଠନମାନେ ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କୃଷକ ନେତା ବଲବୀର ସିଂ ରାଜେବାଲ କହିଛନ୍ତି କି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନାମରେ ଏକ ଖୋଲା ଚିଠି ଲେଖାଯିବ । ଯେଉଁଥିରେ କୃଷକମାନଙ୍କର ସମସ୍ତ ଦାବି ଲିଖିତ ରହିବ । ଏହାସହ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଦ୍ୱାରା ଲଖିମପୁର ଖେରୀରେ କୃଷକମାନଙ୍କୁ ଯେଭଳି ହତ୍ୟା କରାଗଲା ତା ଉପରେ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ଉପରେ ବି କାର୍ଯ୍ୟାନୁଷ୍ଠାନ ପାଇଁ ଦାବି କରାଯିବ । ଏହାସହ ଏହା ଉପରେ ଆଲୋଚନା କରିବାକୁ ନଭେମ୍ବର ୨୭ ତାରିଖରେ ପୁଣି ଏକ ବୈଠକ ଅନୁଷ୍ଠିତ ହେବ ଓ ଉକ୍ତ ବୈଠକରେ ଆଗାମୀ ରଣନୀତି ପ୍ରସ୍ତୁତ କରାଯିବ ।
ଅନ୍ୟପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୁଣିଥରେ କୃଷିଆଇନ ଲାଗୁ କରିବା ନେଇ ରାଜସ୍ଥାନ ରାଜ୍ୟପାଳ କଲରାଜ ମିଶ୍ର ଓ ବିଜେପି ସାଂସଦ ସାକ୍ଷୀ ମହାରାଜଙ୍କ ବୟାନ ପରେ ସମାଜବାଦୀ ପାର୍ଟି କହିଛି କି ପ୍ରଧାନମନ୍ତ୍ରୀଙ୍କୁ ବିଶ୍ୱାସ କରିବା କୃଷକମାନଙ୍କ ପାଇଁ ବୋକାମୀ ହେବ ।