କେନ୍ଦ୍ର ସରକାର ବନାମ କୃଷକଙ୍କ ସଂଗ୍ରାମ: ଦିଲ୍ଲୀ-ହରିୟାଣା ସୀମାରେ ୫ମ ଦିନରେ ଚାଷୀ ଆନ୍ଦୋଳନ; କେନ୍ଦ୍ରର ପ୍ରସ୍ତାବକୁ ପ୍ରତ୍ୟାଖ୍ୟାନ ପରେ ଆଜି କରିବେ ଦିଲ୍ଲୀ ଜାମ
କନକ ବ୍ୟୁରୋ: କୃଷକ ଆଇନକୁ ବିରୋଧ କରି ଦୁଇମାସ ଧରି ଚାଲିଥିବା ଚାଷୀଙ୍କ ଆନ୍ଦୋଳନ ଏବେ ଦିଲ୍ଲୀରେ ଆସି ପହଂଚିଛି । କୃଷକମାନେ ଗତ ୪ ଦିନ ଧରି ଦିଲ୍ଲୀ-ହରିୟାଣା ସୀମାରେ ରାଜରାସ୍ତାରେ ଆନ୍ଦୋଳନ କରିଛନ୍ତି । ଜନ୍ତର ମନ୍ତରରେ ଧାରଣା ଦେବାକୁ ସେମାନେ ଜିଦ ଧରି ବସିଛନ୍ତି । ଗତକାଲି ରାତିରେ ବିଜେପି ସଭାପକି ଜେ.ପି ନଡ୍ଡାଙ୍କ ଘରେ ଗତକାଲି ରାତିରେ ଉଚ୍ଚସ୍ଚରୀୟ ବୈଠକ ବସିଥିଲା । ଏଥିରେ ଗୃହମନ୍ତ୍ରୀ ଅମିତ ଶାହ, ରାଜନାଥ ସିଂ, ନରେନ୍ଦ୍ର ସିଂ ତୋମାର ସାମିଲ ହୋଇଥିଲେ । ବୈଠକ ପ୍ରାୟ ୨ ଘଂଟା ଧରି ଚାଲିଥିଲା । ସେପଟେ ଦାବି ପୂରଣ ନ ହେଲେ ଚାଷୀ ଦିଲ୍ଲୀ ଜାମ କରିବାକୁ ଚେତାବନୀ ଦେଇଛନ୍ତି । ଆନ୍ଦୋଳନ କରୁଥିବା ଚାଷୀ ବୁରାଡି ଯିବାକୁ ମନା କରି ଦେଇଛନ୍ତି । ସେମାନଙ୍କ କହିବା କଥା ହେଉଛି, ବୁରାଡି ହେଉଛି ଏକ ମୁକ୍ତ ଜେଲ ।
Kanak News is now on WhatsApp
Join and get latest news updates delivered to you via WhatsApp
ଚାଷୀ ସଂଗଠନ ଭାରତୀୟ କିଷାନ ୟୁନିଅନ୍ କ୍ରାନ୍ତିକାରୀ ପଂଜାବର ରାଜ୍ୟ ଅଧ୍ୟକ୍ଷ ସୁରଜିତ ସିଂହ ଫୁଲେ କହିଛନ୍ତି, ଆଲୋଚନା ପାଇଁ ରଖାଯାଇଥିବା ସର୍ତ ଚାଷୀଙ୍କ ପାଇଁ ଅପମାନ । ଆମେ ବୁରାଡି କେବେ ବି ଯିବୁ ନାହିଁ, ବୁରାଡି ଓପନ ପାର୍କ ନୁହେଁ ବରଂ ଏକ ଓପନ ଜେଲ । ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି, ଯନ୍ତରମନ୍ତର ନେବା ନାଁରେ ବୁରାଡି ପଡିଆକୁ ନେଇ ବନ୍ଦ କରିଦିଆଯିବ ବୋଲି ସୂଚନା ମିଳିଛି । ବୁରାଡି ଜେଲ ଯିବା ଅପେକ୍ଷା ଚାଷୀମାନେ ଦିଲ୍ଲୀର ପାଂଚଟି ପ୍ରବେଶ ପଥକୁ ଅବରୋଧ କରାଯିବ । ସେମାନଙ୍କ ପାଖରେ ୪ ମାସରେ ରାସନ ରହିଛି, ତେଣୁ ଚିନ୍ତା କରିବାର କୌଣସି କାରଣ ନାହିଁ ବୋଲି ସୁରଜିତ ସିଂହଫୁଲେ କହିଛନ୍ତି ।
ପୂର୍ବରୁ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା କୃଷକମାନଙ୍କ ସମସ୍ତ ଦାବି ନେଇ ଆସନ୍ତା ଡିସେମ୍ବର ୩ପୂର୍ବରୁ ଆଲୋଚନା କରିବାକୁ ପ୍ରସ୍ତାବ ଦେଇଥିଲେ । ଏହା ସହ ବୁରାଡି ମୈଦାନକୁ ସମସ୍ତ ଆନ୍ଦୋଳନକାରୀ ଯିବା ପର ଦିନ ସରକାର ସେମାନଙ୍କ ସହ ଆଲୋଚନା କରିବେ ବୋଲି ଶାହା କହିଥିଲେ । ତେବେ ସ୍ୱରାଷ୍ଟ୍ର ମନ୍ତ୍ରୀଙ୍କ ଏହି ପ୍ରସ୍ତାବକୁ ଅଗ୍ରାହ୍ୟ କରିଛନ୍ତ କୃଷକ ସଂଗଠନ । ସେପଟେ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର ସରକାର ସବୁ ବେଳେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି ବୋଲି କହିଛନ୍ତି ।