କନକ ବ୍ୟୁରୋ : କୂଳ ଲଂଘୁଛି ନଦୀ । ନଦୀ ଗର୍ଭରେ ଲୀନ ହେବାକୁ ବସିଛି ଶହ ଶହ ହେକ୍ଟର ଚାଷଜମି । ନଦୀ ବନ୍ଧରୁ ବଡ ବଡ ଅତଡା ଖସି ପଡୁଛି । ଫଳରେ ଫସଲ ନଷ୍ଟ ହେଉଛି । ଖାଲି ସେତିକି ନୁହେଁ ନଦୀରେ ବନ୍ୟା ଆସି ଚାଷ ଜମିରେ ବାଲି ଚରି ଯାଉଛି । ନଦୀର ଏପରି କରାଳ ରୁପକୁ ଦେଖି ଚିନ୍ତାରେ ନଦୀ କୁଳିଆ ବାସିନ୍ଦା ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ଜିଲ୍ଲା ମାର୍ଶାଘାଈ, ଗରଦପୁର ଏବଂ ମହାକାଳପଡା ବ୍ଲକ ଦେଇ ବହିଯାଇଛି ଲୁଣା, ଚିତ୍ରତ୍ପୋଳା, ପାଇକା, କରାଣ୍ଡିଆ ଏବଂ ମହାନଦୀ । ଆଉ ଏବେ ନଦୀ ବନ୍ଧରୁ ଅତଡା ଖସିବାରୁ ପଠାରେ ଥିବା ଶହ ଶହ ହେକ୍ଟର ଚାଷ ଜମି ଏବେ ନଦୀ ଗର୍ଭରେ ଲୀନ ହେବାକୁ ବସିଛି । ମାର୍ଶାଘାଈ ଏବଂ ଗରଦପୁର ବ୍ଲକରେ ଲୁଣା ଏବଂ ଚିତ୍ରତ୍ପୋଳା ନଦୀର ଜୁଆର ମାଡରେ ଅତଡା ଧସୁଛି । ଚାଷୀ ସକାଳୁ ଦେଖି ଥିବା ଚାଷ ଜମି ସଂଧ୍ୟା ବେଳକୁ ନଦୀ ଗର୍ଭରେ ଲୀନ ହୋଇଯାଉଛି । ଜମି ସିନା ନଦୀର ଲୀନ ହୋଇ ଯାଇଛି, ଆଜି ବି ଜମିର ଖଜଣା ଭରୁଛନ୍ତି ଚାଷୀ ।
ବନ୍ଧରୁ ଅତଡା ଧସି ଚାଷ ଜମି ନଦୀ ଗର୍ଭରେ ଲୀନ ହେବା ସମସ୍ୟା ଦୀର୍ଘଦିନର । ଚାଷୀଙ୍କ ସମସ୍ୟାର ସମାଧାନ ପାଇଁ ଜଳସେଚନ ବିଭାଗ ପକ୍ଷରୁ ନଦୀଗୁଡିକର ଦୁଇପଟରେ ପଥର ପ୍ୟାକିଂ କରାଯାଉଛି । ଅତାଡା ଖାଉଥିବା ସ୍ଥାନ ଗୁଡିକ ଜଳସେଚନ ବିଭାଗ ପକ୍ଷରୁ ଚିହ୍ନଟ କରାଯିବା ସହ ଯୁଦ୍ଧ କାଳିନ ଭିତିରେ ପଦକ୍ଷେପ ନେବାକୁ ସ୍ଥାନିୟ ଅଂଚଳରେ ଦାବି ହେଉଛି ।