ଡେଡଲାଇନ୍ ସରିଲା, ଆନ୍ଦୋଳନ ଆରମ୍ଭ ହେଲା । ସରକାରଙ୍କୁ ଚେତାବନୀ ଦେଲେ ଚାଷୀ, ସମସ୍ୟା ପୂରଣ ନ ହେଲେ ସରକାରୀ ଅଫିସରେ ତାଲା ପଡିବ । ନେତା ଓ ବିଧାୟକଙ୍କ ଘର ସାମ୍ନାରେ ଧାନ ଗଦାହେବ
କନକ ବ୍ୟୁରୋ : ବିଧାନସଭାରେ ଧାନ ଝଡକୁ ଦେଖାଦେଇଛି ଅଚଳାବସ୍ଥା । ଗୃହକୁ ୩ଟା ଯାଏଁ ବାଚସ୍ପତି ମୁଲତବୀ କରିଥିବା ବେଳେ ଏବେ ଏହି ସମସ୍ୟାର ସମାଧାନ ପାଇଁ ବସିଛି ବଡ ବୈଠକ । ମଣ୍ଡିରୁ ଧାନ ବିକ୍ରି ସମସ୍ୟା ଦୂର କରିବା ପାଇଁ ଖାଦ୍ୟ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ଅଧ୍ୟକ୍ଷତାରେ ବୈଠକ ବସିଛି । ପଶ୍ଚିମ ଓଡ଼ିଶାର ସମସ୍ତ ବିଧାୟକ ଓ ନେତା ଏହି ବୈଠକରେ ଉପସ୍ଥିତ ଥିବା ବେଳେ ବିଜେଡି ସଙ୍ଗଠନ ସମ୍ପାଦକ ପ୍ରଣବ ପ୍ରକାଶ ଦାସ ମଧ୍ୟ ଏହି ଗୁରୁତ୍ୱପୂର୍ଣ୍ଣ ଆଲୋଚନାରେ ଭାଗ ନେଇଛନ୍ତି । ଏହାଛଡା ପୂର୍ବତନ ମନ୍ତ୍ରୀ ପ୍ରତାପ ଦେବ ଓ ସଞ୍ଜୟ ଦାସବର୍ମା ଏବଂ ସମବାୟ ସଚିବ ମଧ୍ୟ ଉପସ୍ଥିତ ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ମଣ୍ଡିରେ ଧାନ ବିକ୍ରି ସମସ୍ୟାର ସମାଧାନ ପାଇଁ ବୈଠକ ବସିଥିବା ବେଳେ ଅନ୍ୟପଟେ ଟୋକନ ବ୍ୟବସ୍ଥା ପ୍ରତ୍ୟାହାର ଦାବିରେ ବରଗଡରେ ତେଜିଲା ଚାଷୀ ଆନ୍ଦୋଳନ । ପ୍ରଶାସନ ଓ ଚାଷୀ ମୁହାଁମୁହିଁ ସ୍ଥିତିରେ । ପ୍ରଶାସନ ଚାଷୀଙ୍କ ସହିତ ଆଲୋଚନା କରିବାକୁ ଉଦ୍ୟମ କରିିଥିଲେ ମଧ୍ୟ ସେଥିରୁ କୌଣସି ଫଳ ମିଳିନି । ଉପଜିଲ୍ଲାପାଳ ଆନ୍ଦୋଳନ ରତ ଚାଷୀଙ୍କ ସହିତ ଆଲୋଚନା କରିଥିଲେ ମଧ୍ୟ ତାହା କୌଣସି ଫଳ ବାହାର କରିପାରନି । ଶେଷରେ ଉପଜିଲ୍ଲାପାଳଙ୍କ ଅଫିସରେ ତାଲା ପକାଇଛନ୍ତି ଉତ୍ୟକ୍ତ ଚାଷୀ ।
ସେହିଭଳି ସମ୍ବଲପୁର ଜିଲ୍ଲାରେ ବି ଦେଖିବାକୁ ମିଳିଛି ଚାଷୀଙ୍କ ଆନ୍ଦୋଳନ । ସମ୍ବଲପୁରରେ ଚାଉଳ ମିଲ ଗୁଡିକର ମଧୁଚନ୍ଦ୍ରିକା ଭିତରେ ଚାଷୀ ଏଥର ଅଭାବୀ ବିକ୍ରିର ସାମ୍ନା କରିବା ଆଶଙ୍କା କରୁଛି । ଗତ ୧୫ ତାରିଖରୁ ମଣ୍ଡି ଖୋଲିଲାଣି, ହେଲେ ବିକ୍ରି ହୋଇନପାରି ମଣ୍ଡିରେ ପଡ଼ିରହିଛି ହଜାର ହଜାର କ୍ୱିଂଟାଲ ଧାନ । ଟୋକନ୍ ବ୍ୟବସ୍ଥାକୁ ବିରୋଧ କରି ଧାନ ବିକ୍ରି କରୁନାହାନ୍ତି ଚାଷୀ । ଏହି ସମସ୍ୟାର ସମାଧାନ କରିବାକୁ ଗତ ୧୫ ତାରିଖରେ ୭୨ ଘଣ୍ଟିଆ ଡେଡଲାଇନ ଦେଇଥିଲେ ଚାଷୀ । କିନ୍ତୁ ଏହି ସମସ୍ୟାର ସମାଧାନ ନ ହେବାରୁ ଆନ୍ଦୋଳନ କରିବାକୁ ନିଷ୍ପତି ନେଇଛନ୍ତି ଚାଷୀ । ଏପରିକି ଦାବି ପୂରଣ ନ ହେଲେ ଜିଲ୍ଲାପାଳଙ୍କ କାର୍ଯ୍ୟାଳୟ ଓ ପଶ୍ଚିମ ଓଡ଼ିଶାର ସମସ୍ତ ବିଧାୟକଙ୍କ ଘର ସାମ୍ନାରେ ଧାନ ଢଳା ହେବ ବୋଲି ଚେତାବନୀ ଦେଇଛନ୍ତି ଚାଷୀ ।
ଚାଷୀଙ୍କ ଅଭିଯୋଗ, ଟୋକନ୍ ବ୍ୟବସ୍ଥାରେ ନିର୍ଦ୍ଦିଷ୍ଟ ପରିମାଣର ଧାନ ବିକ୍ରି ହୋଇପାରିବ । ଏଥର ଭଲ ଅମଳ ହୋଇଛି । ତେଣୁ ବଳକା ଧାନ କେମିତି ବିକିବ ଚାଷୀ । ଏସବୁକୁ ନେଇ ସମ୍ବଲପୁରରୁ ନେଇ ବରଗଡ ଯାଏଁ ଦେଖିବାକୁ ମିଳିଛି ଚାଷୀ ଅସନ୍ତୋଷ ।