ପ୍ରଖ୍ୟାତ ସମାଜସେବୀ ଷ୍ଟାନ ସ୍ୱାମୀଙ୍କ ୮୪ ବର୍ଷରେ ପରଲୋକ । ଜାମିନ ଆବେଦନର ଶୁଣାଣୀ ଭିତରେ ଆରପାରିକୁ ଚାଲିଗଲେ ଷ୍ଟାନ ସ୍ୱାମୀ
କନକ ବ୍ୟୁରୋ: ଆଦିବାସୀଙ୍କ ଅଧିକାର ପାଇଁ ଲଢେଇ କରୁଥିବା ଷ୍ଟାନ ସ୍ୱାମୀଙ୍କ କଥା ଆପଣ ଶୁଣିଥିବେ । ଏକ ମାମଲାରେ ହଠାତ ଗତ ବର୍ଷ ତାଙ୍କୁ ଗିରଫ କରାଯାଇଥିଲା । ଅଭିଯୋଗ ଥିଲା ମାଓବାଦୀଙ୍କ ସହ ସମ୍ପର୍କ ରଖିଛନ୍ତି । ୮୪ ବର୍ଷ ବୟସରେ ତାଙ୍କୁ ଜେଲ ଯିବାକୁ ପଡିଲା । ଜାମିନ ପାଇଁ ଆବେଦନ ବି କରିଥିଲେ । ବମ୍ବେ ହାଇକୋର୍ଟରେ ଏହାର ଶୁଣାଣୀ ଚାଲିଥିଲା । ଆଉ ଆଜି ଦୁଃଖଦ ଖବର ଆସିଲା ଷ୍ଟାନ ସ୍ୱାମୀ ଆଉ ନାହାଁନ୍ତି । କରୋନାରେ ଆକ୍ରାନ୍ତ ହେବା ପରେ ତାଙ୍କ ଶରୀରରେ ଅନେକ ଜଟିଳତା ଦେଖାଦେଲା । ଆଉ ଶେଷରେ ଆଦିବାସୀଙ୍କ ଅଧିକାର ପାଇଁ ଜୀବନ ସାରା ଲଢେଇ କରୁଥିବା ଏହି ବ୍ୟକ୍ତି ଜେଲରେ ରହି ରହି ମରିଗଲେ ।
Kanak News is now on WhatsApp
Join and get latest news updates delivered to you via WhatsApp
ଭିମା କୋରେଗାଓଁ ହିଂସା ମାମଲାରେ ମୁଖ୍ୟ ଆରୋପି ତଥା ସୋସିଆଲ ଆକ୍ଟିଭିଷ୍ଟ ଷ୍ଟାନ ସ୍ୱାମୀଙ୍କ ୮୪ ବର୍ଷ ବୟସରେ ପରଲୋକ । ଚିକିତ୍ସାଧିନ ଅବସ୍ଥାରେ ଷ୍ଟାନ ସ୍ୱାମୀଙ୍କ ମୁମ୍ବାଇ ସ୍ଥିତ ହୋଲି ଫ୍ୟାମିଲି ହସ୍ପିଟାଲରେ ତାଙ୍କ ମୃତ୍ୟୁ ହୋଇଛି । ଡାକ୍ତରଙ୍କ ସୂଚନା ଅନୁସାରେ କୋଭିଡ୍ ହେବା ପରର ଜଟିଳତା ପାଇଁ ତାଙ୍କ ଶରୀରର ଅଧିକାଂଶ ଅଙ୍ଗ ଅକାମି ହୋଇଯାଇଥିଲା । ସୋମବାର ବମ୍ବେ ହାଇକୋର୍ଟରେ ଷ୍ଟାନ ସ୍ୱାମୀଙ୍କ ଜମାନତ ଆବେଦନ ଉପରେ ଶୁଣାଣୀ ହେବାର ଥିଲା । ମାତ୍ର ଏପଟେ ତାଙ୍କ ମୃତ୍ୟୁ ହୋଇଛି । ବମ୍ବେ ହାଇକୋର୍ଟଙ୍କୁ ତାଙ୍କ ପରଲୋକର ସମ୍ବାଦ ଦିଆଯାଇଥିଲା । ଜାନୁୟାରୀ ୧, ୨୦୧୮ରେ ଦଳିତ ସମୁଦାୟର ଏକ କାର୍ଯ୍ୟକ୍ରମରେ ହୋଇଥିଲା । ଏଲଗାର ପରିଷଦର ଏହି ସମ୍ମିଳନୀରେ ହିଂସା ପରିସ୍ଥିତି ସୃଷ୍ଟି ହୋଇଥିଲା । ଉତ୍ୟକ୍ତ ଲୋକେ ଗାଡି ମୋଟର ଜାଳି ଦେଇଥିଲେ । ଘଟଣାରେ ଜଣଙ୍କର ମୃତ୍ୟୁ ହେବା ସହ ଅନକେ ଆହତ ହୋଇଥିଲେ ।
ଏହି ହିଂସା ପଛରେ ମୁଖ୍ୟ ଆସାମୀ ଫାଦର ଷ୍ଟାନ ସ୍ୱାମୀଙ୍କୁ ଏନଆଇଏ ଗତ ବର୍ଷ ରାଂଚିରୁ ଗିରଫ କରିଥିଲା । ଏହାପରେ ତଲୋଜା ଜେଲରେ ସଜା କାଟୁଥିଲେ ଷ୍ଟାନ ସ୍ୱାମୀ । କୋଭିଡ୍ରେ ସଂକ୍ରମିତ ହେବାପରେ ଚଳିତ ବର୍ଷ ମେ ମାସରେ ତାଙ୍କ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ବମ୍ବେ ହାଇକୋର୍ଟଙ୍କ ନିର୍ଦ୍ଦେଶରେ ତାଙ୍କୁ ହୋଲି ଫ୍ୟାମିଲି ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ଶନିବାର ତାଙ୍କ ହୃଦଘାତ ହୋଇଥି ଲା । ଏହାପରେ ସୋମବାର ଦିନ ସାଢେ ଗୋଟାଏରେ ତାଙ୍କ ପରଲୋକ ହୋଇଛି । ୮୪ ବର୍ଷୀୟ ଜଣେ ବୃଦ୍ଧ ସମାଜସେବୀ ନିଜ ଶେଷ ନିଶ୍ୱାସ ବି କଏଦୀ ଭାବେ ତ୍ୟାଗ କରିଛନ୍ତି । ସମାଜସେବା କ୍ଷେତ୍ରରେ ଷ୍ଟାନ ସ୍ୱାମୀଙ୍କର ଅନେକ ଅବଦାନ ରହିଛି । ତାଙ୍କ ପରଲୋକରେ ଶୋକ ପ୍ରକାଶ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ ।